12/03/2022
السلام عليكم ورحمة الله وبركاته
والصلاة والسلام على خير الانام سيدنا محمد عليه الصلاة والسلام
كل عام وكل الامة الاسلامية بألف خير وصحة وحفظا من المولى عز وجل ♥️
🌻 بإذن الله حنبدأ سلسلة ملايتي براند لتعليم كل ست إزاي تعرف تفصل ملاية بنفسها .. واي موديل تقدر تنفذه سواء فلات او كرانيش
ملايتي براند بتقدم المبادرة دي لكل الستات سواء اللي نفسها تعمل مشروع الملايات ومعندهاش خلفية .. أو اللي نفسها تفصل طقم بإيدها
وملايتي براند حاتثبت البوستات دي بحيث تبقى مرجع لاي واحدة
حنزل في كل مرة موديل ونتكلم عنه بكل تفاصيله وتكاته
وأول حاجة لازم نعرفها في البداية هي
🍁المقاسات الاساسية🍁
المقاسات الاساسية دي ثابتة في الطقم الفلات ومع الكرانيش بتتغير حاجات بسيطة حانعرفها بعدين
حنبدأ بالملاية الفلات لسرير ١.٦٠م بتتكون من:
جنب يمين+قرص السرير +جنب شمال
=٤٥سم+١.٦٠م+٤٥سم=٢.٥٠م
طب والملاية الفلات لسرير ١.٨٠م=
جنب يمين+قرص السرير+جنب شمال
=٤٥سم+١.٨٠م+٤٥سم =٢.٧٥م
☝️بالنسبة للمخدات
💥مقاس المخدة لسرير ١.٦٠م = بتقيسي ١.٦٠م من القماش بيطلع ٢كيس مخدة و١خدادية وحاقولك الطريقة حاااضر
💥مقاس المخدة لسرير ١.٨٠م=بتقيسي ١.٨٠م من القماش بيطلع ٢كيس مخدة و١خدادية وبردة حاقولك حاضر ازاي
💥مقاس الخدادية ثابت = ٥٥سم×٧٥سم
🍓عايزة اشتري قماش لطقم ملاية فلات لسرير ١.٦٠م أجيب أد إيه....؟
🍌طقم الملاية الفلات لسرير ١.٦٠م =
السرير= ٢.٥٠م.... وقولتلك فوق جت ازاي
٢كيس مخدة و١خدادية =١.٦٠م.... وحاقولك ازاي بس اصبري
باقي خدادية=٥٥سم
يبقى المجموع كله=
٢.٥٠م+١.٦٠م+٥٥سم=
٤.٧٥م
يبقى طقم السريرالفلات ١.٦٠م بيعمل ٤.٧٥م قماش
في ناس حاتقول ليه في زيادة في القماش
حاقولك دي المقاسات الاساسية لطقم السرير الفلات والمرتاح مش تلاقي الجنبين قصيرين وشكلهم مش حلو
ولو بالذات سرير غرفة النوم في منتصف الغرفة
فبلاش نضيع شكل الطقم علشان ربع متر
🍌قماش لطقم سريرفلات ١.٨٠م=
السرير= ٢.٧٥م... وقولتلك فوق جت ازاي
٢كيس مخدة و١خدادية =١.٨٠م... وحاقولك ازاي
١خدادية=٥٥سم
يبقى المجموع =٢.٧٥م+١.٨٠م+٥٥سم=٥.٢٥م
طقم سريرفلات ١.٨٠م بيعمل ٥.٢٥م قماش
🌻ازاي نطلع ٢كيس مخدة و١خدادية من مقاس ١.٦٠م ....؟
قيسي ١.٦٠م بالضبط وبعدين حطي طرفين القماش على بعض واضبطيهم وشوفي الرسم الكروكي اللي فوق
ومن عند الطرفين قيسي لجوة ٩٠سم
من الطرفين لجوة
مش من عند تنية القماش لأ لأ لأ من عمد طرفين القماش من ناحية الطول وشوفي الرسم الكروكي كويس
تمام قيستي ٩٠سم من عند الطرفين قصي طرطوفة صغيرة بالمقص وبعدين اقطعيها بإيدك ومتخافيش مش حاتورب علشان انت ماشية في اتجاه البرسل
حايطلع معاكي ٢قطعة كل واحدة ٩٠سم وهما دول كيسين المخدات
والحتة التانية اللي طلعت من ناحية تنية القماش فهي دي خدادية واحدةبالتمام
وبكدة من ١.٦٠م طلعتي ٢كيس مخدة وخدادية واحدة
ونفس الشىء بالنسبة لمخدات السرير١.٨٠م ... بردة بتقيسي من ناحية الطرفين ٩٠سم وتقطعي واللي حاتفضل دي خدادية
👌وبكدة هى دي المقاسات الاساسية لطقم فلات لسرير ١.٦٠م وسرير ١.٨٠م
واللي حانمشي عليها في كل الاطقم مع تغيرات بسيطة😍
بتمنى اكون أفدتكم وطبعا في اساتذة كتير مش محتاجين اعرفهم ولكن المبادرة دي موجه لستات البيوت والمبتدآت اللي نفسهم يعملوا مشروع الملايات
⚘بوستات ملايتي براند حتفضل بمثابة مرجع ليكم علشان تعرفوا تعملوا اي طقم بإيدكم سواء ليكم او لحبايبكم
⚘حابة اشكر انسانة عزيزة وغالية عليا وهي صاحبة الفضل في وجود ملايتي براند بعد ربنا عزوجل وهي
ام جودي بتمنى تشوف شكري وامتناني ليها .. كمان هى بدأت مبادرة لتعليم الستات من سنين وملايتي براند بتشتغل على نفس الهدف ده في تعليم كل الستات من خلال صفحتنا على فيس بوك
بتمنى لو استفدتم تكافؤني باللايك
وذكر الله عزوجل
انتظروا ملايتي براند ضمن سلسلة تعليم كل ست ازاي تعملي بنفسك اي موديل يعجبك❤❤❤❤
