شقة جاردن سيتي

10/11/2021

بنفكركم إن الجراچ سيل لسه مستمر في MALAZ - ملاذ
كل يوم من الساعة ٢ بعد الضهر

عنوان ملاذ: ٤ شارع شجرة المندورة- منيل الروضة
لو كتبتوا Malaz على جوجل ماب حيطلع العنوان مظبوط
الوصفة بعد ميدان المماليك في بنك بلوم نفوت الناصية بتاعته وندخل الناصية اللي بعدها
رقم ملاذ لو محتاجين تتأكدوا من المواعيد قبل ما تروحوا او تسألوا عالعنوان

01090175057

malaz
https://goo.gl/maps/R7HA5SC3kSwn2BT17

لو في أي استفسارات تقدروا تتواصلوا معانا عالصفحة

10/11/2021

04/11/2021

مساء الفل عليكم
وحشتونا جدا جدا طبعا

إحنا عاملين جراچ سيل لحاجات متبقية من شقة جاردن سيتي (ترابيزات .. فوتيهات.. براويز كتير بصورها.. كتب انتيكات على شوية رفايع)
مكان MALAZ - ملاذ بصاحبته الكريمة بعروضها الكتير لمساعدتنا من ساعة ما قفلنا قررت تستضيفنا عندها
الحاجات حتبقى متنضفة وجاهزة عالإستعمال علطول والأسعار متنوعة جدا .. عدوا علينا لو حتى مش حابين تشتروا ممكن تتصوروا او تسلموا ونشوف بعض ونستعيد شوية من أيام المكان سوا

التفاصيل في الإيفينت في أول كومنت
ملحوظة: الإيفينت حيبتدي الحد من الساعة ٦ مساء بس ممتد كام يوم بإذن الله

عنوان ملاذ :

malaz
https://goo.gl/maps/hgGPMxbRoHhpvCjk9
٤ شارع شجرة المندورة - منيل الروضة

‏
اوصلوا عندي ميدان المماليك في منيل الروضة بنك بلوم واخد ناصية ملاذ الناصية اللي بعد بلوم علطول

04/04/2021

من فضل ربنا علينا إن بعد سنة وأكتر من قفل المكان.. لسه لحد النهارده بتجيلنا أسئلة من نوعية : الكافيه رجع يشتغل تاني؟.. الكافيه اتفتح في مكان تاني؟.. انتو عملتوا كافيه تاني؟

والحقيقة وللأسف الشديد طبعا إن الإجابة لأ لأ لأ.. الكافيه مارجعش يشتغل ولا اتفتح في حتة تانية ولا إحنا كمجموعة شركا فتحنا كافيه مختلف.

إمتى ممكن ده يحصل وهل أصلا هيحصل ولا لأ؟.. بصراحة مش عارفين.. بس نتمى أكيد إن شقة جاردن سيتي يبقى لها قومة تانية قريبة ونكون موجودين معاكم في المستقبل القريب.. إلى أن يحدث هذا تقبلوا منا كل الحب والقبلات.. مواه

25/10/2020

من أول يوم بدأنا فيه المكان وإحنا بنحاول مانبقاش أوفر ولا مزودينها.. قاومنا إغراءات مش قليلة للمبالغات وتضخيم الأمور ماعتقدش إنه كان من السهل أبدا مقاومتها.. الناس كانت تقول لنا برافو عليكم عاملين مشروع ثقافي.. نقول لهم لأ عاملين مشروع تجاري.. يوصفوا الشقة إنها أكبر من مجرد كافيه.. نقفش ونقول لأ ده كافيه عادي حتى بصوا المنيو.. يحطونا في حتة الشباب المكافح اللي عمل مشروع مختلف عشان ينتصر على البلا بلا بلا.. نصمم نصحح المعلومة ونوضح إن الموضوع أبسط من كده وإن لأ إن شاء الله مافيش اختلاف ولا كفاح ولا حاجة.. يطلبوا نصيحة نقول مانعرفش.. يطلبوا إلهام نقول مانقدرش.. يطلبوا مانفيستو للنجاح نقول مانفقهش.. يطلبوا قهوة تركي دابل في كوباية نقول لأ ده قشطة موجود عادي.. كركركر

كنا بنحاول دايما مانحملش الأمور أكتر مما تحتمل ومانديش المكان أكبر من حجمه.. ولما كان حد من ضيوفنا الكرام يبعتلنا كلام كبير عن قد إيه هو بيحب الشقة ومتعلق بيها وشايفها حاجة كبيرة.. كنا نقول لنفسنا على إيه يا جماعة كل ده.. الدنيا أبسط من كده يعني مافيش حاجة.. بنقدملكم خدمة وبناخد قصادها فلوس.. بس بالوقت ومع كل يوم كان بيعدي علينا وعلى الكافيه.. الموضوع كان بيكبر جوانا شوية بشوية.. ماوصلش طبعا لدرجة مشروع ثقافي وقدوة للشباب والجو المريب ده.. بس مابقاش مجرد كافيه زي ما كنا بندعي.. تعلقنا بالمكان بقى شبه مرضي.. وبقينا رابطين بيه معظم الحاجات اللي في حياتنا.. الناس اللي بنحبها.. القعدة اللي بنحبها.. الأغاني اللي بنحبها.. حتى المشاكل والخناقات بقت دايما مرتبطة بالمكان بشكل أو بآخر.

مع الوقت أصبحنا ندور في فلك شقة جاردن سيتي.. وتحول الكافيه من مجرد شئ لمحور أساسي ومهم بتلف حواليه كل حاجة.. كلامنا وتفكيرنا وأحلامنا وخلافاتنا ولحظات انبساطنا.. هل كنا عايزين ده أو قاصدينه؟.. الإجابة لأ والله العظيم.. بالعكس.. بس عامة اللي حصل ماكانش مضايقنا أو معكنن علينا.. حاجة بره الخطة أه بش مش أزمة يعني.. شئ لطيف برضه إن الإنسان يحس إنه بيمتلك حاجة كبيرة ومهمة فارقة في حياته وحياة اللي حواليه.. الأزمة كلها حصلت لما اضطرينا نقفل.. هنا أدركنا الفخ.. إحنا بنخسر جزء مهم من حياتنا.. بنخسر المحور.. وأه وأه من خسارة المحور عزيزي الإنسان.

الكلام ده كله مش هدفه الأساسي الندب.. هو ده هدف أه بس مش الأساسي يعني.. إحنا بنقول كده عشان ندي الحق لكل شخص شاف أهمية المكان قبل ما إحنا نشوفها.. وكبر من قيمته قبل ما إحنا ندركها.. بنقول كده على سبيل الإعتذار لأي حد بعت يعبر عن حبه وامتنانه ناحية الشقة وإحنا بنا وبين نفسنا حاسيناه أوفر أو مبالغ في مشاعره.. إنتو كنتو صح يا جماعة.. إحنا اللي ماكناش فاهمين الموضوع كفاية من الأول.. تقبلوا تحياتنا واعتذاراتنا وأشواقنا كمان بالمرة.

ولا نجد ختاما للبوست أفضل من اللي قالته الست سعاد حسني.. أنا راح مني حاجة كبيرة أكبر من إني أجيبلها سيرة.. بس قشطة إحنا جبنا سيرة عادي.

21/10/2020

إذكر عدد واحد أغنية سمعتها عندنا لأول مرة وبعدها بقت من مفضلاتك.. وممكن تحط لينك برضه عشان اخواتك المهمشين البؤساء يسمعوها ويتبسطوا

21/10/2020

أو يمكن ربك مأذنش

اللي اشترى منك ما وزنش ... فمتحزنش ، ولا تشكيله مع إن الأحزان بالكيلو أو يمكن ربك ما أذنش . اللي اشترى منك أهو باع . ليك في العشق و ليه أتباع . ليك في الجرح ليالي و باع فمي...