20/09/2026
112 الف جنيه اتسحبوا من حساب راجل كبير في السن واللي حصل ممكن يحصل لأي واحد فينا
انا بكتب الكلام ده عشان محتاجين صوت الناس يوصل للمسؤولين
والدي راجل داخل على 70 سنة ومريض راح يسحب معاشه من ماكينة ATM في البدرشين
سيدة منتقبة قربت منه وقالت له ان الماكينة دي مفيهاش فلوس وان فيه ماكينة تانية في محل قريب فيها فلوس
راح معاها واثناء السحب شافت الرقم السري وبعدها حجبت الماكينة بالخمار وسحبت كارت والدي وبدلته بكارت تاني من غير ما ياخد باله
والدي مشي وهو فاكر ان الكارت بتاعه معاه
بعدها بدأت عمليات السحب لحد ما اتسحب من حسابه 111.800 جنيه ورسائل البنك والصور والفيديوهات المتاحة هننشرها وكلها تحت تصرف جهات التحقيق
عملنا محضر في مركز شرطة البدرشين رقم 5697 من حوالي اسبوع ومفيش اي اهتمام
واللي يقلق اكتر ان اصحاب محلات في المنطقة أكدوا لنا ان وقائع مشابهة بتحصل بشكل متكرر
ومن ساعتها صحة ابويا بتتدهور ونفسيته متدمرة بسبب كسرة قلبه على شقا عمره والفلوس اللي تعب سنين عشان يحوشها
احنا ملناش بعد ربنا غيركم وعارفين ان رجال وزارة الداخلية مابيرضوش بالظلم ومابيسيبوش حق الغلابة وكبار السن
احنا مش بنطلب من حد يتهم او يحكم على اي شخص احنا بنطلب حاجة واحدة مراجعة الكاميرات وتتبع عمليات السحب والوصول للحقيقة يا اهل البدرشين والجيزة ويا كل صفحة اخبارية بتوصل صوت الناس ساعدونا واعملوا شير ومنشن علشان حق راجل كبير ما يضيعش وعلشان ميتكررش مع حد تاني
@وزارة الداخلية المصرية
@مديرية أمن الجيزة
@محافظة الجيزة
#الجيزة
#البدرشين
#سرقة
#احذروا
#ساعدونا
#الحقونا
#الشرطة
#الامن
#مصر