11/03/2025
واحد أخونا عنده سكري و فاطر في رمضان ...
زي الساعة عشرة جاتو رجفة و هو في السوق و المطاعم طبعا مقفلة و هو خجلان لانه صحته سمحة ما شاء الله ..
قال يتخارج علي دكاكين الأحياء الجنب السوق ...
المهم لقي ليهو شفع قاعدين في لستك سألهم من دكان ببيع فول ولا اكل ...
قالوا ليهو ياعمك في بيت بكاء بجاي ...
*طبعا بيوت البكاء مصطلح للبيوت أل بتبيع أكل في رمضان😁😁*
و هو ماعارف المصطلح دا ....
المهم مشي لقي ليك الصيوان مدقوق في نص الحوش و الناس فايرة هههه ....
ناس تغسل في جرجير و ناس تقطع في بصل و واحدين بيدقوا شطة و الدخان قاجي و في مرأة سميييينة متحكرة في بنبر ...
و الحلل قدامها و البنات يشيلن في الصواني و الشاي شغال ...
وقف قدامها قالت ليهو : تاكل شنو ؟ ...
إستغرب ...
لكن حسب جوعة السكري عاين في الحلل و طلب النفس دخلت فيهو ...
المهم ضرب تمااااام و مشي غسل يديه و الباب جاك زول 😁😁 ...
و فجأة سمع الصيوان كله بكورك ليهو ( يازول .. ياخينا... ياولدنا ... ياااا أبو الشباب ) 😅
إتلفت مخلوع ..
قالوا ليهو المرأة دي قالت ليك تعال ..
مشي يتلبد ...
المرأة عيونا كبااار وهي سمييينة وماسكة الكمشة ...
قال ليها : نعم ؟
قالت ليهو : نعم الله عليك ... الحساب 😁 ...
قال ليها : حساب شنو ؟ ...
قالت ليه :- حساب الأكل !!
قال ليها أنا و الله المعلومة أل وصلتنى قالوا لي دا بيت بكاء 😅😅
قالت ليهو قووووول دا بيت بكاء و عنقريبنا متكول في الحيطة بره ... إنت هسي عزيت منو ؟ ...
و لا شلت الفاتحة مع منو ؟؟ ...
ناس السكري ما تنسوا تشيلوا الفاتحة 😅😅😅😅😅
منقوولة
