Khalty

09/01/2021

كل سنة وأصحابنا وحبايبنا وجيراننا المسيحين
بخير وصحة وعافية
عيد ميلاد مجيد سعيد عليكوا وعلينا كلنا

طبعا انا عارفة انها متأخرة، بس يلا كان عندي اشتباه
فى حاجة كدة والمعمل كلمني من شوية وقالي انها positive ف قلت اعيد عليكوا وبعدين اخش اترجم الكلمة وافهم قصدهم ايه

إعملوا منشن لأصحابكوا وعيدوا عليهم قلولهم ان كل تأخيرة وفيها خيرة



#خالتي

29/12/2020

يجعلها سنة بيضا وهنية
وتيجي للحبايب برزق وفرحة مُرضية
وتيجي ع العِدا بوَكسة وخيبة قوية
عيدوا على خالتي في الكومنتات بمناسبة ٢٠٢١، واكتبوا أمنياتكو للسنة الجديدة
#خالتي

17/12/2020

كل مثل من أمثالنا الشعبية الجميلة ليه المناسبة اللي بتتقال فيها والشاطر اللي يلاقي المثل المظبوط
فقولولنا بقى يا حلوين إيه الموقف اللي قولتوا فيه
على رأي المثل:
جوه وبره فرشتلك وإنت مايل مين يعدلك!!
#مسم
#حكم

05/11/2020

يا حبيبي ما النهار طويل ابقى تعالى الصبح طيب براحتك وقولنا ان ابن الدايرة رمز السلك في خدمة الوطن..
آه يا رااسي يااااااني😩🤕
لعلمكو انا كنت نازلة الانتخابات، بس عندى مشغوليات الفترة دى كتيرة، مش عايزاكوا تقلقوا خالص إن شاء الله المره الجاية صوري هتنور مدينة نصر كلها.
وطبعاً متنسوش (بحبك يا خالتي) زي كل مرة عشان بكره هبقى سيادة نايبة وهتحتاجونى.

28/10/2020

خالتي بتعيد عليكوا بمناسبة المولد النبوي الشريف
وبتقولكوا اتقوا الله وصفوا النوايا.
ولو النية سالكة كومنت بـ(بحبك يا خالتي) وهيجيلك احلى معايدة منى

26/10/2020

شوفو والنبي دا كلام
مهرجان كبير زي دا ولابسين فساتين عامله ازاي!!
طب كنتو استعينوا بواحدة موهوبة وعندها ذوق راقي زي أم بحبح
فاشون ديزاينر المنطقة عندنا.. مسم
وانتظرونى السنة الجاية 😎

24/10/2020

شوفتوا يا عيال عروسة المولد ...
دى غالبا عروسة المولد بتاعت مدينتى


#مسم

19/10/2020

في الجدعنة انتي الأصل 👍🏼
في المواقف بتسدي..
والبيت دايماً عامر بحِسِك
متنسيش الفحص الدوري عشان تطمنى على نفسك.

11/10/2020

سنة ١٨٨٣ كانت البداية بتاعت دكانة خالاتى والأول كنا بنبيع حلل وأباريق نحاس، الحلة اللي بتطلع من عندنا بتتوارثها الأجيال اتعرف عننا أحسن خامة بأحسن سعر.
وسنة ورا سنة واحنا بنطور خالة بعد خالة وبقى معروف إن أي حاجة جديدة في السوق بتكون عندنا قبل الكل ...لحد ما جه الدور عليا أمسك الشغل واكمل اللى بدأوه الغاليين.
ولقيت إن الجديد بقى التسوق عن طريق الإنترنت فقلت وماله ما انا كمان لازم اتطور وامشي على الموضة، وقررت ان انا اكبر واجيب بقى منتجات للمطبخ والديكور والعناية بالبشرة والشعر وكل الدلع دا.
وعشان انا بنت بلد أي حاجة تحتاجوها متلاقوهاش عندي اطلبوها وانا هجيبهالكوا مخصوص ماليش بركة إلا انتو يا حبايب.
اول الف كومنت على البوست ليهم هدايا مخصوصة منى...هظبطكوا
ومتنسوش لايك وشير للبوست.
ااة...واعملوا دعاوي لكل أصحابكوا يعملوا لايك هما كمان.

06/10/2020

بيان من الست عظيمة عبد عظيم
بتهني فيه جيش بلادنا العظيم والشعب المصري كله ونفسها طبعًا بنصر أكتوبر العظيم أوي
وبتتمنى للأعادي الوكسة والندامة.

01/10/2020

معرفة الناس كنوز
ويابخته اللى بمعرفة خالتي يفوز
أفتحوا الفيديو بأيديكوا اليمين يا حبايب

ومفاجأة لأول 1000 كومنت لحبايبنا في مدينة نصر ومصر الجديدة، وانتوا طبعاً عارفين غلاوة الحبايب وعشان المعرفة تبقى معرفة خير، والهدايا مبتروحش غير للغاليين قولولي (بحبك يا خالتي في الكومنتات) عشان ابعتلكو هدايا مخصوص ليكوا.
خالتكوا في الواجب متتوصاش.



شكر خاص ل ريهام حجازى مترجمة الاشارة

27/09/2020