19/03/2026
話說今次外出活動，有位老友記令我幾深刻。
佢非常鍾意「留白」，
唔鍾意倒滿成幅畫布／盒，
成幅畫好似「未完成」咁。
同其他人比，可能唔算「典型靚」，
佢仲話自己個盒好似隻拖鞋，
但一路望住自己幅畫笑。
想問大家，
如果你係帶活動嘅導師／社工，
見到呢個情況，你會點做？
我知道，好多時因為要俾人睇成果，
或者要交代俾上面，
會叫佢／甚至幫佢加多啲色，
流滿成幅畫布，令作品「完整」啲。
但我自己通常會先了解，
問下佢點諗，
然後由佢做自己真正想做嘅流體畫。
其實好多時候，長者／小朋友嘅決定權都唔多——
食咩、做咩、幾時做，
好多都已經被安排好。
所以如果喺創作入面，
可以俾返選擇權同空間佢哋，
某程度上都係一種 empowerment。
唔一定要「填滿」、唔一定要「靚」，
而係讓佢哋用自己嘅方式去完成一件作品。
我諗藝術最正嘅地方，
係俾人重新感受到——
「我可以自己決定」。
享受自己每一個選擇，
其實已經係最大嘅 outcome 🤍
