12/07/2026
🥺 සමහර දවස් වලට මට දැනෙනවා බං මාව කොහේ හරි අතරමං වෙලා වගේ හැඟීමක්. මට දැන් 35ක්. මේ වෙනකොට අම්මා මාව දාලා ගිහින්. තාත්තා වයසට ගිහින්. මට නිතරම මගෙ පොඩි කාලේ මතක් වෙනවා...
ඒ කාලේ මේ අද කාලේ වගේ අපි ලෝකෙට නිරාවරණය වෙලා තිබුණේ නෑ. ඒ නිසාම ඒ කාලේ ඇහුන සද්ද, දැනුන රසවල්, සුවඳවල් විතරක් නෙවෙයි සමහර ගැහීම් පවා ඇට, ලේ වලට බද්දවෙලා තියෙනවා. මේ කතාව අසූ අනූ ගණන් වල ඉපදුන අය හොඳට දන්නවා ඇති.
ඒ කාලේ මහා ලොකු රේඩියෝ චැනල් ගොඩක් තිබුණේ නෑ. ගුවන් විදුලි සංස්ථාවේ තේමා වාදනය මතකද..? මට මතකයි. සිද්ධාලේප ඇඩ් එකේ වාදනය මතකද..? මට මතකයි. උදේම සීතලේ, මීදුම අතරින් ලාවට ඉර එළිය වැටෙනකොට රේඩියෝ එකේ නන්දා මාලිනියන්ගේ ජයමංගල ගාතා හඬ මැද්දේ අම්මා කුස්සියේ උයනවා මතකද..? මට මතකයි.
ඉස්සර පැය 24 ම ටීවි එක තිබ්බේ නෑ. හවස් වරුවේ තමයි විකාෂය ආරම්භ කළේ. " සමනොල සිරිපා පියුම දොවාගෙන, සීත ගඟුල් රට වට යනවා " සින්දුවෙන් ස්වාධීන රූපවාහිනිය වැඩ පටන් ගන්නකොට, " නෑදෑයෝ අපි නෑදෑයෝ, ලංකා පවුලේ නෑදෑයෝ " කියලා ජාතික රූපවාහිනිය වැඩ පටන් ගත්තා මතකද..? මට මතකයි.
ඒ කාලේ අද වගේ රිවයින්ඩ් ටීවී පහසුකම් තිබ්බේ නෑ. හවසට යන කාටුන් එකක්, ළමා කතාවක් බලන්න බැරි වුනොත්, කොහෙ හරි ගමනක් ගිහින් එනකොට කතාවේ භාගයක් බලන්න බැරිවුනොත්, එදාට ලයිට් ගියොත් දැනුන දුක මතකද..? මට මතකයි. සමහර දවස් වලට ඉස්කෝලේ යාළුවන්ගෙන් කතාව අහලා චිත්ත රූප මවාගෙන කතාව හිතෙන් බලලා තමයි ඒ දුක තුනී කරගත්තේ. ඒ කතා ඒ කාටුන් හැම එකම වගේ අද යූටියුබ් එකේ තියෙන්වා. සියපාරක් බලන්න පුලුවන්. ඒත් ඒ දැනුන හැඟීම ආයේ දැනෙයිද..? කවදාවත් නෑ බං.
අපි දැන් වයසයි, ලස්සන මතක සුවඳ ගොන්නක් හිතේ පුරවගෙන නිහඬවෙලා ඉන්න වයසක මිනිස්සු ටිකක් අපි. අසූ අනූ ගණන් වල අපි තාක්ෂණය ඇතිව / නැතිව ජීවත් වුන එකම පරම්පරාවට වෙන්න ඇති. දැන් ඉන්න අළුත් පරම්පරාවේ අය ගෙවන ජීවිතේ එක්ක, ඒ අය සතුටු වෙන දේවල් එක්ක බැලුවාම අපි හෙන අහිංසක ළමා කාලයක් ගෙවපු වාසනාවන්ත පිරිසක් බං. හිතිලා නැද්ද එක දවසක් පොඩි කාලෙට ගිහින් ඉඳලා එන්න. මට හිතිලා තියෙන්වා බං. දැන් මම ඉන්නේ අනේ මට පොඩිකාලෙට පොඩ්ඩක් ගිහින් එන්න ඇති නම් කියලා හිතෙන වයසේ. ඒත් කවදාවත් නොවෙන දෙයක් ඒක.
මම කියනවට මේ ලිපිය කියෙව්වට පස්සේ එක පාරක් ජාතික රූපවාහිනී තේමා ගීතය, ස්වාධීන රූපවාහිනි තේමා ගීතය, ගුවන් විදුලි සංස්ථාවේ තේමා වාදනය, නන්දා මාලිනියන්ගේ ජයමංගල ගාතා ගායන, සිද්ධාලේප ඇඩ් එකේ වාදනය එක පාරක් අහලා වරෙන්. උඹලාටත් කඳුළු වැටෙයි බං මට වගේම...
