07/03/2022
最近有朋友話俾我知，我哋呢一個page又再次得到關注，真係受寵若驚，多謝各位網友，多謝支持。
大約兩年多前，我哋幾個朋友因為社會運動加上疫情關係，大家嘅工作同事業上都有好大嘅轉變，有一位朋友嘅公司結業，另一位朋友公司裁員，當時大家都好徬徨，其中一位提出，不如我哋幾個自己拎啲積蓄出嚟創業，建立一個網店，做一啲批發零售小生意，尋求新嘅出路，由嗰一刻開始，就出現咗呢個平台。
啱啱開始嘅時候，點樣建立個網站，點樣建立社交平台，點樣可以吸引多啲人關注我哋，我哋幾個女人仔，真係乜都唔識，哈哈，不過好好彩，大家身邊都有一啲好好嘅朋友，俾咗好多意見我哋，亦介紹咗好多人脈俾我哋，甚至搵到有投資者肯支持我哋呢一個小小嘅生意，我哋都覺得，如果想盡快可以得到大家嘅關注，搵一啲大家都認識嘅明星名人去拍片介紹產品，可能會係一個幾好嘅方法。
我哋透過其中一位好朋友嘅人脈網絡，聯繫到好多明星名人與及佢嘅經理人，亦都因為咁，每當我哋有一啲新產品嘅時候，都會搵唔同嘅artist或者celebrity去幫忙拍片宣傳做推廣。
而我哋個Facebook 同IG，亦由零起步，慢慢開始活躍，慢慢開始多人留意，慢慢開始有人查詢，我哋覺得，只要我哋肯繼續努力，一定會有好嘅成績。
但係過咗好幾個月，每逢有新片推出嘅時候，就會出現好多不友善嘅網民留言，惡意攻擊同中傷，甚至因為佢哋嘅舉報，令到我哋嘅社交平台同網站，都唔能夠正常運作，而有部份想查詢我哋產品嘅客戶，亦受到無謂嘅騷擾同網絡欺凌，在此，要向曾經受到影響同滋擾嘅客戶講聲抱歉，令佢哋無辜地受到牽連，對唔住，但係亦要好感謝你哋，喺咁嘅情況之下，仍然支持我哋，願意購買我哋嘅產品，衷心多謝。
可能有部份網民覺得，我哋曾經搵某一個電視台旗下嘅藝人去拍攝宣傳片，係一件好唔應該嘅事，而我哋一定係屬於某一個顏色同政治光譜嘅。其實我哋幾個合夥人從來都冇任何政治取向，亦冇任何顏色之分，我哋決定搵任何一位去拍片介紹我哋嘅產品之前，我哋只會考慮佢哋嘅形象同性格配合唔配合，我哋可以付出嘅budget又配唔配合到佢哋嘅經理人，而更重要嘅係，佢哋每一個都係真實用家，都係試過我哋嘅產品，覺得OK，先至會接拍！所以我哋唔會因為佢係喺某一個傳媒機構工作，又或者佢係乜嘢背景，而影響到大家嘅合作關係。
有一件事，係好感恩同好開心嘅，所有曾經同我哋合作過嘅明星名人，佢哋都知道我哋都係做小生意，唔會有太多資金做宣傳推廣，但係佢哋都冇介意，好樂意幫助，而喺拍攝過程入面，佢哋全部都係非常專業，好nice，好好人，喺度，要再一次多謝佢哋每一位，thank you for very much
過去呢段日子，做任何嘅生意都係非常困難，當然包括我哋呢個小小嘅網店，不過我哋仍然好努力，雖然中途出現過好多次呢類惡意嘅網絡攻擊，令到我哋每一步都行得唔容易，但係我哋冇放棄，我哋亦冇唔開心，我哋只好默默做好我哋嘅工作，喺上年年中嘅時候，我哋更加計劃，希望2022年可以開一間實體店，我哋真係連舖頭都有去睇過，哈哈，不過計劃永遠趕唔上變化，過咗兩三個月，大約九月左右，我哋其中一位朋友因為身體健康問題，唔可以再繼續參與，另一位朋友因為一家人決定要移民，亦唔能夠再繼續協助營運，所以我哋決定，暫時結束呢一個網店嘅運作，亦正正式式為我哋呢盤小生意，畫上一個句號。
好想同曾經俾過我哋嬲嬲豬同寫過一啲唔友善留言嘅網友講聲，我哋唔係因為得到呢類專頁或者群組嘅特別關注與及佢哋followers嘅群起攻擊同欺凌而選擇結束我哋呢個網店平台，所以唔需要RIP或者RAP，每一次我哋回覆「多謝支持」，係因為我哋非常尊重你哋嘅意見，我哋幾個都係土生土長嘅香港人，我哋都係非常鍾意香港，熱愛香港，所以我哋好明白你哋嘅出發點同用意，而我哋喺過去兩年仍然可以繼續營運，可能係我哋好彩，但係其實有好多被你哋去侵略嘅公司或者品牌，未必係咁好彩，如果因為呢啲行為而影響到嗰啲公司嘅運作，影響到佢哋嘅客戶，令到佢哋嘅生意唔好，甚至出現裁員或者結業，可能當中都會影響唔少人嘅生計，當中可能有啲人係屋企入面嘅經濟支柱，揹住一家大細，而呢啲受影響嘅人，亦有機會係你嘅屋企人，又或者係你嘅好朋友。
好明白大家都想追求自己嘅理念，甚至用一啲方法或者行為行動去說服其他人接受你嗰一套嘅想法，但係追求一個民主、自由、和諧嘅社會，係唔係一定要用呢一類非黑即白，任何事情都要上綱上線，你唔認同我，我鬧爆你，你做啲嘢唔合我心意，我攻擊你，其實，大家真係要咁嘅咩？
經歷咗過去咁多年嘅政治風波同社會事件，以上嗰幾段說話，其實唔係淨係同某一個政治光譜同顏色嘅人講，而係同雙方最極端，最偏激，最唔理性嘅人講。
香港，唔應該係咁；香港人，更加唔應該係咁。
最後，送上一段電視劇《天與地》入面我同幾個朋友都好喜歡嘅一段說話：
「和諧唔係一百個人講同一番說話，和諧係一百個人有一百句唔同說話之餘，又互相尊重。」
希望好快大家可以互相尊重，希望好快可以見返一個和諧嘅香港。
再一次多謝曾經係我哋呢度買過嘢嘅所有顧客，容許我哋講多最後一次：
「多謝支持！」
