17/10/2019
Ranona baranjely + citron: Manadio aty, mampihena
Sady maha-afaka hetaheta no manadio ny ao anaty ny ranona baranjely sy ny ranom-boasarimakirana.
Mandrindra ny tahan’ny siramamy ao anaty rà ihany koa no sady manala ireo singa ratsy ao anaty vatana, mampihena, manala kôlestérôly… Maro ireo voka-tsoa entin’ity zava-pisotro ity.
Maivana fa betsaka otrikaina
Manana tsiro maivana kokoa noho ny rano ny ranona baranjely. Mitondra otrikaina maro izy, isan’izany ny vitamina K, ny vitamina B6, ny mineraly toy ny potasiôma… Raha ampiarahana amin’ny voasarimakirana indray dia mitondra vitamina C sy “antioxydants” (mpanala arafesina). Roa herinandro no hisotroana ny ranona baranjely, dia hahazoana ireo singa ireo.
Manadio ny ao anaty
Manadio ny ao anaty ihany koa ny ranona baranjely sy voasarimakirana. Mihena vokatry ny fisotroana io zava-pisotro io ny fibontsinan’ny kibo ary voadio ny loto ao anatin’ny tsinay. Ahenany ihany koa ny sira ao anatin’ny vatana. 20 minitra alohan’ny hisakafoanana no tokony hisotroana io zava-pisotro io.
Mampihena ny tahan’ny kôlesterôly
Mampihena ny tahan’ny kôlesterôly ao anatin’ny vatana ihany koa ny ranona baranjely sy voasarimakirana. Mandrindra ny fiasan’ny fo mantsy io zava-pisotro io, noho ny vitamina C entiny. Mahavoky ihany koa, ka mety tsara ho an’ireo olona te-hampihena vatana. Misotroa an’io zava-pisotro io, 20 minitra alohan’ny hisakafoanana.
Fikarakarana ny ranona baranjely sy voasarimakirana
· Rano 1 litatra
· Baranjely 1
· Ranom-boasarimakirana 1
Ampangotrahina ao anaty rano ny baranjely voatetika. Rehefa mivadibadika dia andrasana ho matimaty vao androtsahana ny ranom-boasarimakirana. Na koa sasana tsara ny baranjely, tetehina boribory manify ary arotsaka ao anaty zinga lehibe. Avela hilona mandritra ny alina tontolo ary ny ampitso vao rarahana ranom-boasarimakirana sy sotroina. Roa herinandro ihany ny faharetan’ny fisotroana io zava-pisotro io dia ajanona. Azo havaozina rehefa afaka iray volana eo ho eo. ( 1L par jour )
©️ Conseil régime et partage
