08/08/2026
الجهاز القومي لتنظيم الاتصالات أصدر بيان بخصوص موضوع ظهور خطوط محمول مسجلة باسم مواطنين من غير علمهم، وقال إن أي مواطن يكتشف خط مش بتاعه ومسجل باسمه من حقه يقدم شكوى للجهاز، والجهاز هيراجع إجراءات تسجيل الخط مع شركة المحمول ويتأكد إذا كان حصلت مخالفة ولا لأ، ولو ثبتت المخالفة هيتاخد الإجراء اللازم، وكمان المواطن من حقه يبلغ جهات التحقيق لو شايف إن الموضوع يستدعي ده.
الجهاز طمّن المواطنين كمان إن مجرد إن خط يكون مسجل باسمك مش معناه تلقائيًا إنك مسؤول عن أي حاجة اتعملت بالخط، طالما ثبت إن الخط مش بتاعك أو مكنش في حيازتك أو تحت سيطرتك الفعلية. المسؤولية القانونية شخصية، وبتتحدد حسب الوقائع والأدلة والتحقيقات، والجهات المختصة هي اللي بتحدد المسؤول عن أي واقعة.
الجهاز أكد إنه شغال على تشديد قواعد تسجيل وتفعيل خطوط المحمول، وزيادة التفتيش والرقابة على شركات الاتصالات، واتخاذ الإجراءات والجزاءات ضد أي مخالفات، بالإضافة إلى تطوير طرق أقوى للتأكد من هوية المستخدم، ومنها التحقق ببصمة الوجه والوسائل البيومترية.
والجهاز طالب المواطنين إنهم يراجعوا بشكل دوري الخطوط المسجلة بأسمائهم من خلال تطبيق My NTRA، ولو ظهر أي رقم مش معروف لهم يبلغوا عنه فورًا، سواء من خلال الرقم 155 أو تطبيق My NTRA أو قنوات التواصل الخاصة بالجهاز، لأن وجود خط باسمك وأنت مش عارف عنه ممكن يعمل لك مشكلة ويحتاج تتحرك لإثبات إن الخط مش في حيازتك.
