08/11/2022
كيف بدأت النمانيم؟!🤔🤔
في مارس ٢٠١٨ "دي فتره كبيره اوي 🙂" ، كنت عايزة اقدم هدية لشخص ما ولأني مدمنة جوابات "واه وقتها كانت جوابات عادي " قررت اقدم جوابات بطريقتي، وبدأت ادور على طريقة قص الجواب وعمله وازاي اطبع ومن فين ، وعملت اول ٣ جوابات في حياتي "اللي في الصورة تحت دول🌚" ودي كانت شرارة الانطلاق💥
نزلت الصورة دي على تويتر واتشهرت جواباتي فا قعدت مع نفسي وقولت يابت يانمنومة ليه لأ🤔 قولت لصاحبتي قالتلي برضة ليه لأ😂
فا هنا بدأت الفكرة وعملت البيدج فعلا بس كان اسمها جوابات عادي عشان كسلت ادور على اسم😂
وبدأت انشر فكرة الجوابات ونرجع الناس يكتبوا كلهم لبعض ولقيت ناس كتير حابه الفكره ومن بعدها انتشرت فكرة المراسيل بشكلها دلوقتي ده تقريبا في ٢٠٢٠ وانا الحقيقة اتبسطت بده جدا لحد ما فقدت الشغف🙂
قفلت البيدج شهور وقررت اوقف لحد ما قعدنا في البيت وقت كوڤيد الله يمسيه بالخير🚶🚶
دخلت بالصدفة في حفرة اسمها بينترست 🙆وبدأت اقلب ولقيت نفسي بحن لمراسيلي 🥺 ده انا لقيت اني عايزة كمان اعمل اكسيسوريز كتير لدرجة ان دماغي كانت مزحومه بالافكار وقتها مش عارفه ابدأ منين فا مبدأتش😂
بدأت ادور هنا على نمانيم 🤔 هي ايه فكرة البيدچ وايه الحاجه اللي بحبها ؟! انا بحب الحاجات الصغيرة المنمنمه♥️ طيب ما انا ببيع حاجات صغيرة باسعار صغيرة ليه متبقاش نمانيم 🤔 وده كان اقترح مشترك مع صديقتي سمسومه 😂♥️ adel
وبدأت ادور على ديزاين وفكره وبعدها بكام شهر كمان كلمت الديزاينر العظيم بتاعنا ali وعملي الكارت بتاعي وظبطلي الديزاين كمان♥️
وبدأت نمانيم تظهر بشكلها دلوقتي وبدأنا نكبر شوية شوية ونتعلم نعمل حاجات اكتر لحد ما فقدت لشغف خالص بقى في مارس ٢٠٢٢ "كل حاجه بتحصل في مارس 🙂" لتالت او رابع او خامس مره مش فاكره😂
وقررت اوقف ونزلت البوست اللي تحت ده وقفلت البيدج لحد ما ظهرت التوتي باج 🙆
انا نفسي في واحدة وكل ما اسأل يقولولي بعشرومية جنيه لا بقولكم ايه انا هعملها بنفسي🙂
فكرت في الناس اللي حواليا لقيتهم متأذمين برضه من سعرها ،طب بقولكم ايه نرجع نعمل توتي باج؟ لقيت في ناس كتير مستنيه فا قولت تاني ليه لأ😂 "الكرامة في زمة والله😂"
وبدأت نمانيم تاني♥️ ورجعنا تاني بنفس الفكرة حاجات صغيرة بسعر صغير وبكل الحب♥️
طلاما وصلنا هنا فا احب اشكرك على مشاركتي الرحلة الطويله وكل الدعم ياقمر 😂♥️
انا بدأت اعمل حاجة بحبها بسبب نمانيم ،اتعرفت على اصحاب كتير بسبب نمانيم، كل حاجة كنت بعملها كنت بحط فيها جزء من حبي وممتنة لكل ده النهارده♥️
نمانيم فكره والفكرة بتنطفي وبترجع مبتموتش😂♥️
