18/04/2026
🍕 وصفة بيتزا المحلات 🍕
1. المكونات (تخرجلك 5 خبزات): 🥣
💧 الماء: نص لتر تاع الماء (ماشي دافي، بدرجة حرارة الغرفة ).
🥚 البيض: حبة تاع البيض.
🥃 الزيت: فنجال أتاي تاع الزيت.
🍬 السكر: زوج مغارف كبار تاع السكر.
🥛 اللحظة: زوج مغارف كبار تاع اللحظة (وإذا ما عندكش دير نص ليترة حليب في بلاصة الماء).
🍞 خميرة الخبز: ملعقة تكون متوسطة (ما ديروش ملعقة كبيرة خاش تخمر في الفريجيدير).
🧁 خميرة الحلوة: ملعقة صغيرة.
🧂 الملح: ملعقة صغيرة.
🌾 الفرينة: كيلو تاع فرينة (حتى نتحصل على عجينة طرية وتلصق شوية في اليد).
2. طريقة التحضير: 👨🍳
🥣 الخلط: تخلط كلش بهذ الطريقة، الخميرة والسكر واللحظة والماء والبيض والزيت.
👐 الطم: تقعد تلم بالفرينة (تدي لك كيلو سوا سوا) حتى تولي العجينة طرية وماشي يابسة.
💪 العجن: تعجنها مليح حتى تتحصل على عجينة تكون رطبة وشادة روحها.
⏳ الراحة: تدهنها بشوية زيت وتخليها تريح "نص ساعة برا" قبل ما تقطعها.
⚪ التقسيم: تكورهم مليح (5 خبزات) وتحطهم في سنيوة وتغطيهم مليح بـ "بابي فيلم".
❄️ التخمير في الفريجيدير: تدخلهم للفريجيدير "مينيموم ست سوايع". قد ما تخليها راح تجيك هايلة وبزاف خفيفة (من الأحسن ليلة كاملة).
3. التشكيل والطهي: 🔥
📏 الفتح: تفتح لابات تاعك بـ "الدقيق يكون رطب" (السميد)، تفتحها بالحلال وتكمل بيدك حتى تتحصل على عجينة رقيقة في الوسط وشوية خشينة في لي كوتي.
🍅 الحشو: دير لاصوص طومات، زيتون أخضر مشلل، وشومبينيون معلب.
🌡️ الفرن: لازم يكون مسخن من قبل على "أعلى درجة حرارة" (250 أو 280).
🔥 الطياب: طيبها من التحت مليح حتى تتحمر، ومن بعد شعل من الفوق ودير الفرامج.
4. سر البنة (الفرامج واللمسة الأخيرة):
🧀 الفرماج: نستخدم شيدار (شيدار غوج) وموتزاريلا
🌿 اللمسة الأخيرة: تدهن لي كوتي بشوية زيت زيتون، ودير الطون تاع الزيت من الفوق ورشة أعشاب عطرية.
و بصحتكم🥰
