18/09/2016
...այդ շղարշը գուցե հենց կյանքն է, որն իր ամենատարբեր գույներով աստիճանաբար բացվում է պատմության հերոսուհու` Քիթիի առջև:
► http://grqamol.am/akumb/somerset-maugham-erpnerang-shgharshy-bac-qnnarkum/
«Զանգակ» հրատարակչությունը և «Գրքամոլ» ակումբը համատեղ սեպտեմբերի 10-ին կազմակերպել էին անգլիացի գրող Սոմերսեթ Մոըմի «Երփներանգ շղարշը» վեպի բաց քննարկումը (գիրքը հրատարակել է «Զանգակ»-ը, թարգմանությունն անգլերենից` Անահիտ Բաբայան-Զեյթունցյանի): Հանդիպմանը նաև ներկա էր գրքի խմբագիր Արթուր Մեսրոպյանը: Նշենք, որ վեպում ներկայացվում է Անգլիայի պատմության այն բեկումնային շրջանը, երբ կանայք թեպետ ունեին ընտրելու իրավունք, սակայն, ճնշվելով նախապաշարումներից և նախկին ավանդույթների անբեկանելիությունից, ըստ էության, զրկված էին այդ ընտրությունն իրականացնելու հնարավորությունից: Ներկաները նախ անդրադարձան այն հարցին, թե ինչու է վեպը կոչվում «Երփներանգ շղարշը», և ամեն մեկն այդ առնչությամբ առաջարկեց իր տարբերակը: Ոմանց կարծիքով` այդ շղարշը հենց կյանքն է, որն իր ամենատարբեր գույներով աստիճանաբար բացվում է պատմության հերոսուհու` Քիթիի առջև, մյուսների համոզմամբ էլ դա հերոսների իրական պատկերն էր, որից հեղինակը հետզհետե նրբորեն վերցնում է շղարշը:
Վեպի հիմքում ընկած սիրային պատմությունը ներկաները փորձեցին անցկացնել մասնավորից դեպի ընդհանուրը տանող պրիզմայով` միաժամանակ համեմատականներ տանելով անգլիական և հայկական ավանդույթների միջև: Նրանք անդրադարձան նաև վեպի հերոսների արարքների անսպասելի ու անդառնալի հետեւանքներին` շեշտելով, որ Մոըմի գրականությունը չի պարտադրում հերոսներին ընկալել որպես բացարձակ դրական կամ բացարձակ բացասական. փոխարենը այն հերոսներին դնում է փորձությունների մեջ, ներկայացնում նրանց որպես առանձին անհատականություններ, իսկ հետևությունները թողնում է ընթերցողին:
Այսպիսով` ակումբի հերթական հանդիպումը, որն անցավ ակտիվ բանակցությունների թեժ մթնոլորտում, կարելի է համարել հաջողված:
