02/04/2026
أي شخص وصل لعمر 40 سنة، من الأفضل يدير فحص المنظار الطبي (coloscopie)، أو كما كنقولو بالدارجة “تيو”.
هاد الفحص كيكون عبارة عن كاميرا صغيرة كيدخلها طبيب مختص باش يشوف حالة المصران، وكيقلب واش كاينين زوائد أو مشاكل داخلية. علاش مهم؟ حيث إلا درتيه مرة وحدة وطلع كلشي مزيان، ممكن ما تحتاجش تعاودو حتى تمر 10 سنين.
الأهمية ديالو كبيرة حيث كيساعد على الكشف المبكر ديال سرطان القولون والمستقيم، واللي كيعتبر من أكثر السرطانات اللي كتموت المغاربة، وغالباً مرتبط بنمط التغذية وأسباب أخرى.
الخطير فهاد المرض هو أنه “صامت”، ما كيكونش فيه ألم فالبداية، حيث المصران ما فيهش نهايات عصبية كتحسسك بالوجع. يعني ممكن تعيش حياتك عادية وانت مريض بلا ما تحس حتى يوصل لمرحلة متقدمة، وهنا كتكون الخطورة كبيرة.
حسب تجربتي، أثناء الفحص كنت كنشوف الكاميرا وهي كتتحرك، وما حسّيت حتى بشي ألم. وإذا شكّ الطبيب فشي حاجة، كياخذ عينة صغيرة (خزعة) وكيصيفطها للمختبر، أو كيحيد زوائد حميدة قبل ما تتحول لزوائد خبيثة. النتيجة كتكون غالباً فمدة قصيرة، وأهم حاجة أنك كتكون كشفت المرض فمرحلة مبكرة، وهاد الشي كيرفع بزاف من فرص الشفاء.
التقارير الطبية كتشير أن سرطان القولون والمستقيم هو ثاني سرطان كيسبب الوفاة عند المغاربة، من بعد سرطان الرئة المرتبط بالتدخين. (وطبعاً إلا هضرنا بشكل عام، أمراض القلب كيبقاو في المرتبة الأولى، ولكن هنا كنهدرو غير على السرطانات).
الله يشافي الجميع 🙏
هاد الموضوع ماشي للضحك، راه كيبكي… وخاصنا نكونو واعيين.
إلا لاحظتي دم فالبراز، ما تسكتش… وماتسناش حتى يفوت الفوت.
