20/01/2024
إياك ان تظن إنك لو مشتريتش حاجة دلوقتي هتندم ،
الكلام ده سئ جدًا ، وله توابع سيئة على نفسيتك وقلبك
أوعى تخلي الدنيا وتقلباتها تنهش في قلبك وتخليك عايش في توتر مستمر وتسمع كلام كتير زي : " يااه ، ده اللي اشترى عربية من سنتين عدا ، ده اللي اتجوز بقا من اد كذا ده فلت ، ده اللي عمل مش عارف ايه ده ربنا كرمه ...
ده كلام من لا يعرف الله ولا أوصاف وأفعال الله!
ده كلام من لا يملك اليقين فيما عند الله ولا إدراك لسعة خزائن الله!
وحتى لما تيجي تفكر ، فيه ناس اتجوزت وجرام الدهب ب ٣٠ جنيه وناس اتجوزت وهو بـ ٦٠٠ ،والاتنين بالنسبالك أمل مع ان التاني عشرين ضعف الأول ،، الحمد لله ان ربنا هو الذي تكفل بالزواج والرزق والإكرام
الكلمة المهمة بجد اللي محتاجين نوقن بيها "أنت مافاتكش في الدنيا حاجة" ، وكل شئ فيها بيتعوض ويروح وييجي
اللي يفوتك بس اللي أنت تفوته في دينك والآخرة أما الدنيا محدش بيفوته فيها حاجة.
قال النبي عليه الصلاة والسلام :
أربعٌ إذا كُنَّ فيك ( فلا عليك ما فاتك من الدُّنيا )
حفظُ أمانةٍ ، وصدقُ حديثٍ ، وحسنُ خُلقٍ ، وعِفَّةٌ في طُعمةٍ
وهتلاقي في الآية العظيمة :
لكيلا تأسوا على ما فاتكم ...
أنت مفاتكش في الدنيا حاجة ، مهما كان قدامك من فرص
محدش بياخد اكتر من نصيبه♥️
