Chandie ក្លិនសៀវភៅ

28/09/2026

យើងចេះតែមិនព្រមទទួលយកនូវអ្វីដែលខ្លួនមាន។ ក្ដីស្រមៃហាក់ចេះតែមិនទាន់មកដល់។ យើងឆ្ងល់ថា ហេតុអ្វីក៏ត្រូវចួបស្ថានភាពបែបនេះ? ហេតុអ្វីក៏ស្គាល់មនុស្សប្រភេទនេះ? ហេតុអ្វីក៏មានគ្រួសារដូច្នេះ? ប៉ុន្តែក្នុងពេលមួយដែលឆាកជីវិតធ្លាក់ដល់បាត យើងបែរជារកឃើញថា យើងគ្មានការព្រួយបារម្ភអ្វីទៀតឡើយ ព្រោះវាធ្លាក់បែបនេះទៅហើយ វាគ្មានកន្លែងធ្លាក់បន្តទៀតទេ ហើយពេលនោះយើងបែរជាយល់ពីសំណាងកន្លងមក យល់ពីតម្លៃនូវអ្វីៗដែលយើងធ្លាប់មាន។

បើគង់តែរស់នៅដដែល ហេតុអ្វីមិនព្រមរស់នៅដោយមានក្ដីសុខនៅក្នុងពេលនេះតែម្ដងទៅ? យើងត្រូវរៀនទទួលយកស្ថានភាពនីមួយៗ។ វាមិនមែនអាក្រក់ដូចដែលយើងគិតទេ តែវាកំពុងតែបង្កើតនូវទំព័រជីវិតថ្មី។ ទាល់តែយើងព្រមទទួលយកស្ថានភាពខ្លួនឯងនៅក្នុងពេលនេះ ទើបយើងអាចឈានទៅកាន់ស្ថានភាពថ្មីមួយ ដែលល្អប្រសើរជាងនេះបាន។

[•••] ដកស្រង់ពីសៀវភៅ #លម្អងដួងចិត្ត - Sok Chanphal

27/09/2026

27/09/2026

គ្មាន​នរណា​ម្នាក់​ស្លាប់​ដោយសារតែ​ការ​ប្រឹងប្រែង​ទេ តែ​អ្នក​ដែល​មិន​ប្រឹងប្រែង​ទៅវិញ​ទេ​ដែល​ស្លាប់។ កាន់តែ​ប្រឹង កាន់តែ​មានសំណាង​ល្អ​
#ឡាំលីម

25/09/2026

ជីវិតជាជម្រើស តែកុំជ្រើសរើសបំផ្លាញជីវិតខ្លួនឯងចោលដោយសារតែក្ដីឈឺចាប់
#កូនចាបមាស

22/09/2026

មិនមែនគ្រប់សំណួរសុទ្ធតែទទួលបានចម្លើយទេ ព្រោះចម្លើយខ្លះវាពិតជាមានតម្លៃពិតប្រាកដរបស់វា ដោយឆ្លងកាត់ពេលវេលា ក្ដីស្រលាញ់ ការគោរព ការយល់ចិត្ត…ហើយក៏មិនអាចឆ្លើយតបទៅនឹងសំណួរដែលគ្មានសីលធម៌ឡើយ។ សូមរក្សាភាពថ្លៃថ្នូររបស់ខ្លួន ហើយស្គាល់ពីព្រំដែនឯកជនភាពរបស់អ្នកដទៃ!🌿🍀😊🙂
#កូនចាបមាស

21/09/2026

#ជ្រើសរើសធ្វើជាខ្លួនឯង

ជីវិតដែលរស់នៅដើម្បីតែផ្គាប់ចិត្តគេ បារម្ភខ្លាចថាគេមិនពេញចិត្តចំពោះយើង គេបោះបង់ចោលយើង គេប្រែប្រួលចិត្តពីយើង វាជារឿងហត់នឿយដែលយើងមិនគួរបន្តវាទេ។ ហេតុអ្វីក៏យើងចេះតែបណ្ដែតបណ្ដោយឱ្យជីវិតនេះស្ពឹកស្រពន់ខ្លាំងម្ល៉េះ។ វត្តមានរបស់មនុស្សខ្លះក្នុងជីវិតយើងបានក្លាយជាចំណែកដែលធ្វើឱ្យក្ដីសុបិនរបស់យើងក្លាយជាការពិត។ ប៉ុន្តែវត្តមានអ្នកខ្លះទៀត បែរជាធ្វើឱ្យយើងលែងហ៊ានសូម្បីតែបន្តក្ដីសុបិនរបស់ខ្លួនឯង។ សេចក្ដីស្រឡាញ់ដែលធ្វើឱ្យផ្លូវចិត្តពុំមានសុវត្ថិភាពបែបនេះ តើយើងគួរតែបន្តវាឬទេ? ចូរជ្រើសរើសធ្វើរឿងដែលយើងអាចរីករាយជាមួយវាចេញពីចិត្ត ហើយដែលសំខាន់ជាងនេះវាជារឿងត្រឹមត្រូវ ប៉ុន្តែរឿងត្រឹមត្រូវខ្លះក៏ពុំមែនជារឿងរីករាយទេសម្រាប់យើង។ ដូច្នេះនៅពេលមួយយើងខ្លួនឯងនឹងក្លាយជាមនុស្សដែលចេះជ្រើសរើស ថាតើត្រូវធ្វើរឿងដែលត្រឹមត្រូវមុន ឬរឿងដែលធ្វើឱ្យយើងរីករាយមុន? ព្រោះមិនមែនគ្រប់ពេលយើងអាចជ្រើសរើសយករឿងទាំងពីរក្នុងពេលតែមួយនោះទេ។

កុំជ្រើសរើសធ្វើរឿងមួយដើម្បីនរណា ប៉ុន្តែចូរធ្វើវាដើម្បីខ្លួនឯង ដ្បិតថាអ្នកគ្រប់គ្នាអាចនឹងចាកចេញពីយើង ប៉ុន្តែយើងនឹងនៅទីនេះជាមួយខ្លួនឯង។ ជម្រើសរបស់យើងគឺជាទំនួលខុសត្រូវរបស់យើង ហើយយើងក៏មិនអាចជ្រើសរើសអ្វីមួយដើម្បីអ្នកដទៃដូចគ្នា ព្រោះជីវិតរបស់ពួកគេជាជម្រើសរបស់ពួកគេ។ កុំប្រើជីវិតផ្ទាល់ខ្លួនរស់នៅដើម្បីតែបំពេញចិត្តនរណាម្នាក់ឱ្យសោះ ព្រោះពេលដែលយើងហត់នឿយនឹងការប្រើជីវិតបែបនោះ យើងក៏ស្ទើរតែលែងមានកម្លាំងដើម្បីបន្តការរស់នៅសម្រាប់ខ្លួនឯងទៀតដែរ។ ជីវិតនេះយើងអាចត្រូវអ្នកដទៃមិនឱ្យតម្លៃ ប៉ុន្តែយើងត្រូវដឹងថាយើងមានតម្លៃដើម្បីបន្តរស់នៅតទៅទៀត។

មនុស្សជាច្រើនបានក្លាយជាចំណែកនៅក្នុងជីវិតយើង វាខុសគ្នាត្រង់ថាអ្នកខ្លះជាចំណែកក្នុងអតីតកាលរបស់យើង អ្នកខ្លះទៀតជាចំណែកនាពេលបច្ចុប្បន្ននេះ ឯអ្នកខ្លះទៀតក្លាយជាចំណែកក្នុងពេលអនាគត ប៉ុន្តែយើងគឺជាចំណែកនៃពេញមួយជីវិតរបស់ខ្លួនឯង។ បើយើងព្រងើយកន្តើយចំពោះខ្លួនឯង ដូច្នេះក៏គ្មាននរណានឹងយកចិត្តទុកដាក់ចំពោះយើងទេ។ បើយើងស្អប់ខ្លួនឯង យើងក៏មិនអាចរំពឹងរកអ្នកណាដែលមកស្រឡាញ់យើងដូចគ្នា។ ប្រសិនបើយើងមិនអាចធ្វើឱ្យខ្លួនឯងរីករាយ យើងក៏ប្រហែលជារកមនុស្សដែលផ្ដល់ភាពរីករាយមកឱ្យយើងមិនបានដែរ។ ចូរជ្រើសរើសធ្វើជាខ្លួនឯង មុនពេលយើងធ្វើដើម្បីនរណាម្នាក់៕

----------------------------------------------------

អត្ថបទ៖ #កូនចាបមាស

រូបភាព៖

20/09/2026

#បើស្រឡាញ់!

បើស្រឡាញ់នរណាម្នាក់ សូមអនុញ្ញាតឱ្យគេអាចរស់នៅក្នុងជីវិតដែលជាជម្រើសរបស់គេចុះ។ នៅពេលយើងដេញចាប់សេចក្ដីស្រឡាញ់ វានឹងរត់ចេញឆ្ងាយពីយើង។ នៅពេលយើងតក់ក្រហល់ចង់បានសេចក្ដីស្រឡាញ់ពីនរណាម្នាក់ គឺពេលនោះឯងដែលយើងនៅមិនសុខ យើងឈឺចាប់ ហើយការឈឺចាប់ និងភាពអន្ទះអន្ទែងរបស់យើងគឺយើងខ្លួនឯងជាអ្នកបង្កើតឡើង។

វាមិនចំណាយពេលយូរទេក្នុងការស្រឡាញ់នរណាម្នាក់ ប៉ុន្តែទម្រាំតែយើងអាចជួបមនុស្សដែលយើងស្រឡាញ់ ហើយគេក៏ស្រឡាញ់យើងវិញ វាមិនមែនជារឿងងាយឡើយ។ រឿងមួយដែលកាន់តែលំបាកនោះគឺការចង់បំភ្លេចនរណាម្នាក់ចេញពីជីវិតយើង។ យើងអាចប្រើពេលតែប៉ុន្មាននាទីប៉ុណ្ណោះក្នុងការចាប់ផ្ដើមបង្កើតក្ដីស្រឡាញ់ ប៉ុន្តែវាស្ទើរតែត្រូវប្រើពេលពាក់កណ្ដាលជីវិតដើម្បីចាកចេញពីស្រមោលនៃអនុស្សាវរីយជាច្រើន...។

-----------------------------------------------

អត្ថបទ៖ #កូនចាបមាស

18/09/2026

មាតិកាប្រកបដោយសេចក្ដីថ្លៃថ្នូរ ❤️ ទាំងពិធីករ ទាំងយាយ និងចៅ 📚
Bo Phaktra

18/09/2026

#បើមិនចង់ហត់ចិត្ត

ថ្ងៃណាមួយយើងនឹងហត់ ខកចិត្ត ហើយក៏កើតទុក្ខមិនតិចទេ នៅពេលដែលយើងរំពឹងថាគេនឹងមើលឃើញរឿងល្អដែលយើងធ្វើ។ ធ្វើល្អដោយសារតែយើងយល់់ពីសេចក្ដីល្អដោយខ្លួនឯង កុំធ្វើព្រោះតែរំពឹងថាគេនឹងយល់ពីសេចក្ដីល្អរបស់យើង។ ទង្វើល្អមិនមែនធ្វើដើម្បីបង្អួតគេទេ ព្រោះបើត្រឹមតែបង្អួត វានឹងក្លាយជារឿងបង្អាប់ចំពោះយើងវិញនៅពេលណាមួយ។ ពេលធ្វើល្អ យើងសប្បាយចិត្តចំពោះទង្វើល្អនោះដោយខ្លួនឯង? ឬក៏យើងសប្បាយចិត្តនឹងឲ្យគេមើលមកថាខ្លួនយើងធ្វើហ្នឹងវាល្អហើយ? បើសប្បាយចិត្តនឹងទង្វើល្អខ្លួនឯង នោះគឺវាចប់ហើយ វាមិនមានរឿងត្រូវមកខកចិត្ត ខូចចិត្ត រឿងរំលឹក រឿងអ្វីទាំងអស់។

មានមនុស្សច្រើនណាស់ដែលមកត្អូញត្អែរថា "ឯងខំធ្វើល្អនឹងវាយូរណាស់មកហើយ តែវាមិនដែលមើលឃើញឯងល្អសោះ មិនដែលឲ្យតម្លៃឯងសោះ" ។ អ៊ីចឹងមានន័យថាអ្វីដែលធ្វើកន្លងមក វាមិនមែនជាសេចក្ដីល្អពិតប្រាកដទេឬ? ទង្វើល្អទាំងនោះ គ្រាន់តែធ្វើឡើងដើម្បីឲ្យគេតបស្នងខ្លួនវិញអ៊ីចឹងឬ? បើអ៊ីចឹងមែន មួយជីវិតនៃការកើតមកជាមនុស្សដែលធ្វើល្អដាក់គេដ៏ច្រើន នឹងក្លាយជារឿងខកចិត្តរហូតហើយ។ អ៊ីចឹងមិនដឹងថាកើតជាមនុស្សល្អត្រឹមតែឈ្មោះនេះ វាមានន័យអ្វីនោះទេ។ នៅក្នុងសង្គមឥឡូវហ្នឹង មានមនុស្សច្រើនណាស់ ដែលធ្វើល្អដើម្បីឲ្យគេថាខ្លួនឯងល្អ ដើម្បីឲ្យគេដឹងគុណ ឲ្យគេចងចាំ។ វាមិនមែនជាសេចក្ដីល្អពិតអ្វីសោះ។ ពីព្រោះសេចក្ដីល្អខ្លួនឯងផ្ទាល់ វាមិនដែលទាមទារថាត្រូវឲ្យមានអ្នកដឹង ទាមទារឲ្យមានអ្នកគាំទ្រ ទាមទារឲ្យមានអ្នកចងចាំអ្វីទាំងអស់ គឺវាដឹងថាពូជរបស់វានឹងផ្ដល់ផ្លែផ្កាយ៉ាងណារួចជាស្រេច។

ការជួយសង្គ្រោះពិតប្រាកដនឹងធ្វើឲ្យអ្នកជួយនៅតែសប្បាយចិត្តដដែល បើទោះបីជាអ្នកដែលត្រូវគេសង្គ្រោះនិយាយអរគុណ ឬក៏មិនបាននិយាយក៏ដោយ ពួកគេចងចាំពីគុណបំណាច់នេះ ឬអត់ក៏ដោយ។ ប៉ុន្តែផ្ទុយពីនេះស្រឡះ មានការជួយសង្គ្រោះខ្លះ ត្រូវប្រកាសឲ្យគេដឹងគុណខ្លួន និងចងចាំគុណបំណាច់ខ្លួនរាប់សិបឆ្នាំទៅវិញ។ វាមានដល់ថ្នាក់ដែលធ្វើល្អដើម្បីបានផ្លាកឈ្មោះបិទនៅលើក្លោងទ្វា តាមរបងទៀតក៏មានដែរ។ បច្ច័យដែលនាំឲ្យចិត្តបានរីករាយគឺ សេចក្ដីល្អដែលចិត្តមានស្រាប់ទៅហើយ វាមិនមែនជាការឆ្លើយតបពីអ្នកដែលទទួលបានសេចក្ដីល្អពីយើងទេ។ បើសេចក្ដីល្អមិនមែនជាដើមហេតុដំបូងដែលធ្វើឲ្យអ្នកផ្ដល់ឲ្យនោះសប្បាយចិត្តទេ ដូច្នេះវាមិនមែនជាសេចក្ដីល្អអ្វីទាំងអស់ វាគ្រាន់តែជាសំបកស្មោគគ្រោកដែលលាបពណ៌ស្អាតដើម្បីឲ្យគេច្រឡំប៉ុណ្ណោះ៕

_____________________________________

#កូនចាបមាស

25/08/2026

ដឹងតែមិនផុតពី គមរពាក់ទៀតហើយ😌🤣