12/16/2021
સરદાર એટલે...?
સરદાર વલ્લભભાઈ પટેલ એટલે પથ્થરનું મૌન,
ધીરજની ખીણ અને પરાક્રમનું શિખર.
નિડરતાનું શિલ્પ અને બારેમાસ સુગંધી ફૂલ આપતું નિષ્ઠાનું વૃક્ષ ....!
સરદાર એટલે સુદર્શનવાળી વાંસળી, શીતળતાવાળો સૂરજ, મધમીઠો દરિયો, લીલુછમ્મ રણ અને ધરતી ઉપર ઉતરી આવેલુ અફાટ આકાશ...!
સરદાર એટલે કડક લોખંડી શિસ્ત, સાદગીનો શ્વાસ, સંબંધોનો અભ્યાસ, શ્રીફળનું જળ અને વજ્રના પહાડોમાંથી નીકળતું કરૂણાનું ઝરણું....!
સરદાર એટલે સિંહનું કાળજું, નિર્ણયશક્તિની મશાલ, સ્વમાનનો સ્ક્રીન શોટ, વફાદારીનો વેલો, અને સેનાપતિ નહી પણ સંનિષ્ઠ સૈનિક..!
સરદાર એટલે એકતાનું અજવાળું, અખંડિતતાનું તાળું, ખાનદાનીનો કાર્ડિયોગ્રામ, ઈમૉશન્સનો ઇ મેઈલ અને ગુણવાળી કડવી ઔષધિ...!
સરદાર વલ્લભભાઈ પટેલ એટલે કોઈ પાર્ટી નહી, કોઈ પદ કે હોદ્દો નહી, કોઈ કોમ નહી પણ રાષ્ટ્રભક્તિનો હોમ... !
સરદાર એટલે સ્ટેચ્યુ ઓફ યુનિટિ નહી પરંતુ યુનિટિનું સ્ટેચ્યુ.
સરદાર એટલે કોઈ સંત નહી, કોઈ દેવતા નહી, કોઈ ભગવાન નહી અને 'સાંઈ' ને મન આ બધાથી સહેજ પણ કમ નહી.
-સાંઈરામ દવે
