06/08/2026
WILLIAM SHAKESPEARE
William Shakespeare (1564–1616) hi calai lam ih mi tampi cun kan thei cio ko ding ka zum: Mirang calai khawvel ih cangan thiam lar tak pakhat a si. A thih ihsin k*m 400 lai a liamzo nan a sulhnu cu hngilh ni a um dah lo.
Ziangahtile a canganmi cabu le lemcan (drama) pawl hi Leitlun ram tampi ih siar rero le zir rero mi an si cuh! University, tlawng le theatre tampi ah a hmin hmuh ding tampi a um lai.
- Ziang ruangah maw cuvek ih a lar hleicenak san?
1. Milai thinlung a neh — Shakespeare cun milai thinlung ih thinhengnak, huatnak, duhhrilnak, phurritnak, beiseinak le hlawhsamnak pawl cu a taktak vek rorin a ngan suak thei. Curuangah a canganmi cu khuahlan k*m 400 ihsin tuisan tiang mipipawl in an theihthiam ih, anmai nun thawn an pehtlaih thei.
2. A thawnthu pawl in nun fimnak an zirh — A drama (lemcan) nganmipawl cu thehdarhawknak lawng an si lo in, milai nun, thuneihnak, diknak, sualnak, duhdawtnak, phurritnak le duhhrilmi diknakpawl thuhla parah thuruah thiamnak a keng tel ringring.
Hamlet le Macbeth cun hamttamnak le hma sialnak, duhhamnak le thuneih duhnak ih a rahsuah mi a tarlang.
Romeo and Juliet cun duhdawtnak le huatnak ih rahsuah mi a langter.
Othello cun phurritnak le kan zummi ih in siatsuahtheinakpawl a lang ter.
King Lear cun innsung sang duhdawtnak, fimnak le thuneihnak thuhla in zirh.
3. Mirang tong a kausinter — Shakespeare cun tongkam thar tamzet a sersuak ih, thu reldan khal a danglamter. A tongkam tamzet hi zoh rero sehla, tuni ih an hman rero mi mirang tong ah hman rero an si. Curuangah Mirang calai khawvel ih pa bik dinhmun cotu mi pakhat khal a si phah hngehnge.
5. K*m khaw daih ding khopih sullam nei — Shakespeare ih a relmi pawl cu k*m pakhat asilole ram pakhat hrang lawng a si lo zia cu, an can sawng mi film pawl kan zoh ihsin kan fiang mai ko ding. Milai hmuahhmuah ih tawnmi buainak le nunzia a rel ruangah, cuaini nei lo, a tui dinhmun ih um vekih a lar ringringnak a si.
Cuvek țhiamțhiam cun; Kan tong, kan calai le kan canganthiam pawl hi kan hlir so thiam lo ih thazang kan pe lo asi ahcun, ni khat ni ah kan tong le calai a hlo thei mi a si. Asinan kan canganthiam pawl le mipi zarah cabu thar kan ngan, kan tong kan humhim, cabu kan suah rero a si ahcun, Chin Calai khal a nung vivo dingih, ram tampi ih theih hlawh le hman tlak si dingin kan tuah thei a si.
Shakespeare pakhat in Mirang Calai a thangsohter vekin, Chin ram khalah Shakespeare vek canganthiam thar tampi a suak theinak dingah casiartu, cabu leitu, thu ruah paihtu, a ziraw paihtu tampi kan suah a ttul rori.
