مجرد كلام

10/11/2025

رد الفعل علي الضغط الفوق مستطاع هو دوما مستحق مهما كانت مبررات الضغط

01/04/2021

مرارة الفقدان أسوأ و أكبر بكثير من أن يتم إحتوائها بأي شكل
صدقني يا صديقي .. مجرد أن تفقد أحدا تحبه تجد نفسك محاصراً أينما ذهبت بكل ذكري طيبة معه
كلما هممت بفعل شئّ تجد صوب عينيك شريط طويل من الذكريات معه حتي في صلاتك و صيامك تجد أن هناك موقفاً جمعك به .

10/12/2016

10/12/2016

10/12/2016

إنك تبقي بتهتم بتفاصيل حد بتحبه ده مش مجهود ولا هو مرهق بسبب إنك بتعمل ده و إنت حاسس بتركيبة مختلفة من الحب ، الأمل ، العشم ، الرضا ، الفرحة ، الخوف من إنك تقول ببساطة "بحبك" عشان اللي بتحبه ميبعدش عنك لو طلع مش بيبادلك نفس الشعور ..
الأخيرة دي لوحدها كفيلة بإن ليلك يبقي نهارك و أيامك مبتعرفهاش من بعضها .. مانتاش عارف اللي بتحبه ده أصلا واخد باله من اهتمامك بيه .. حاسس بيك ولا مش معاك أصلا ..
إحساس إن ممكن في لحظة كل أحلامك تتحول لمجرد وهم كنت عايشه لوحدك .
إحساس إن حياتك اللي قعدت تتخيل فيها مع الشخص ده اتهدت خلاص بين كلمة اه او لا .
خوفك انك تترفض بسبب ضعف إمكانياتك .. جسمك وشكلك .. او اي اسباب تانية .
بس رغم كل الخوف ده .. مبتقدرش تمنع نفسك من إنك تحفظ كل تفاصيله و تهتم بكل حرف بينطقه و تدور علي كل حاجة تفرحه .. و تقرر انك تتغير علشان ربنا يرضي عليك و يتم نعمته عليك زي ما انعم عليك انه بعتلك الحد ده و كمان تبقي حد يليق باللي قلبك اختاره و دق ليه . .
حياة تانية بدوشتها جوة عقلك اللي بيصفي علشان يركز رغم كل ده في لحظة ما تشوفه قدامك .
فاللمحبة فنون .. يتقنها كل عاشق مجنون .

من رواية تحت الإنشاء .. هواجس .

26/09/2016

أمن و أمل .. حب و حياة .. كانوا حقوق .. بقوا احلام .. بقوا خيال .. بقوا مستحيل .. بقي مجرد ذكرهم رفاهية .

يا شعب نام سنين مقهور .. يا شاب مات .. لا ده اتقتل .. مبقتش فارقة الموت زي الحياة .. مادمت هنا عايش وسط الزبانية .

في وطن غدار ملهش أمان .. خاين .. خوان .. تعيس و جعان .. غاوي يدوس كل النفوس .. عايش علي دم الغلابة .. و ديانته الأنانية .

ويوم ما تشوف حراميها يصبح حاميها .. تقول يا بعاد .. تلقي الحدود صبحوا بُعاد .. تلقي القساوة بتنفرض .. اسما ضريبة .. فعلا .. اتاوة و بلطجة .

كام شاب مات .. كام طفل من خوفهم علي مستقبله كان التمن انه من شباك يترمي .. كام يتيم .. كام قتيل .. كام حزين .. كام ام قلبها من قهره انكوي .

يكونش ده تمن السكوت .. مات اللي سكت .. و اللي نطق قتله السكات ! .

حتي الحيطان هجروا البيوت .. حتي الضمير غلبه السُبات !

ثم المراكب تتملي .. ثم الارامل تكتوي .. ثم اللي حاولوا يخرجوا .. بقوا للسمك و جبة عشا .. و اللي هجرهم السمك .. بيهم السجون بتتملي .

يا طول البعد يا محزن قلوب و قلوب .. يا ليل بالعمر بيقصر بطوله العمر ..
ياقلب انكسر و هو مالهش ذنوب .. بشكي همومي انا للي بايده الأمر .

صوتي ملهش صوت .. حزني نصابه تم .
بيك بستجير .. فيك بحتمي .. بدعي بحرقة .. و ليك بشتكي .

بدعي و انا مقهور و بملو الفم .. يارب فك الكربة و زيح الغم .

يارب امحي الخوف .. و نور قلوبنا بالامل .. و رجع الضنا المسروق لحضن الأم .

#يارب

16/09/2016

و ان كان علي اللوم و الزعل .. ولا التعب و لا القلب اللي انفعل ..
لحظة غضب .. كسرة نفوس .. حسرة و الم .. قسوة حظوظ ..
هتضيفوا ايه بعد الوجع .. مفاضلش حاجة تنكسر .. و لا عادش حاجة تتعمل .
حسوا بوجعنا و افهموا .. انه الداين مسيره يوم هيندين .. هيشيل فوق الكسر .. كسور .. و نفسه من الخوف ينقطع و روحه من الوجع تتحرق .. حس و جرب .. شوف لما بينخطف الامل .. اقعد وفرتك دماغك من التفكير في سؤال مالوش ابدا اجابة .. ؟!

16/09/2016

في ناس .. و ناس .
و ناس تكره ضحكتك .. و ناس في عينيها كل #السلام .
و ناس تشدك توقعك .. و ناس تخليك دايما #قدام .
و ناس عشان مصالحها ما بتفرق بين #حلال و #حرام !

04/09/2016

و أتاري الضحكة ولو تمثيل ..
بتشيل من حزني .. القليل ..
بتطيب شيئ من خاطري .. و تخلي الروح تبدأ ترتاح .

31/07/2016

علي كلٍ .. كفاية دموع ..
يا غاوي فراق .. يا ناوي رجوع ؟
حدد خطواتك من بدري .. من قبل ما قلبك يندهلي ..
من قبل ما اقول إني بحبك .. أو صورتك في خيالي تلاحقني ..
عشان للعلم .. أنا موجوع .. أنا جرحي ملهش علاج ..
فلو قاصد تكون قاسي .. علي راسي .. لكنني مش هكون ضحية .. ولا حتي هعيش مخدوع ..
ف وفر علي عقلك تعبه و تدبيره .. و ادي لقلبك براحه و تفكيره ..
من الآخر أنا الكاتب ..
و أنا الراوي ..
و أنا الأبطال ..
و ..
و قلبي دايما تذكرته .. ذهاب .. و مفيش أبدا بعدها #رجوع !