30/07/2026
ကျွန်တော့်အား အတိတ်ကို ပြန်လည်ခေါ်ဆောင်သွား ခဲ့သည့် မြင်ကွင်းမှာ ခင်မောင်ရင်၏ နှမလက်လျှော့ဇာတ်ကား အဖွင့်မြင်ကွင်းပင် ဖြစ်ပါသည်။ နံနက်ဝေလီဝေလင်း နှင်းတဖွဲဖွဲ ကျနေချိန် ပဲပြုတ်သည်၏ ဘဝဇာတ် ရုပ် နောက်ခံဂီတသံမှာ အနောက်တိုင်းဥရောပဂီတဆရာကြီး J.S Bach ဘက်ချ်၏ "G String" (ခေါ်) တယောသံများဖြင့် ဖွဲ့ထားသည့် (Baroque) ဘာ့ရော့ဂီတ ဖြစ်သည်။ ဆီးနှင်းမှုန် မသဲမကွဲ နံနက်လင်းအရုဏ်၏ မြင်ကွင်း အလင်းအမှောင်၊ ဂီတ၏ အရောင်အသွေးတို့ဖြင့် စက္ခုနှင့် သောတအာရုံကို ညွှန်းပြသွားသောအခန်း ဖြစ်ပါသည်။ “ပဲပြုတ်” ဟူသောအသံဖြင့် မြင်ကွင်းကို အဆုံးသတ်သွားသည်။ ခင်မောင်ရင်သည် ထိုမြင်ကွင်းကို ဟိုး... အဝေးရှိ အရာဝတ္ထုသေးသေးလေးမှာ ကင်မရာရှေ့ ဖြတ်လျှောက်သွားပြီး မြင်ကွင်း ဆုံးသွားသည်အထိ ပြပါသည်။ အမှောင်မပြယ်သေးသည့် အရုဏ်ဦး အလင်းမြင်ကွင်းကိုလည်း ဂီတသံဖြင့်ပင် ဖွဲ့၍ သွားပါသည်။
ရုပ်ရှင်ကြည့်သောပရိသတ်မှာ ဇာတ်ကားအမည်က “နှမလက်လျှော့ နေလေ တော့”၊ ဇာတ်လိုက်မင်းသားနာမည်က “သိန်းတန်” ဆိုတော့ အားကြိုးမာန်တက် ချီတက်လာကြပြီး ကြည့်ကြကာ ရုပ်ရှင်အပြီး ရုံအပြင်ပြန်ထွက်လာတော့ ဒေါသ ကုမ္မာရ မျက်နှာတွေနဲ့။ တွေ့မရှောင် တွယ်ကြမည့်ပုံနှယ်။
ထိုဇာတ်ကား ရုံတင်ပြသသော သွင်ရုံတစ်ဝိုက်သို့ ကျွန်တော်နှင့် ကိုဘိုကြီး (ဗိသုကာ၊ ယခုဆရာတော်ဘုန်းကြီး) တို့ မကြာခဏသွား၍ ချောင်းကြပါသည်။ ကိုဘိုကြီးကပင် “ဟေ့.. စိန်သိမ်း၊ ကျုပ်တို့ကို ခင်မောင်ရင်နဲ့ ပတ်သက်မှုရှိသူ တွေမှန်းမသိစေနဲ့နော်”ဟု နောက်ပြောင် ပြောပါသည်။
သို့သော် ထိုဇာတ်ကားကို သုံးသပ်ကြည့်ပါက ဇာတ်ကားအဖွင့်မြင်ကွင်း၌ ပင်လျှင် အချိန်၊ ဂီတ၊ အရာဝတ္ထုတို့ကို စုပေါင်းထားခြင်းက "abstract" ရုပ်ရှင် ဆန်လှပါပေသည်။ ပန်းချီတွင်မူ ပုံတူမဟုတ်ဘဲ သဏ္ဌာန်မဲ့ "non objective"၊ ဂီတတွင်မူ တေးသွားမဲ့ဂီတ "without melody" များကို ဖော်ညွှန်းသွားတာ ဖြစ်ပါလိမ့်မည်။ ဇာတ်ကား၏ နောက်ဆုံးပိုင်း ဇာတ်သိမ်းတွင်လည်း ကြည့်ပါ။ မောင်သိန်းတန် သေဆုံးသောအခါ ရိုက်ကွင်းသည် နေဝင်ဆည်းဆာဆီသို့မောင်သိန်းတန်သည် လက်တစ်ဖက်မှ တိုက်ပုံအင်္ကျီကို ပခုံးနောက်သို့ပစ်၍ နေဝင် ရာ အရပ်သို့ ကင်မရာ ကျောပေး၍ သွားနေသည့် မြင်ကွင်း၊ နေဝင်ချိန်နှင့် သူ့ဘဝ သည် ထပ်တူထပ်မျှ ဘဝတူဖြစ်စဉ်ကိုပြသော အခန်းဖြစ်ပြီး၊ နောက်ခံဂီတမှာ ရုရှားဂီတ စန္ဒရားပညာရှင်ကြီး ရဂ်မာနီနော့ဗ် (Rachmaninoff) ၏ Piano Concerto No. 2, C Minor 1st Movement ဖြစ်ပါသည်။ ထိုဂီတမှာ ဂီတသံစုံ၏ အနိမ့်ဆုံးအပိုင်းကို အလေးထားဖွဲ့နွဲ့သော Composition ဖြစ်၍ နေဝင်ဆည်းဆာချိန် သိန်းတန်၏ ဘဝနိဂုံးကို ဂီတသံ “အမှောင်ရောင်”ဖြင့် စုပေါင်း ၍ တင်ပြသွား သည်ဟုပြော၍ ရပါသည်။ သို့သော် ယခုအချိန် ကိုခင်မောင်ရင်ကို သွားမေးကြည့်ပါက ဖြေလိမ့်မည်မဟုတ်။ “လုပ်ချင်၍ လုပ်တာ”ဟုသာ ပြောမည် ထင်ပါသည်။
- စန္ဒရားသိမ်းမောင်
