13/05/2022
معالجات الهواتف:
المعالجات بتاعت التلفونات😐اعتقد انو كتير سالت نفسك ارقام واسماء المعالجات دي شنو 🤔وكيف اقدر احدد انا محتاج معالج من ياتو نوع او ياتو اصدار يقضي لي حاجاتي بدون زياده او نقصان😥 في البوست دا هنسهل عليكم الموضوع ان شاء الله و نقدر نساعدك تختار التلفون بالمعالج الافضل لي استخدامك👌🏻😉.
اولا شركات واسماء المعالجات الاكثر استخداماً:
هنوريكم اكثر تلفونات منتشره في السودان هي(هواوي/سامسونج/ايفون/شاومي/اوبو)ودي تلفونات في الاغلب برضو بتجي بمعالجات بواحد من الشركات دي👈🏼(Snapdragon/Mediatek/Exynos/و معالجات Aحقت ايفون) دي اسماء المعالجات الهتلقاها في اغلب الاجهزه في السوق.
ثانيا المعالجات و نطاقات استخدامها:
1_معالجات سناب دراجون:هي معالجات هتلاقيها في اغلب الاجهزه مع اختلاف اصداراتها و قوة اداءها وهي اغلبها لي الالعاب و الاستخدامات الثقيله برضو هتلقى عندهم معالجات اقدم و في الفئه الاقتصاديه لي الاستخدام المتوسط او الضعيف (هتلقى ترتيب معالجاتها في الصوره رقم 1).
2_معالجات اكسنوس الخاصه بشركة سامسونج م هتلقاها الا في هواتف سامسونج وهي معالجات متفوقه في اداها على بعض المعالجات في السوق واثبتت كفاتها السنين الفاتت وزي م قلنا هي محصوره على اجهزة سامسونج بس (هتلقى ترتيب معالجاتاها في الكومنتات الصوره رقم 2).
3_معالجات ميديا تيك وهي معالجات متميزه جدا في الفئه المتوسطه و الاقتصاديه و رخيصه السعر بمعنى هتديك جوده قدر قروشك بتلقاها في اجهزه كتيره في كل الشركات تقريبا وهي معالجات مناسبه من وجهة نظري لي الاستخدام المتوسط (هتلقى ترتيب معالجاتها في الكومنتات الصوره رقم 3).
4_معالجات (A)الخاصه بشركه ابل وهي بصوره منفرده من غير سوفت وير (نظام تشغيل) تعتبر اقوى معالجات في المعالجات السبق ذكرها بس نظام تشغيل ايفون الهو ios بيحد من امكانياتها لكن هي معالجات قويه جدا وتنفع لي الاستخدام الثقيل بدون تعليق في الجهاز او ارتفاع درجات حراره الا في الاجهزه القديمه.
⭕دي فكره عامه ممكن تعرفوها عن المعالجات بتاعت التلفونات لو في اي سوال او استفسار اتفضل اسالنا في الكومنتات وان شاء الله هنساعدك.
في الكومنتات برضو هننزل ليكم صوره فيها ترتيب اخر معالجات من الشركات السبق ذكرهم حسب التصويت في السوق العالميه.📬
news
