15/06/2026
細個讀書，阿Sir成日教「家有一老，如有一寶」。我一直以為呢句說話係講緊老人家啲人生大道理好寶貴。直到最近我睇到鼎爺同豪仔，我先如夢初醒：原來個「寶」，係講緊真金白銀會生金蛋嗰個「寶」。
呢個世界有時真係好荒謬。以前鼎爺喺大台捱更抵夜，做阿公做大佬，甚至之前憑飲食節目上過一個事業巔峰，之後經歷創傷，高低起跌。我估鼎爺到今時今日先真正明白，原來呢個年代搵錢，根本唔使下下對住部幾百萬嘅攝影機同幾十個 Crew。
你有知名度，哪怕冇出路？只要肯坐低講幾句，大把渠道吸金。
你睇下豪仔重啟嗰個 YouTube 頻道「豪仔 ON AIR」，搞咗唔夠一個月，訂閱人數已經光速衝破10萬大關。開咗營利模式之後，短短15日淨係出咗5條片，就已經狂吸150萬次觀看次數。d "專家"篤過機保守估計，豪仔半個月已經有大約6萬蚊進帳。如果佢夠勤力維持一星期出三條片，一年單靠點擊嘅被動收入已經高達144萬；遲啲接埋 Sponsor 同商演，年薪隨時過200萬。呢筆錢，絕對有足夠財力包辦鼎爺嘅日常開支，畀佢安享晚年。
依家嘅鼎爺胃口同心情都非常好，直頭係狀態大勇。短短7日入面，佢已經橫掃三大媒體平台，做《東周刊》封面專訪人物、上 TVB 娛樂新聞，仲助陣埋豪仔個 YouTube。你以為佢拍咩超級大製作？錯喇。影片入面，佢只係同豪仔落九龍城食碗叉燒米線同燒鵝。食得開胃之餘，大方分享下啲舊時軼事，例如90年代劉德華同朋友喺九龍城開髮型屋嘅歷史趣聞，已經生動有趣到極。
就係咁簡單。豪仔個頻道主打低成本製作，多數只係簡單記錄兩父子食飯、傾偈或者日常交流，冇過度包裝，連標題都簡單直接，但偏偏成為咗最強嘅流量密碼。無他嘅，因為鼎爺講故事技巧極具魅力，口才清晰動聽，加上佢深厚嘅廚藝功底同人生經驗，淨係聽佢分享已經好有吸引力。
所以話，鼎爺，既然你人生經歷過咁多高山低谷，有咁多江湖傳聞、片場舊史，不如有幾盡拍幾盡啦。每日開住部機，分享下生活日常，鬧下個仔，講下以前邊個明星點點點。趁住個勢，幫自己整多個事業高峰。反正香港人最鍾意食花生聽故仔，你呢嚿「寶」，我哋大把人爭住買單。
