10/08/2026
إلى نغم…
إلى صديقتي، إلى من شاركتني أيامي وتفاصيلي، تعبي وفرحي، ليالي الشغل وسهرها، وضحكاتنا وأسرارنا…
إلى من كانت شريكتي في كل شيء جميل، ورفيقة دربي في الشغل والحياة…
إلى من تركت لمستها بكل وردة، وكل هدية، وكل زاوية من أيامنا…
إليكِ يا نغم أكتب، وأنا لا أعرف كيف للكلمات أن تختصر كل ما كنتِ تعنينه لي.
ما بعرف من وين بدي بلّش الحكي عنكِ…
يمكن لأنكِ مو بس رفيقتي، كنتِ شريكتي بكل تفاصيل أيامي، بالفرح والتعب، بالشغل وبالحياة.
كنا نشتغل سوا بتنسيق الهدايا والورد، ونقضي أيام وليالي جنب بعض… نصنع من الورد والهدايا أشياء حلوة للناس، وما كنت أعرف وقتها إن أجمل شيء كان عم نصنعه هو كل هالذكريات اللي جمعتنا سوا.
لمساتك كانت موجودة بكل شغل عملناه… وكل تفصيلة من إيديكِ كانت تشبهك حلوة، دافيه، مليانة حب، مثل قلبك الحنون ووجهك اللي كان يحمل حلاوة روحك.
عشنا تفاصيل كثيرة ما رح ينساها قلبي… ضحكنا، تعبنا، سهرنا، حكينا عن كل شيء، وتقاسمنا أيام وليالي صارت اليوم من أغلى ما أملك.
كنتِ رفيقتي، وبيت أسراري، والشخص اللي كنت أركض لعنده أول ما أزعل، وأول ما أفرح… كنتِ أول وحدة بدي أحكيلها كل شي، وكأن وجودك كان المكان الآمن اللي برجعله مهما صار.
واليوم، أصعب شيء إني عم فتّش عنكِ بكل هالتفاصيل وما عم لاقيكِ…
رح يضل مكانك موجود بكل زاوية من شغلنا، بكل وردة، بكل هدية، وبكل تفصيلة كنتِ حاطة فيها لمستك وحبك.
ما بعرف كيف رح كمل بدونك، وكيف رح تكون الأيام والشغل من بعدك… بس بعرف إن كل شيء تركتي فيه لمستك رح يضل يذكّرني فيكِ.
يمكن غبتي عن عيوني، بس مستحيل تغيبي عن قلبي.
رح تظلي حاضرة بكل ذكرى حلوة جمعتنا.
يا نغم… حتى اسمك رح يضل يشبهك، رح يضل يمرق على قلبي مثل لحن حزين وحلو بنفس الوقت، ويذكرني فيكِ وبكل الأيام اللي عشناها سوا.
الله يرحمك يا قطعة من قلبي، يا أحنّ وأجمل روح عرفتها.
الله يجعل كل الحب والخير اللي كان بقلبك نور إلكِ، ويجعل مكانك أجمل من كل الورد يلي بيوم نسّقناه بإيدينا.
اشتقتلك من هلق...
ورح اشتقلك بكل يوم جاي
الله يجمعني فيكِ بمكان ما فيه فراق. 🤍🕊️
وبسبب هذا الفقد الأليم، نعتذر من زبائننا الكرام عن عدم استقبال طلبات تنسيق الهدايا والورود خلال هذه الفترة، راجين منكم تفهّم ظرفنا ومنحنا بعض الوقت حتى نتمكن من العودة ومتابعة عملنا.
شكرًا لكل من يقدّر حزننا، ولكل من يذكر نغم بدعوة طيبة.
رحمها الله وأسكنها فسيح جناته. 🤍
