30/06/2023
شفت بنات بيسألو عن العطور السودانية و طريقة اهتمام السودانيات بالتعطير والتبخير فقلت اكتب ليكم بوست احسن .
اولاً نحن من اهم عادتنا في السودان انو العروس بيتجاب ليها حاجة اسمها شنطة الريحة ( دي شنطة كاملة بيكون فيها تفاصيل عطورنا )
شنطة الريحة دي بكون فيها كمية من اعواد الصندل و حطب البخور و عطور زيتية وعطور مائية و كمية من الحاجات الببتعمل بيها ريحة العروسة وبخورها
الريحة البتتعمل للعروس اسمها الخُمرة وفيها منها انواع ( خمرة مسك وخمرة محلب و خمرة ضفرة .... والخ )
وكمان البخور بيتعمل للعروس ب انواعه ( بخور صندل وعنفر .. والخ )
واهم شي الدلكة السودانية اللى هي حاجة شبه الاسكراب (عجينة معملومة بطريقة معينة معطرة بعطورنا السودانية)
عندنا يوم كامل مخصص فترة العرس اسمه يوم دق الريحة بيتلم فيه كل الاهل والجيران والنسوان المتخصصات في عمل الريحة وبيشتغلو ع ريحة العروس
كمان عندنا عادة مهمة اسمها الدُخان وهو انو اي متزوجة بتتبخر بحطب طلح ( الواحدة بتولع حطب طلح وبتلبس ملحفة او بطانية و بتخت اعواد الطلح تحتها يا اما في حفرة او في علبة او حاجة تتسمى عندنا الرحالة ) وبتقعد فترة من ١٠ ل ٣٠ دقيقة لين يتبخر جسمها كله وبعدها تعمل ترطيب بزيوت ( تركيبة زيتنا السوداني اسمه الودك ومعاه زيت زيتون ولوز مر )
البيت السوداني مستحيل يخلى من الحاجات دي
اتمنى اكون افدتكم ❤️❤️😊😊
