06/03/2026
ហេតុអ្វីបានជា "ភ្លៀងកក់ខែ🌨" ធ្វើឱ្យខូចផ្កា និងក្ដឹប?
នៅពេលមានភ្លៀងធ្លាក់ ក្នុងរដូវផ្កាស្វាយចន្ទីរីក ឬលោតក្ដឹប វាបង្កផលប៉ះពាល់ជាច្រើន៖
1.មេរោគផ្សិតយាយី (Anthracnose)៖ សំណើមខ្ពស់ក្រោយភ្លៀង ជាលក្ខខណ្ឌ សម្រាប់ផ្សិតអុជខ្មៅរីកដុះដាល។ វានឹងធ្វើឱ្យទងផ្កាស្អុយ និងក្ដឹបប្រែជាពណ៌ត្នោត រួចស្វិតក្រៀម។
2.ជាតិអាស៊ីត និងធូលីដី៖ ភ្លៀងកក់ខែដំបូងៗច្រើនតែនាំមកនូវជាតិអាស៊ីត និងមេរោគ ដែលធ្វើឱ្យរលាកស្រទាប់ផ្កាខ្ចីៗ។
3.រំខានការបង្កកំណើត៖ ទឹកភ្លៀងអាចលាងជម្រះលម្អងផ្កា ចេញពីផ្កាឈ្មោល និងញី ធ្វើឱ្យផ្កាចន្ទីមិនអាចបង្កកំណើតក្លាយជាក្ដឹបបាន។
4.ការកើនឡើងសត្វល្អិត៖ ក្រោយភ្លៀង សត្វល្អិតដូចជា ស្រមើល មូសតែ និងដង្កូវ ច្រើនតែលេចមុខមកបំផ្លាញត្រួយ និងកញ្ចុំផ្កាកាន់តែខ្លាំង។
🛡 . វិធានការការពារ និងសង្គ្រោះបន្ទាន់
ប្រសិនបើមានភ្លៀងធ្លាក់មក លោកអ្នកត្រូវចាត់វិធានការ "បាញ់លាង និងបំប៉ន" ឱ្យបានលឿនបំផុត (ក្នុងរយៈពេល ២៤ ម៉ោង)៖
ក. ការកម្ចាត់ និងការពារជំងឺផ្សិត 🧪
ត្រូវប្រើថ្នាំផ្សិតប្រភេទព្យាបាល និងការពារភ្លាមៗ៖
សារធាតុ Propinep ឬ Prochloraz ឬ Pyraclostrobin ឬ Azoxystrobin + Difenoconazole៖ ដើម្បីផ្ដាច់មេរោគផ្សិតអុជខ្មៅ និងការពារកុំឱ្យរាលដាលដល់កញ្ចុំផ្កាផ្សេងទៀត។
សារធាតុ Mancozeb៖ សម្រាប់បាញ់ស្រោបការពារពីខាងក្រៅ។
ខ. ការពង្រឹងកោសិកាទង និងផ្កា 💎
ក្រោយភ្លៀង រុក្ខជាតិជួបវិបត្តិ (Stress) ដូច្នេះត្រូវបន្ថែមអាហារបំប៉ន៖
Ca + Boron ៖ ជួយឱ្យទងក្ដឹបស្អិតជាប់មាំ និងការពារការជម្រុះ។
Atonic ឬ Amino Acids៖ ជួយផ្ដល់ថាមពលភ្លាមៗ ដើម្បីឱ្យផ្កា និងក្ដឹបមានកម្លាំងលូតលាស់ឡើងវិញ។
គ. ការគ្រប់គ្រងសត្វល្អិត 🐛
លាយថ្នាំកម្ចាត់សត្វល្អិតដូចជា Spinosad ឬ Spinetoram ឬ Imidaclopride, Buprofezin, Acephate , Acetamiprid...ដើម្បីការពារកុំឱ្យស្រមើល ឬចៃសមកស៊ីបំផ្លាញក្ដឹបដែលនៅសេសសល់។ ថ្នាំដង្កូវដូចជា Fipronil, Chlorantraniliprol, Emamectin Benzoate, Chlorfenapyr, Flubendiamide,...។
