28/06/2022
Էլեկտրոնային առևտուրը կամ e-commerce-ը երևույթ է, որը վերջին տարիներին աշխարհի շատ մարդկանց առօրյայի մաս է դարձել:Դա ինտերնետային կայքի միջոցով ապրանքների կամ ծառայությունների առք ու վաճառքն է,որտեղ բոլոր գործառույթները կատարվում են առցանց։Սա վերաբերում է ոչ միայն հագուստ, սնունդ կամ կահույք գնելուն, այլև բջջային հավելվածների, միջոցառումների տոմսերի, ապահովագրության և այլնի համար վճարելուն: Էլեկտրոնային կոմերցիան շատ ավելի հարմար է դարձնում գնման գործընթացը․ ապրանքն ընտրելուց հետո բավական է դրա համար առցանց վճարել, որից հետո այն անմիջապես կառաքվի ձեր տուն։ Դա շատ ավելի արագ և հեշտ է ստացվում, քան խանութ գնալը, որը ժամանակ է պահանջում, իսկ անհրաժեշտ ապրանքը այնտեղ կարող է չլինել։
E-commerce-ի շուկան շարունակում է աճել․ Nasdaq-ի կանխատեսումներով՝ մինչև 2040 թվականը բոլոր գնումների մինչև 95 տոկոսը կիրականացվի համացանցի միջոցով: Համընդհանուր թվայնացման պայմաններում էլեկտրոնային առևտուրը դառնում է համաշխարհային տնտեսության վերափոխման շարժիչ ուժերից մեկը:
Հայաստանում ոլորտը նոր է սկսել զարգանալ և 2022թ հուլիսի 1-ից ուժի մեջ մտնող անկանխիկ գործառնությունների մասին օրենքը միայն դրական ազդեցություն է ունենալու դրա վրա։ Փոքր և միջին բիզնեսները այսպես թե այնպես իրենց գործունեությունը սկսելու են համացանցում,իսկ մեծ բիզնեսով զբաղվողները դեռ շուտ էին կանխատեսել նման զարգացումը և արդեն ունեն մեծամասամբ անհրաժեշտ գործիքները շուկային հարմարվելու համար։