29/07/2023
كي تلقا مولاهم في الطريق يبيع، دير في حسابك بلي راهو ناظ الصباح على الخمسة باش ينحيهم ويحطهم في الطريق، ونهار كامل وهو مقابل الشمس وحامل لعطش، وسامح في اللعب غير باش يلم مصروف يشري قش الدخول المدرسي، ويصرف على روحو…
مالا كي تحبس عندو، يا إما تشري وتدي الاجر، واذا ماعجباتكش السومة اطلق رجلك وماكان لاه تشنف على الطفل وتسمعو كلام تاع ماراكم خاسرين عليه والو.. الطفل خاسر طفولتو ووقتو وصحتو، وباباه غارسو في ارضو وتعب عليه.. وانت اذا ماعجبكش روح اشريه من السوق وين تلقا الحبة بألفين فرنك والسومة تاعهم أربعة أضعاف…. والا اشري قطعة ارض واغرسها هندي وكول ببلاش بصحتك.
