04/01/2023
HƏMRƏYLİYİMİZ ƏBƏDİDİR!
Araz çayı boyunca çəkilən tikanlı məftilləri sökməklə,bizi cənublu soydaşlarımızdan ayıran sərhəd dirəklərini qoparmaqla başladı həmrəyliyimiz.O taylı - bu taylı eyni dilə,eyni soy- kökə mənsub olan qardaşların hər iki sahildən hayqırtısı ilə başladı həmrəyliyimiz.Naxçıvan Muxtar Respublikası Ali Məclisinin 1991-ci il dekabrın 16- da Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərar qəbul edildi.Bu qərar müzakirə olunmaq üçün Azərbaycan Respublikası Ali Sovetinə göndərildi.Dekabrın 25- də Ali Sovetin Milli Şurası dekabrın 31- nin Dünya azərbaycanlıların həmrəyliyi günü elan olunması barədə qanun qəbul etdi.2001- ci il noyabrın 9-10-da Bakıda Dünya azərbaycanlılarının l Qurultayı keçirildi.Qurultaydan sonra Ümummilli Lider Heydər Əliyevin 5 iyul 2002- ci il tarixli Fərmanı ilə xaricdəki soydaşlarımızla əlaqələrin genişləndirilməsi və inkişaf etdirilməsi məqsədilə Xarici Ölkələrdə Yaşayan Azərbaycanlılarla İş üzrə Dövlət Komitəsinin ( hazırda Diasporla İş üzrə Dövlət Komitəsi) yaradılması, həmin il dekabrın 27- də isə " Xaricdə yaşayan azərbaycanlılarla bağlı dövlət siyasəti haqqında"Qanunun qəbul edilməsi dünya azərbaycanlılarının milli birliyi və təşkilatlanması prosesini daha da gücləndirdi.Həmrəylik günü milli birlik, Azərbaycana məhəbbət, milli - mənəvi dəyərlərimizə hörmət, Vətənə bağlılıq hisslərini özündə təcəssüm etdirir.
Prezident İlham Əliyevin təşəbbüsü ilə 2019- cu ildə " Diaspor fəaliyyətində xidmətə görə" Azərbaycan Respublikasının medalı təsis edildi.
Təqribi sayı 50 milyon nəfər olan dünya azərbaycanlılarının 30 milyon nəfəri İran İslam Respublikasında,3 milyon nəfəri Türkiyədə,2 milyon nəfəri Rusiyada,450 min nəfəri ABŞ- da,280 min nəfəri Ukraynada,200 min nəfəri Almaniyada,100 min nəfəri Böyük Britaniyada, 170 min nəfəri Kanadada yaşamaqla, ümumilikdə dünyanın 5 qitəsində 70 - dən artıq ölkəsində səpələnmişdir.Amerika qitəsində məskunlaşan soydaşlarımızın əksəriyyəti İrandan miqrasiya etmiş azərbaycanlılardır.1970- ci ildən etibarən Türkiyədən,1991- ci ildən isə Azərbaycandan bir qisim soydaşlarımızın bu qitəyə axını diasporumuzun tərkibinə və sosial - iqtisadi fəaliyyətnə öz təsirini göstərdi.
Dünyanın hər yerində soydaşlarımızın olması son illərdə Azərbaycan həqiqətlərinin dünyaya çatdırılmasında mühüm rol oynayır.Biz informasiya müharibəsində də tutarlı şəkildə sözümüzü deyə bilirik.Il Qarabağ müharibəsində bunun şahidi olduq.
Ulu Öndərimiz Heydər Əliyev tərəfindən əsası qoyulmuş həmrəylik bayramı hamımızın həyatında ən əlamətdar günlərdən biridir.Hər yeni təqvim ili başlayanda həmrəylimizi qorumaq,ildən- ilə gələcək nəsillərə çatdırmaq vəzifəsini hər birimizin yerinə yetirməli olduğunu dərk edirik.Həmrəyliyimiz əbədidir, sarsılmazdır! Həmrəyliyimiz bütün dünya azərbaycanlılarını birləşdirən,bir araya gətirən Ulu Öndərin əmanətidir!
İsmayıllı rayon Sumağallı kənd tam orta məktəbin müəllimi, ARZU Qadın İnkişaf Qrupunun sədri Arzu Mirzəyeva
