04/05/2019
البوست ده لناس كتير اوي و عايز ناس كتير اوي تشوفه عشان الواحد اتخنق من الشعب اللي ملوش كتالوج ده
كان فيه فيديو انتشر ع السوشيال ميديا ليا انا و خطيبتي الفيديو ده جايب اكتر من ١٥ مليون مشاهدة ولقيت ناس كتير هجمتنا و ناس كتير اتمنولنا الخير و باركم لينا و كان عجبهم اللي حصل
● فلو الكلام عجبكم اعملوا شير للبوست ده عشان عايز ارد بيه علي كل الناس اللي اتكلمت بشكل وحش
اول حاجة عايز اتكلم فيها
▪ان الارتباط او الانفصال نصيب و محدش يقدر يتحكم فيه ده للعلم بالشئ 🙏🏻
▪تاني حاجة انا كنت عايز أقول للناس اللي مضايقين من علاقتي برحاب او علاقة رحاب بيا حضراتكم ممكن تركزوا في حياتكم افضل عشان والله لو ركزتوا في حياتكم ممكن تظبطوا الحاجة الوحشة اللي جواكم بدل ما أنتم ظهرنهالنا اوي كدة 😜😀
▪فيها ايه يا عم الامور انت يلي عامل فيها ٧ رجالة و عمال تقول ايه المسخرة و قلة الأدب دي عشان واحد بيحضن خطيبته في الشارع يا ابني انت و هو انت من عجزك او من بخلك انك تفرح الانسانة اللي معاك عشان كدة بتقول الكلام ده وبس والله انت لو مش بخيل مش هتقول الكلام ده اسمع مني انا حرقتك جامد انا عارف 😀
▪ست الكل القمر اللي قاعدة مستنية عريس في البيت و فاضية مورهاش حاجة غير انها تغلط في البنت اللي كل شوية حبيبها عاملها مفاجأة و مفرحها زي ما هيا كل شوية تعملى مفاجأة و مفرحاني لأنها مش لاقية حد يعملها كدة ما هو يا قلبي طول ما انتي مبتفرحيش للناس و السواد مالي قلبك عمرك ما هتلاقي الراجل اللي علشانك يعملك المستحيل او حتي يعملك الممكن 😂 أنضفي من جواكي و افرحي لغيرك و اقسم بالله ربنا هيبعتلك وقتها حد ابن حلال يعملك مليون حاجة زي اللي بعملها واحسن كمان بس ساعتها بقي فكرى لمدة خمس دقايق و شوفي انتي كنتي وحشة ازاى وانتي منفسنة علي واحد حب واحدة و عملها مفاجأة قدام العالم كله عشان يفرحها 😄
▪ إخوانا بقي بتوع يا سيدي فرحها بس مش قدام الناس و خلي الحضن اللي في الشارع ده في البيت ميبقاش قدام الناس عشان احنا في مجتمع شرقي و الجو ده احنا مش في أمريكا شوف بقي يا عم الحاج انا عايز اقولك انت اد ايه برنس و منافق و كداب و صلاتك حتي كدب لان واضح انك متناقض مع نفسك قولي ليه بقي هقولك اولا لان لو انت عامل حساب للناس و شايف ان ده غلط ادامهم بس اعمل كدة في الديرا يا ابن الناس الطيبة ربنا موجود و شايفنا سواء في العلن او في الدرى و ربنا بس اللي عالم بنيتنا و تاني حاجة انا بعمل اي حاجة انا مقتنع بيها و شايف انها صح و مبضرش غيري 💪
▪في ناس بقي تقولك ايه ده لو سابوا بعض مين هياخدها بعد بالأحضان دي هو ازاي خطيبها و بيحضنها
الناس دي بقي عايز اقولها يا استاذ او يا استاذة هو حضراتكم لما بتتجوزا او تتخطبوا او حتة ترتبطوا و بيحصل حضن او اكتر من الحضن بين حضرتك انت والمدام او انتي وجوزك و حصل انفصال لأي سبب ليه ما بتقولوش زي ما بتقولوا دلوقتي ايه ده مين هياخدها بعد متحضنت و اتباست من جوزها !😂 مع العلم اني مش هسيب رحاب غير لما اموت 💣👀👀
▪الناس بقي اللي مضايقة و و محروقة و بتتريق والجو ده كتير اوى منكم مشير كذا فيديو لأجانب بيعملوا مفاجأت من النوع ده وكتبين الله انا نفسي في كدة اوى ولا هو ليهم حلو و لينا وحش 🤔
▪ اكتر حاجة مستغربها بقي بصراحة ناس صحابي رجالة شباب و زي الفل و مقتدرين ماديا و بيجوا بيقولولي انا اعمل مفاجأة ايه لصاحبتي او خطيبتي او مراتي و قعد اقولهم افكار تفرح اي بنت في العالم واقولك يعملوا ايه و يجيب ايه منين و الجو ده و في الاخر الاقيهم في اي قاعدة يقولك ايه الجنان و القرف ده و الخ الخ الخ وعامل فيها ام إسماعيل اللتاتة اللي مورهاش غير التلقيح ع الناس و ابص الاقيهم بعد ما يروحوا و يدخلوا اوضتهم و يتأكدوا ان مفيش حد جنبهم بيقولولي و النبي عايز اعمل مفاجأة زى دي لخطيبتي لما المفاجأة عجبتك و نفسك تعمل زيها بتغلط ليه و انت ادام الناس يا ابني يا اسود من جوه منك ليه افرحوا لغيركم والله ربنا هيكرمكوا 👍
▪حاجة اخيرة بقي الناس اللي تقولك ايه الفلوس و الصرف ده كله اولا اقسم بالله الموضوع مش مكلف علي اد ما انت بتحس بمتعة تدفع فيها عمرك كله لمجرد انك هتبسط الانسانة اللي معاك و هتخليها مميزة لان كل راجل فينا نفسه حبيبته تكون احسن حد في الدنيا زي احساس الأب و الام اللي نفسهم ابنهم او بنتهم يكون فرحان و يكون احسن حد في الدنيا 😍
▪وحاجة تانية اللي ليه فلوس يجي ياخدها او اللي بيديني المصروف يمنعوا عني 😜
▪وطبعا عايز أقول لكل الناس اللي علقت ع الفيديو بشكل كويس او بإنتقاد محترم شكرا جدا ♥️ أعزمكم في فرحنا ان شاء الله
و حاجة اخيرة رسالة للست االلي قدرت تزرع نفسها في وسط قلبي وقدرت تكون خطيبتي و بنتي و صاحبي و امي وكل حاجة في الكون بحبك اووووى و لو طولت اجيب الدنيا كلها تحت رجلك هعمل كدة لان كلام الناس ادام حبي ليك ملوش اي لازمة ❤😍❤
وده الفيديو بعد المونتاج عشان اللي محروق مننا يعمل زينا 😂
▪اسف طولت عليكم بس يارب تكون الرسالة وصلت
● من فضلكم اللي عجبه كلامي يعمل شير للبوست ده عشان عايز ارد بيه علي كل الناس اللي اتكلمت وحش
