15/03/2023
📘ഇഷാംബരം
👤അരുൺ ആർ
📝റിവ്യൂ:നവ്യ ജോസഫ്
മണം.. കെട്ടമണം..
അല്ല നാറ്റമാണ് മനുഷ്യമലത്തിന്റെ നാറ്റം..
മാൻഹോളിൽ മുങ്ങി നിവർന്നപോൽ നാറുന്നു, അറയ്ക്കുന്നു.. വർത്തമാനകാല ഇന്ത്യയിലെ ദരിദ്രജീവിതങ്ങളെ അങ്ങനെ വിശേഷിപ്പിക്കാനേ കഴിയുന്നൊളൂ..
എത്ര തേച്ചുരച്ചു കുളിച്ചാലും വേരാഴ്ന്നു നിൽക്കുന്ന ജാതിതിരിവിന്റെ, കുലത്തൊഴിലിന്റെ, വിളിപ്പേരുകളുടെ, അപഹാസ്യങ്ങളുടെ, ആട്ടിയോടിക്കലുകളുടെ ഇന്ത്യൻ മനോഭാവങ്ങൾക്ക് അസഹ്യമായ നാറ്റമാണ്..
ഒട്ടിയവയറടക്കാൻ നാടും സ്വന്തവും വിട്ട് രാജ്യത്തിന്റെ പലദിശകളിൽ കുടിയേറിയവർ കഴിഞ്ഞ മഹാവ്യാധിക്കാലത്ത് നടത്തിയ പാലായനത്തിന്റെ നേർരേഖകൂടിയാണ് ഇഷാംബരം..
എത്ര തേച്ചാലും മിനുങ്ങാത്ത കുലത്തിന്റെ പേരിൽ വിദ്യാഭ്യാസം നിഷേധിക്കപ്പെട്ട, തീട്ടം തിന്നുന്നവന്റെ മകൾ / സഹോദരി എന്ന ആളുകൾ കാർക്കിച്ചു തുപ്പുന്ന, മുഖം തിരിക്കുന്ന ലേബലിൽ ജീവിക്കേണ്ടി വന്ന, തന്നെ സ്നേഹിക്കാൻ, തനിക്ക് സ്നേഹിക്കാൻ ഒരാൾ ജീവിതത്തിലേക്ക് കടന്നു വന്നിരിക്കുന്നു എന്ന പ്രതീക്ഷയിൽ കയറിചെന്ന വീട്ടിൽ അയാളുടെ ക്രൂരലൈംഗീകഅതിക്രമങ്ങൾക്ക് ഇരയാക്കപ്പെടേണ്ടി വന്ന ഒരു ' സ്ത്രീ '..
വർത്തമാനകാല ഇന്ത്യയിൽ സ്ത്രീ എന്ന പദത്തിന് എന്ത് പ്രാധാന്യമാണ് / നിർവചനമാണ് ഉള്ളത് ?
പുരുഷന്റെ ലൈംഗീകവൈകൃതങ്ങൾക്ക് എല്ലുപൊടിയേണ്ടി വരുന്നവൾ, കീഴ്പ്പെടുത്തൽ ആണത്തമാണെന്ന് കരുത്തുന്ന / കവലകളിലെ ആൺകൂട്ടങ്ങളുടെ ഇക്കിളികഥകൾക്ക് പാത്രമാവേണ്ടവൾ, രക്തബന്ധങ്ങളിൽ പോലും സുരക്ഷിതത്വത്തിന് അർഹതയില്ലാത്ത ആവശ്യം കഴിഞ്ഞാൽ മനുഷ്യമലം പോലെ തന്നെ വിസർജ്യത്തോളം മാത്രം വിലമതിക്കുന്ന ഒന്ന്..
കോവിഡ് അടച്ചുപൂട്ടൽ കാലത്ത് രാജ്യത്തിന്റെ തെരുവുകൾ അഭിമുഖീകരിച്ച വിശപ്പിന്റെയും, പാലായനത്തിന്റെയും ദയനീയ മുഖങ്ങൾ എഴുത്തുക്കാരൻ വിവരിക്കുമ്പോൾ അക്കാലത് നമ്മൾ നേരിട്ട ദുരിതങ്ങളും പട്ടിണി പോലും പ്രിവിലേജ്ഡ് ആയിരുന്നുവെന്നുകൂടി തിരിച്ചറിയപ്പെടുന്നു..
ഓരോ അദ്ധ്യായം വായിച്ചു താളുകൾ മറിക്കുന്തോറും വായനക്കാരൻ യാഥാർഥ്യങ്ങളുടെ മലംക്കുഴിയിൽ കൂടുതൽ കൂടുതൽ ആഴത്തിൽ മുങ്ങിതാഴും, നാറും..
ധാരാവിയിലെ തോട്ടികൾക്കിടയിൽ അവർക്കൊപ്പം ജീവിക്കും.. ജീവിതം തൊണ്ടയിൽ പശപോലെ ഒട്ടും, തികട്ടും, ഛർദ്ദിക്കും..
'ദരിദ്രർ ചെയ്യുന്ന ഏറ്റവും വലിയ പാപം കുഞ്ഞുങ്ങളെ ജനിപ്പിക്കുക എന്നതാണ്, വിശപ്പ് ഒരു അവയവമായിരുന്നെങ്കിൽ പൊക്കിൾകൊടി അറുത്തുമാറ്റും മുൻപ് അവ മുറിച്ചുമാറ്റാമായിരുന്നു' എന്ന് ഇഷാനി വേദനിക്കുമ്പോൾ വായനക്കാരന്റെ അടിവയറ്റിൽ ഉടലെടുത്തിരിക്കുന്ന അഗ്നിയുടെ എരിതീയിലെ എണ്ണയാവാൻ എഴുത്തുകാരന് കഴിയുന്നുണ്ട്..
ഇഷാനി - ജനിക്കും മുൻപേ തന്റേതല്ലാത്ത കാരണത്താൽ കുലത്തിന്റെ പേരിൽ താഴ്ത്തപ്പെട്ട, ജനനശേഷം ലിംഗത്തിന്റെ പേരിൽ തഴയപ്പെട്ട, തെരുവിൽ ജീവിതത്തോട് പൊരുതി, ഓരോ പ്രതിസന്ധിയേയും ഗതികേടിനേയും പ്രതീക്ഷയോടെ അതിജീവിച്ചു മുന്നേറിയ ഒരു സ്ത്രീ മാത്രമല്ല വർത്തമാനകാല ഭാരതത്തിലെ അനേകായിരം സ്ത്രീകളുടെ, അവർണ്ണരുടെ, അനാഥരുടെ മുഖമാണ് ഇഷാനിയുടേത്..
ഇഷാനിയുടെ ജീവിതരേഖ ഇന്ത്യയുടേതും കൂടിയാണ്..
📚TRUE SELLER BOOKS📚
🎊Review Context🎊🎁🎉
Books Review join 👇
https://chat.whatsapp.com/KQkl4XDkIjKLFyQm2NHhVk
Buy Books👇https://truesellerbooks.in
