22/07/2021
THLARAU THLIANGHLIM HNATHAWH
Mathaia 16 :7-13
Thlarau thlianghlim lo thleng tur hi Isua lo lan hma tawh ata sawi lawk a lo ni tawh a, Amah Isua ngei pawn thlarau thianghlim lo thleng tur chu a hun tawp dawn hnaih khan a sawi bawk a ni. Ka kal in tan a tha, ka kal loh chuan thlamuantu tur a lo thleng dawn si lo. Ka kal chuan thlamuantu tur kan rawn tir ang.
Thlamuantu tur a lo thlen hunah chuan sual thuah te, fel thuah te, rorel thuah te thiam lo a chantir ang. Tiin a sawi a ni.
Thlamuantu lo thleng hi thlarau thianghlim chu a ni. Chu thlarau thianghlim chu kan hnenah lo thlengin, kan sual min hriattir a ni. Chumia tha zar awm fel kan in tihna nun zawng zawng pawh Isua thatnaah chuan tih mualphovin a awm a, a tenawm zia min hriattirin thiam lo a rawn chan tir a ni, mihringte suala a tluk khan mahnia ro in rel chawpin a lo awm ta, a tir ata ti sualtu 'chi' chuan mihring a fan chhuak vek a, chu sual chi lo thleng hmanga ro mihringin a rel ve na zawng zawng chu kawng dik lo leh chatuan boralna kawng a nih zia min hriattir bawk a ni.
Tin, thlarau thianghlim lo thleng chuan Isua chanchin min hriattir a, hriattir mai a ni lo, amah nunna kan chang a ni tih min hriattir a ni. Chu chuan sual huatna min neih tir a, kan taksa kal tlangin Isua ropuina a rawn puang chhuak thin.
Thlarau thianghlim chuan Isua zia min put tir a, Isua chanchin tha chauh min au chhuah tir thin. Isua chanchin ni lo, chanchin tha dang min au chhuah tir a nih chuan kan chan thlarau chu thlarau thianghlim a ni lo tih kan hriat a pawimawh.
Thlarau thianghlim chuan Isua chanchin tha puang chhuak turin min tihuai a, min ti chak bawk a ni. A zirtir ten thlarau thianghlim an chan hma khan an dawi hle a ni, a hun tawp dawn pawh khan a hnaihah an awm ngam lo, a awm ngam ber Petera lah khan a phatsan a nih kha.
Nimahse, thlarau thianghlim lo thleng a nun nena a in zawm takah chuan an huai tawh hle mai, Petera te thian dunin Isua chanchin an han hril a, pharisai leh lehkha ziaktuten an han khap a, An thu hril chu hril tawh lo tura an tih khan, an ni chuan huai takin Isua chanchin chu hril lo thei lo an nih thu an sawi mai a ni. A zirtirte chu Isua avangin an martar ta vek a ni kha. Chuvangin thlarau thianghlim chuan Isua tana rinawm turin min zirtir a ni.
Isua zia kan nunin a lan chhuahpui theih nan, kan chhungah nasa takin hna a thawk thin a ni. Chu chuan Isua ze mawi tak kan nunah a rawn par chhuahpui thin.
Thlarau thianghlim chuan Isua kawng chauh min zawhpui thin a ni. Isua aia ropui, thil mak leh thiltithei zawk anga lang tur thil reng renga hna thawktu chu thlarau thiang ni lovin thlarau nazawng a tite zinga mi a ni.
Isua chanchin ni awm taka lang, nimahse, ni miah lo a awm, Paulan kan hrilh che u Isua chanchin tha ni lo, chanchin tha dang chu anchhe dang awm rawh se a ti a ni. Chu chu thlarau thianghlim atanga chhuak a nih loh vang a ni.
Thlarau thianghlim hna thawh kan hriat fiah theih nan, kan Bible nen a in mil em tih kan fiah thin a pawimawh hle.
Sawi tur a tam hle mai, heti hian duh tawk phawt ang. A thu Lalpa malsawm rawh se.
