28/06/2026
بسم الله الرحمن الرحيم: اكتر حاجة بتضرب التحويل في العجول هي التوتر
بسم الله الرحمن الرحيم: أكتر حاجة بتقلل الانتاجية في عجول التسمين والحلاب والاغنام وجميع انواع المجترات هي التوتر
بسم الله الرحمن الرحيم: مفيش عدو للمربي أخطر من التوتر
والكلام اللي جاي ده لو فهمته كويس حياتك كمربي هتتغير تماما.. خد وقتك واقرا الكلام كويس وافهم واستفهم لو حاجة عطلت معاك .. ويا ريت تشير البوست علشان اللي ميعرفش يستفيد.
إصابة العجول بالتوتر هي أكتر حاجة تخسّر مهما كانت الظروف الباقية مثالية.. ١٠٠ عجل شاروليه بياكلوا أعظم عليقة في العالم، ممكن يقعدوا شهر كامل ميحولوش جرام واحد لو مصابين بالتوتر.. وعلى ضمانتي كمان: العجول دي هتصاب بأمراض غير متوقعة، مش بس هتتوقف انتاجيتها.
فيه توتر = مفيش انتاجية
فيه توتر = فيه مصايب كتير
أولا، وعلشان فيه كمية تخريف كتير منتشرة عن الموضوع ده، ايه هو التوتر:
التوتر هو الحالة التي يتعرض فيها الحيوان لأي مؤثر يهدد أو يخلّ بتوازنه الداخلي، فيستجيب الجسم بتنشيط آليات عصبية وهرمونية وسلوكية لاستعادة هذا التوازن.
معنى الكلام ده ببساطة ان فيه حاجة بتحصل حوالين العجل بتأدي ان جسمه بيستجيب او بيعمل رد فعل.. رد الفعل ده هو التوتر.
يعني النقل وارتفاع درجة الحرارة والفطام دي مش توتر.. دي أسباب تؤدي للتوتر.
الظروف المحيطة بالعجل ترجمتها بالنسب لحضرتك كإنسان، غير ترجمتها بالنسباله كحيوان مجتر.. احنا بنفصل الظروف المحيطة بالعجل علشان تصنع اقل قدر من التوتر علشان يحقق اعلى قدر من الانتاجية.
مثلا: لو انت أخرت العليقة بتاعته عنه نص ساعة، ترجمتها بالنسبالك ”ما جتش من نص ساعة يعني، ما انا في النهاية اكلته“.. ترجمتها بالنسبة للعجل ”انا داخل على مجاعة وحياتي في خطر“.
احساس العجل بالخطر بيخلي جسمه يعمل اجراءات، زي انه يرفع مستوى السكر في الدم ويكسر الجليكوجين ويرفع نبضات القلب ويزود التنفس ويحول الدم من الاعضاء الداخلية للعضلات ويوقف الهضم لأنه بالنسباله مبقاش عملية ضرورية، ويثبط المناعة ويقلل النمو.
ده بالمناسبة بيحصل في كل الثدييات ومن ضمنهم البشر، بس احنا بنقدر نتعايش معاه وبنتوتر واعصابنا بتتحرق ونعيش عادي.. بالنسبة للعجل مش عادي .. التوتر يقتل اسرع مما تتخيل.. والتوتر يقلل الانتاجية بشكل رهيب.
علشان تفهم التوتر، لازم تشوف الحياة من منظور العجل.
يعني وانت بتصمم المكان بتاعك متحسبش المسافة اللي يقف فيها على متطلباتك انت (العجل هيقف هنا وانا هعدي من هنا علشان اعلفه واعدي من هنا علشان انضف وراه) لازم تحسبها على متطلبات العجل.. لأن ضيق المكان وعدم احساسه بالراحة بيؤدوا للتوتر.. والتوتر جاي عليك بخسارة.
الحرارة في المكان مش على كيفك انت.. على كيفه هو.. وهو كيفه لا يزيد على درجة حرارة ٢٥ والا يبقا فيه توتر، والتوتر يخلي انتاجيته تقل.. ولا انت لحد دلوقتي مش ملاحظ ان ابقار اوروبا بتكبر اسرع من ابقارنا وحلاباتهم انتاجيتها اعلى من حلاباتنا؟ هم عايشين عندنا عادي وبينتجوا.. بس اقل من انتاجيتهم في درجة حرارة مناسبة.
وانت بترتب مواعيد العلف مترتبهاش على مواعيدك انت.. فكر ان فيه مخلوق لما تتأخر عليه دقيقة واحد بيعيش الدقيقة دي في حالة توتر لانه بيتخيل انه مش هيشوف الاكل تاني.
وانت بتنقلهم مش بتحسبها على مقاس العربية وتكلفة النقل، احسبها على اساس ان فيه مخلوق اتشال من مكانه بالغصب والضرب واتحط في صندوق عربية مقفول واتمخمض في مشوار وبعدين الصندوق اتفتح لقا نفسه في عالم تاني.. عالم ميعرفش فيه اي حاجة .. طبيعي يحس بالخطر ويتوتر.
التوتر بيضرب المناعة في مقتل .. وهو السبب الرئيسي ان العجول بعد نقلها بتمرض بالحمى والطفيليات تنشط في جسمها والكحة تشتغل وكل المصايب تحل رغم انه كان في مكانه حلو وزي الفل.
التوتر بيعمل اضطراب في الشهية، وبيعطل النمو (اللي هو اكل عيشك)..
”يا عم انت كاتب بوست طويل عريض على ايه؟؟ فين الفايدة؟؟ اعمل ايه يعني؟؟ انا معنديش مخ افهم ولا اتعلم ولا افكر وعايزك تديني الحل في معلقة“
الحل: قلل التوتر
إزاي؟
راعي الراحة في النقل
راعي الانسانية في الاستقبال
سكن الحيوان في مكان يرتاح فيه من البلل والقذارة وخشونة الارض وضيق المساحة واختناق الامونيا والتزاحم
التزم بمواعيد ثابتة في التغذية .. مواعيد ثابتة بالثانية ومتغيرهاش ابدا
ثبت العليقة تماما طول حياة العجل ولا تفاجئه بزيادة الكميات ابدا
وفر مياه نظيفة ومتاحة طول الوقت علشان العطش واحد من أسرع أسباب ارتفاع هرمونات التوتر وانخفاض استهلاك العلف.
اعرف ان تكتيف العجل وتضييق الخناق عليه ورفع الطوالة بيسببوا التوتر مش بيعملوا عضلات ولا نيلة.
بلاش دوشة وزعيق وزحمة واي حاجة مزعجة بلاش منها حوالين العجول
عالج الألم بسرعة، العرج والجروح والطفيليات كلها مصادر توتر مزمن حتى لو كان العجل بياكل طبيعي.
استخدم علف الاتحاد لأنه علف عالي الطاقة، ووفرة الطاقة في العلف من العوامل المهدئة للحيوان.
أهم حاجة: خليك انت هادي وسالك ومطمئن وانت وسط العجول .. البني ادم الغلاوي المنفسن الكاره المحتقن واحد من اهم اسباب توتر العجول .. النفسية السودة تنتقل بسهولة من الانسان الى الحيوان وتسبب التوتر
