06/05/2026
: الحكومة قررت تلغي الجواز بالذوق😕
هقول رايي والي يزعل يزعل مش مهم او مش فارقه اقرا البوست للاخر يمكن تستوعب
أنا قريت الـ 350 مادة بتوع مشروع قانون الأسرة اللي راح مجلس النواب... واكتشفت إن الحكومة مش عايزة تصلح البيوت دي عايزة تقفلها بالضبة والمفتاح.
تعالوا نشوف المهزلة بالقانون:
1. عايز تتجوز؟ هات شهادة ضمان الأول!
المادة 31: قبل المأذون ما ينطق، لازم تقدم "وثيقة تأمين ضد الطلاق" تضمن لمراتك فلوس لو سيبتها.
يعني الجواز بقى زي الثلاجة... له ضمان 5 سنين ضد عيوب الصناعة.
السؤال: طب لو هي اللي طلعت فيها عيب صناعة؟ مين يعوضني؟
الحكومة عملت للست "وسادة أمان" والعريس يلبس في الحيطة لوحده.
2. الجواز بقى له فترة تجربة 6 شهور
لو طلعت كداب أو مخبي حاجة، مراتك ترجعك للمعرض في أول 6 شهور وترميك... بشرط مفيش عيال.
يعني حضرتك مش بتتجوز حضرتك واخد جهاز بالقسط. لو معجبكش ترجعه وتاخد فلوسك.
بس ثانية... طب لو هي اللي طلعت كدابة؟ القانون سكت. معلش يا ابني استحمل 😂
3. الأب خد ترقية... من "ماكينة صرف" لـ "وصيف الحضانة"
الترتيب الجديد: الأم الأولى - الأب التاني - الجدات بره اللعبة.
بعد 50 سنة الأب كان رقم 16 في ترتيب الحضانة، الحكومة افتكرته ورقته لـ رقم 2.
بس برضو هتدفع نفقة وتأمين وتبقى رقم 2. يعني اترقيت بس من غير زيادة أجر.
4. وأخيراً قانون للمسيحيين... بعد ما الناس شابت
مجلس الوزراء وافق 22 إبريل على قانون موحد للمسيحيين بينظم الطلاق والزواج التاني.
كنا بنحارب في المحاكم 100 سنة عشان ناخد حكم... الدولة صحيت دلوقتي.
5. الشبكة هترجع بالقانون... بس لما القانون ينزل أصلاً
الخطوبة بقت "وعد" مش عقد. يعني لو فسختوا، حاجتكم ترجع.
بس المشروع لسه في اللجان. يعني اللي فسخ يستنى الفرج معانا.
---
بس تعالى هنا... سيبك من القانون وقولي: فين الوجع الحقيقي؟
القانون ده مكتوب بالحبر... لكن البيوت بتتخرب بالقلوب الحجر.
حولتوا الجواز من "سكن ومودة" لـ "عقد وشروط جزائية". كله باصص للتاني هياخد إيه وهيدفع كام. فين ربنا في النص؟
كلمتين طالعين من القلب... ومش هيعجبوا ناس كتير:
يا بنت الناس... اسمعيني كويس:
انتي سيبتي بيت أبوكِ اللي اتولدتي فيه، وجاية بيت راجل غريب عشان تبني معاه عمر. وافقتي بكامل إرادتك إنه يبقى جوزك... يعني بقى أبوكِ وأخوكِ وصاحبكِ وسندكِ وضهركِ في الدنيا.
طب ليه أول ما يغلط بتمسكي له السكينة؟ ليه مستنية له على الواحدة؟
أبوكِ لما كان بيزعق في البيت ويتعصب ويغلط، كنتي بتستحمليه وتقولي "أبويا وله هيبة وله عذره"... اشمعنى جوزك لأ؟
هو جوزك ده مش بقى "أبو عيالك"؟ مش هو اللي لو وقعتي الدنيا كلها هتسندكِ إلا هو؟
القانون هيجبلك فلوسك... بس مين هيجبلك راجل يحبك ويسترك ويشيلك في تعبك ومرضك؟
وثيقة التأمين هتصرفلك نفقة... بس مش هتدفيكي في ليلة برد وانتِ لوحدك.
لو داخلة الجواز ودماغك "لو غلط هحبسه" يبقى متتجوزيش أحسن. البيوت مبتتعمرش بالمحاكم والتهديد... البيوت بتتعمر بالستر. الراجل لما يحس إن مراته ستر وغطا عليه، يديها عينيه. إنما لما يحس إنها قاعدة له على الغلطة، هيعيش خايف منها... ومفيش بيت بيقوم على الخوف.
وانت يا ابن الناس:
مراتك دي سابت حضن أمها وجت حضنك ونامت في بيتك وهي شايلة اسمك. دي أمانة ربنا في رقبتك مش قضية في المحكمة.
الرجولة مش إنك تزعق وتكسر وتذل. الرجولة إنها تنام كل ليلة وهي متطمنة إنك ضهرها وسندها وحمايتها حتى لو الدنيا كلها عليها. الرجولة إنك تشيل مسئولية بيتك وتصرف وتستر وتحتوي.
لو هتخون الأمانة وتكسرها وتذلها... يبقى متلومش على القانون لما يجي ياخد حقها منك. لأنك انت اللي رخصتها من الأول.
الخلاصة:
مفيش قانون في الدنيا هيخلي راجل ناقص يحترم مراته، ولا هيخلي ست قاسية تحن على جوزها.
اللي بيصلح البيوت أصل ونخوة ودين... مش 350 مادة.
مشروع القانون لسه في مجلس النواب... بس خراب البيوت شغال من زمان، ومش القانون هو السبب.
المحامي
... .
