09/06/2026
SENATE WORKERS NASAKTAN SA “PULPOL” AT “BOBO” NA PAHAYAG UMANO NI TULFO
Nagpahayag ng matinding pagkadismaya ang Senate employees’ union na S.E.N.A.D.O. matapos umanong tawaging "pulpol," "bobo," at "bingi" ni Sen. Erwin Tulfo ang ilang empleyado ng Senado sa gitna ng sigalot sa liderato ng institusyon.
Sa inilabas na pahayag noong Hunyo 8, sinabi ng unyon na hindi dapat sisihin ang mga career employees sa kalituhang dulot ng magkabilang kampo sa Senado dahil ginagawa lamang nila ang kanilang tungkulin.
Ayon sa grupo, nakatanggap ang mga empleyado ng magkakaibang memorandum at direktiba habang nagpapatuloy ang hidwaan sa liderato kaya hindi makatarungang sila ang gawing responsable sa sitwasyon.
"To accuse them of disloyalty, incompetence, or political bias without due process is unfair, demoralizing, and detrimental to the institution," ayon sa S.E.N.A.D.O.
Kinondena rin ng unyon ang umano'y pampublikong paghamak at pagkwestiyon sa kredibilidad ng mga empleyado ng Office of the Sergeant-at-Arms at Public Relations and Information Bureau.
Dahil dito, nanawagan ang grupo kay Sen. Erwin Tulfo na bawiin ang kanyang mga naging pahayag at maglabas ng pampublikong paghingi ng paumanhin sa mga empleyado ng Senado.
