16/12/2025
الغسالة مبتعصرش كويس؟ الهدوم ريحتها "مكمكمة"؟ السر كله في الفلتر ده! 🧺😱
يا جماعة، كلنا بنهتم بنوع المسحوق والداوني، وبننسى أهم حتة في الغسالة الأوتوماتيك.. "فلتر طرمبة الصرف". الفلتر ده هو اللي بيحوش الوبر، الدبابيس، الزراير، وأي "فكة" فضة نسيناها في الجيوب. 😅
لو الفلتر ده مسدود، الغسالة مش هتصرف الميه صح، والهدوم هتطلع ريحتها مش حلوة، وممكن الغسالة تقف خالص وتديكي Error.
إزاي تنضفي فلتر الغسالة في 5 دقايق بس؟ (خطوة بخطوة): 👇
الأمان أولاً: 🔌 شيلة فيشة الغسالة من الكهرباء عشان نشتغل في الأمان.
جهزي العدة: 🥣 هاتي طبق غويط صغير وفوطة قديمة (أو خرقة) وحطيهم تحت الباب الصغير اللي بيبقى أسفل الغسالة (على اليمين أو الشمال).
افتحي الباب: 🚪 افتحي الغطاء المربع الصغير اللي تحت ده.
فكي الفلتر بذكاء: 🔄 هتلاقي مقبض الفلتر، لفيه "عكس عقارب الساعة" بالراحة.. ماتشديهوش لبره علطول! لفيه سنة وسيبيه ينزل الميه الزيادة في الطبق الأول عشان ماتغرقش الأرض.
التنضيف: 🧼 بعد ما الميه تخلص، اسحبي الفلتر لبره. شوفي بقى المفاجآت (وبر، شعر، دبابيس). اغسليه كويس تحت الحنفية بفرشة أسنان قديمة لحد ما ينضف تماماً.
نضفي مكانه: 🧽 بصي جوه الفتحة بتاعة الفلتر في الغسالة، ومشي صباعك (بحذر) وشيلي أي وبر لازق جوه، وتأكدي إن المروحة اللي جوه بتلف، مفيش حاجة حايشاها.
التركيب: ✅ رجعي الفلتر مكانه ولفيه "مع عقارب الساعة" لحد ما يقفل بإحكام (عشان مايسربش ميه)، واقفي الباب الصغير.
💡 نصيحة: اعملي الموضوع ده مرة كل شهر أو شهرين بالكتير، هتحسي بفرق كبير في ريحة الغسيل وصوت الغسالة.
قولولنا بقى.. أيه أغرب حاجة لقيتوها جوه فلتر الغسالة قبل كده؟
#نظافة #غسيل
