02/05/2025
السلام عليكم ورحمه الله وبركاته
الصور المعروضه ل حالات متكررة في الفترة دي
في الفترة دي اواخر الشتاء وبدايات الربيع بيكون فيه مشاكل كبيرة عند الفلاحين مربيين المواشي بسبب الاعتماد الكلي على اكل البرسيم العادي ( طبعا البرسيم الحجازي ) بديل كويس جدا عن البرسيم العادي
لكن من اهم المشاكل اللي هيواجهوها الفلاحين هي
١- ( نقص عنصر الفوسفور )
وده بيكون اعراضه معروفه ومميزة زي
*نقص اكل البرسيم او اكل الورق من الاعواد
* وشوية شوية بيكون فيه فقد شهيه كبير
* واخر مرحله الامتناع عن الاكل مع ظهور البول المدمم
وساعتها المرحلة دي بتاخد وقت طويل في العلاج عشان نتجنب كل ده بيكون الحل هو التوجه لطبيب طبعا مع ملاحظة اول عرض وهي نقص كمية الاكل او اكل كميات قليلة من البرسيم واوراقه وفقدان الشهيه بيكون عرض مهم مينفعش نهمله او نظي من دماغنا علاج ليه
عشان منوصلش لمرحلة البول المدمم اللي بتاخد فترة كبيرة في العلاج وهعرض صورة موضحه
٢-(نقص عنصر الماغنسيوم )
وده اللي بيعمل مشاكل عصبيه وتشنجات ومشاكل في الحركه
طبعا التشخيص ده ف ايد الطبيب وبس
لان اعراض المشاكل دي بتكون مشابهه ل امراض تاني
ف الفيصل الوحيد ف ايد الطبيب
في كل الحالات مينفعش نستخدم البرسيم ك مصدر أساسي للتغذية وخصوصا مع العشار وعند ظهور اي اعراض على الحيوان وان كانت بسيطه لان كل مرض بيظهرله اعراض بسيطه في البداية ومع تجاهلها بنوصل ل مراحل متاخره للاسف ف اي عرض او تغير في حاله وشهيه الحيوان سرعة اللجوء للطبيب البيطري
يعني وجود الاعراض دي مش اكيده لمرض بعينه لان فيه علامات تانيه بتبين ان ده المرض او مرض تاني ليه نفس الاعراض بس ملهوش نفس طريقة العلاج ف لازم التوجه للطبيب
انا بوجه نصيحه مش اكتر لو واجهنا اي عرض ف دول ف لازم نتوجه للطبيب فورا
مش اي حد عنده الخبرة والمعلومة الصحيحه وحصل خساير كتير بسبب الاعتماد على كلام مدعيين ممارسة المهنه لان الحالة المتاخره بتاخد وقت كبير وتكلفة كبيرة لصاحب الحالة وده خسارة سواء مع الوقت والتكلفه ليه ومجهود كبير من الدكتور وانا شخصيا واجهت ده وكان بسبب الإهمال والثقه ف كلام الناس اللي بتحب توجب مع صاحب الحاله
ف رفقا بانفسكم وباموالكم واملاككم ومجهود الطبيب
(فَاسْأَلُوا أَهْلَ الذِّكْرِ إِن كُنتُمْ لَا تَعْلَمُونَ )
والله خير حافظا ❤️
