16/08/2026
البوست ممكن يكون طويل شوية، فسامحوني 🫶🏻😂
بس دي شوية قواعد مهمة هثبتها هنا عشان نوفر وقت ومجهود علينا كلنا، وتبقى كل التفاصيل واضحة من البداية ❤️
1️⃣ الحجز قبل الأوردر بأسبوع على الأقل.
ولو الأوردر مستعجل، اسألوني الأول عن إمكانية التنفيذ قبل ما نتفق على أي حاجة.
2️⃣ تأكيد الحجز بيكون بديبوزت 50% من قيمة الأوردر.
حتى لو اتفقنا على كل التفاصيل، بالنسبة لي الأوردر متأكدش بدون تحويل الديبوزت.
3️⃣ طيب اتفقنا، واتأخرتي يومين أو تلاتة أو أربعة في تحويل الديبوزت؟
مفيش مشكله خالص بس قبل التحويل ابعتيلي تاني نتأكد إن اليوم لسه فاضي، لأن بمجرد ما الديبوزت يتأخر مش بقدر أضمن إن التاريخ لسه متاح.
4️⃣ السعر بيتحدد حسب الديزاين + المقاس + كل التفاصيل المطلوبة.
يعني مش نتفق على ديزاين وأقولك سعره، وبعدها نبدأ نزود إضافات واحدة واحدة 😂
بلغيني من البداية بكل التفاصيل اللي عايزاها في الديزاين، وأنا أقولك السعر النهائي.
5️⃣ طب انا مش عارفة مقاسات اعمل ايه ؟
حضرتك بتقوليلي محتاجة التورتة تكفي كام فرد، وأنا هقولك المقاس المناسب، بناءً على خبرتي وتجارب وآراء العملاء في المقاسات اللي خدوها قبل كده.
6️⃣ "أنا مش عايزاها تكفي عدد، أنا جايباها للتصوير بس" 📸
في الحالة دي غالبًا الاختيارات بتكون بين:
🎂 ميني كيك صغيرة على قد التصوير.
🎂 أو مقاس متوسط يكون شكله مناسب مع الديكور والسفرة.
7️⃣ لو حضرتك اخترتي مقاس فردين مثلًا، طبيعي التورتة تكون فعلًا مناسبة لفردين 😅
يعني هتتقطع على قطعتين تقريبًا، فماتجيش بعد الاستلام تتفاجئي وتقولي: "إيه ده هي صغيرة كده ليه؟" 😂
هي صغيرة لأنها تورتة فردين ❤️
ونفس الكلام على باقي المقاسات.
8️⃣ الاستلام:
الاستلام بيكون من عندي، أو حضرتك بتطلبي اوبر او اندرايف عربية في الوقت اللي بنتفق عليه، وأنا بنزل أسلم الأوردر للكابتن.
وطبعًا تكلفة التوصيل بتكون على حضرتك .
9️⃣ باقي المبلغ:
بيتم دفعه وقت الاستلام.
ولو التوصيل بأوبر او اندرايف، باقي المبلغ بيتحول على المحفظة قبل ما حضرتك تطلبي .
وطبعًا بصور لحضرتك الأوردر بتاعك قبل التسليم، يعني مش هقولك حوّلي وبعدين نشوف التورتة 😂❤️
🔟 وأخيرًا… ممنوع الفصال أرجوكم 😂❤️
إحنا بناخد جودة مقابل سعر، ولو هننزل في السعر فالمفروض ننزل في الجودة، وده شيء أنا مستحيل أعمله.
فلو الفصال هواية عندك 😂 عرفيني من البداية، أرفعلك السعر شوية وأسيبك تفاصلي براحتك لحد ما نتبسط إحنا الاتنين 😂😂❤️
وأخيرًا وليس آخرًا…
أنا بحب أعمل التورت جدا وشايفه انه فن ❤️
وبكون مبسوطة وأنا بعملها وبفنن في شكلها وتفاصيلها.
فمحدش يفتكر إني "شغالة عند حد" 😂
احنا بنتعامل باحترام وذوق متبادل، وأنا بحب جدًا العميل اللي مقدّر الشغل والفن والمجهود .
لكن اللي هييجي يتنطط عليا… هتنطط عليه الأول قبل ما أكرفله أصلًا 😂😂♥️
بحبكم وبحب شغلي، والقواعد دي معموله عشان نفضل مبسوطين وإحنا بنتعامل مع بعض 🫶🏻❤️
وشكرًا لكل عميل مقدّر شغلي ومجهودي من البداية 🤍✨
