28/08/2026
فرائض کی انجام دہی کا انوکھا جذبہ: وہ استاد جو 20 سال تک دریا تیر کر اسکول جاتا رہا!
بھارت کی ریاست کیرالہ کے ضلع ملاپورم میں ریاضی کے استاد عبدالمالک کی تدریس سے محبت کی کہانی بے حد منفرد ہے۔ 1992 میں جب انہوں نے پرائمری اسکول میں پڑھانا شروع کیا تو سڑک کے راستے 12 کلومیٹر کے سفر کے لیے تین بسیں بدلنی پڑتی تھیں جس میں روزانہ 3 گھنٹے ضائع ہو جاتے تھے۔ اس وقت کا ضیاع بچانے کے لیے انہوں نے دریائے کدلنڈی کو تیر کر عبور کرنے کا فیصلہ کیا، جس سے اسکول کا فاصلہ صرف 1 کلومیٹر رہ گیا۔
وہ روزانہ اپنے خشک کپڑے، جوتے اور کھانے کا ڈبہ پلاسٹک کے تھیلے میں پیک کرتے، کمر پر ٹائر کی ٹیوب باندھتے اور ایک ہاتھ سے تھیلا اوپر اٹھا کر 10 سے 20 منٹ میں دریا عبور کرتے۔ مون سون کی تیز لہروں، چڑھتے پانی اور سانپوں کے خطرے کے باوجود ان کا یہ معمول 20 سال تک جاری رہا۔ وقت کی اس پابندی پر طلبہ نے انہیں پیار سے "ٹیوب ماسٹر" کا نام دیا۔ عبدالمالک نے ثابت کر دکھایا کہ ایک سچا استاد بچوں کے مستقبل کے لیے ہر رکاوٹ عبور کر سکتا ہے
🫶
