29/10/2025
الشقى والتعب واليأس مرسومين على وشها 😔
كنت من شويه راجع من سيدى جابر على المنشيه عشان اجيب حاجه والمهم وانا رايح اركب اروح خلاص ومعدى من ادام بوسطه المنشيه لقيت سيدة قاعده على رصيف البوسطه وبتبيع توك بناتى وازازتين برفان رجالى و٣ لو ٤ شربات رجالى وبناتى وحطاهم على كرتونه على الارض.. وهى كانت ف حاله من اليأس والتعب والهموم مرسومه على وشها ومن كتر الهم. نامت وهى قاعده للهرب من التفكير ف كل المسئوليات ال على عاتقها ومش عارفه تحلها ازاى 😔 .. ف بجد قلبى وجعنى اوى من المنظر وحبيت اعرف ايه ال اساعدها بيه على قد ما اقدر ولعل وعسى اقدر
ام يوسف .. عمرها 30 سنه .. وعندها 4 أولاد .. ولدين فى المرحلة الإعدادية وبنتين فى الابتدائية .. هى كانت متزوجه وهى صغيره ف السن .. ومكنش فيه قايمه 🥺 .. انفصلت عن زوجها من سنه واخد منها عيالها الولاد عشان محدش فيهم يساعدها ف شى وساب لها البنات الصغيرين عشان تحتاس بيهم .. واخد كل محتويات الشقه للاسف وطردها من الشقه .. وهى الان ساكنه فى منطقة الحضرة فى اخر شارع الزهور
لما اتكلمت معاها عشان اشوف محتاجه ايه .. قالتلى انا مش عاوزه فلوس .. انا كنت واقعه من الدور الرابع وحصلت مشكله في عينى ومحتاجه عملية ونفسى اعملها عشان اقدر اشوف بيها واشتغل لان كل ما بروح مكان اشتغل ويعرفون أن عينى فيها مشكله يقولولى معلش مفيش شغل .. ف نفسى اكشف وأشوف اعمل ايه ل عينى ... وثانيا انا مأجره شقه بـ 1500ج ف الشهر وانا دفعت الإيجار الحمدلله بكل الفلوس ال معانا .. ولكن الشتا داخل علينا وانا وبناتى بنام على البلاط ف الشقه ومعندناش لا مرتبه ولا بطانيه ولا حله ولا اى شى نقدر نعيش بيه .. ف نفسى ف مرتبه مستعمله حتى وبطنيتين ادفى بيهم انا والبنات ولو فيه بوتاجاز أن شله عين واحده اطبخ عليه وحد يجيب ليا حلتين اطبخ لعيالى البنات فيها عشان يكلوا اكل بيتى لانى بجيب لهم جبنه وعيش أو عيش ولانشون وناكل كلنا وخلاص
حرفيا انا قلبى وجعنى اوى ومقدرتش اعمل وقتها غير انى اطلع ال فيه النصيب واساعدها بيه .. مكنتش راضيه تماما تاخد فلوس منى لأنها سيدة متعففه وتتشال ع الرأس ولكنى اصريت بعد ما اشتريت منها حاجه وعشان ترتضى
اهلى واصحابى ف الخير .. اتمنى انكم تتفاعلوا ونحاول نساعد اختنا المتعففه الشقيانه دى عشان تعمل تكشف على عينيها وتساعدها ونجيب لها الحاجات البسيطه اوى ال هى عوزاها وانا متأكد من طيبه قلبكم جميعا .. ارجوكم نساعدها
ال عاوز يعرف مكانها .. هى بتقعد كل يوم عند بوسطه المنشيه من الساعه 8م إلى 11م ..
منقول من استاذ اسلام رضا ..
