21/07/2019
ازاي تشتري شنطه من على النت؟
كتير من الناس بتتلخبط لما بتشتري شنطه من النت و غالبا بيطلع الحجم اللي انت طلبو مش هو اللي انت شوفتو في الصوره فعشان كده احنا هنا عمالنا بوست عن ازاي تعرف تشتري الحجم اللي انت عايزو:
شنط الرحاله و الرياضه:
شنط الرحاله و النوادي بتقاس باللتر:
١٠ لتر:
بتستخدم غالبا للجيم او الامتحانات او لانها بتشيل حجات قليله زي ازازه مايه و علبه تونه او ممكن تشيل اقلام و اله حاسبه
٢٠ لتر: دي استخداماتها بتبقى اعلى شويه تعتبر ضعف حجم ال١٠ لتر دي بقى ممكن تروح بيها تلعب كوره ممكن تحط جزمه او تيشرت تغير بيه بعد الماتش
ال٣٠ لتر: شنطه وسط مابين الشنط الرحاله و شنط الاستخدامات الخفيفه .. ممكن تاخدها في سفريات من يوم ل ٤ ايام .. عمليه و بتشيل هدوم و فوط و حجات تانيه كتير
ال٥٠ لتر: شنطه ال٥٠ ليتر تعتبر بدايه شنط الرحاله و السفريات الطويله .. لو مسافر على طيران اقتصادي و حاجز من غير شنط فدي هتبقى مناسبه ليك تنفع لسفريات خفيفه و ينفع تعلق فيها خيمه و سليبينج باج بس طبعا يستحسن تعمل كده في الشنط اللي حجمها اكبر زي ال٦٠ و ٧٠ لتر
ال٦٠ لتر: و ده اخر مقاس ممكن تستخدمو جوه لمدينه او كشغل تشيل فيها لبس و لابتوب و عده شغل بشكل عام و طبعا ممكن تستخدمها كا كامبينج و تعلق فيها خيمه... المقاسات اللي بعد كده كلها بتبقى رحلات بس
ال٧٠ لتر مناسبه لو انت مسافر رحله طويله, تنفع كهاند باج في الطياران الاقتصادي و في نفس الوقت لو رايح كامب من السهل انك تشيل حاجات الكامب معاك في الشنطه
ال٩٠ لتر: دي زي ال70 لتر تنفع في كل اللي احنا قلناه فوق ده بس بيبقى عندك مساحه اكبر
ملحوظه: زي الجزم اوقات بيحصل اختلاف في مقاسات الشنط على حسب الشركه المنتجه ليها بس بتبقى اختلافات بسيطه فمثلا البراندات الاسيوي ال٩٠ لتر(Haiwang و Janshin) هتديك تقريبا نفس مساحه ال٧٠ لتر الغربي (Quechua و High sierra و Oyster) او اكبر بنسبه بسيطه
