18/10/2025
2025-ci ilin “Konstitusiya və Suverenlik İli” elan olunması çərçivəsində, 18 oktyabr – Müstəqilliyin Bərpası Günü münasibətilə “Heydər Əliyev irsində mədəniyyət və incəsənət” mövzusunda seminar təşkil olunub.
Tədbir Şamaxı Yaradıcılıq Mərkəzinin təşkilatçılığı ilə baş tutub. Seminar sənətşünas, Mədəniyyət Nazirliyinin Şabran Regional İdarəsinin aparıcı məsləhətçisi Anar İbrahimovun təqdimatında keçirilib.
Seminarda Anar İbrahimov ümummilli lider Heydər Əliyevin mədəniyyət və incəsənət sahələrinə göstərdiyi xüsusi diqqət və qayğıdan, bu sahənin inkişafında oynadığı mühüm roldan bəhs edib. Qeyd olunub ki, Heydər Əliyevin dövlətçilik strategiyasında mədəni irsin qorunması, milli-mənəvi dəyərlərin yaşadılması və gələcək nəsillərə ötürülməsi daim prioritet olmuşdur.
Seminar zamanı iştirakçılarla interaktiv müzakirələr aparılıb, gənclərin sualları cavablandırılıb. Tədbirdə Şamaxı Dövlət Regional Kollecinin tələbələri və Basqal Dövlət Tarix-Mədəniyyət Qoruğunun əməkdaşları iştirak ediblər.
Tədbirin sonunda iştirakçılar Şamaxı Yaradıcılıq Mərkəzinin sərgi salonu ilə tanış olublar. Onlara burada nümayiş etdirilən, milli dəyərlərimizi əks etdirən əl işləri və sənət nümunələri təqdim olunub. Əl işləri ustalarının hazırladığı eksponatlar iştirakçılarda xüsusi maraq doğurub və zəngin mədəni irsimizin canlı nümunəsi kimi dəyərləndirilib.
Sonda Yaradıcılıq Mərkəzinin rəhbəri iştirakçılara burada hazırlanmış əl işlərinin yaradılma prosesi, istifadə olunan texnikalar və materiallar barəsində ətraflı məlumat verib. O, gənclərin bu sahəyə marağının artırılmasının vacibliyini vurğulayıb və yaradıcı təfəkkürün inkişafında belə təşəbbüslərin rolunu önə çəkib.
Seminar iştirakçılar tərəfindən maraqla qarşılanıb və gənclərin mədəni irsimizə daha böyük diqqətlə yanaşmalarına, milli kimlik və dövlətçilik dəyərlərinə bağlılıqlarının möhkəmlənməsinə töhfə verib.
