Altantawy mobil

21/02/2022

13/10/2019

-لما كتبت في 2017 إن الدولار هاينزل بشكل كبير الفترة القادمه وكتبت وقتها مجموعة بوستات عن أسباب النزول من وجهة نظري ونصحت الناس وقتها إنها تبيع الدولار ده لم يكن نوع من التنجيم لكن أي تنبؤ بيبقي ليه أسباب منطقية بعيده عن العواطف خصوصا إني شخصيا شغلي بنسبة 95% في مجال التصدير ومصلحتي الشخصية إن الدولار يرتفع لكن فيه حاجه إسمها الأمانة العلمية وتجنب العواطف عند التحليل بتخلينا نفهم إيه اللي هايحصل في المستقبل لأن الإدارة هي (فن التنبؤ بالمستقبل ) ودي أحد تعريفاتها وده لأن فيه أسباب منطقيه بتؤدي لنتايج واضحه ....
أنا هاكتب مجموعة من النقاط متفرقه بتخليني أقول إن الوقت الحالي مناسب لشراء عقار سواء للسكن أو لحفظ قيمة الفلوس أو للاستثمار ودي طبعا وجهة نظري اللي مش لازم يكون الجميع متفق معايا فيها ...
1-الطلب علي العقار في مصر طلب حقيقي حيث إننا في مصر عندنا أكتر من مليون حالة زواج سنويا تقريبا .
2-حلم كل شخص في مصر كبير أو صغير ومن أي مستوي إجتماعي هو إمتلاك عقار خاص بيه سواء العقار ده شقه أو فيلا أو عماره بل يمتد الأمر أحيانا إلي الأبناء والأحفاد في ظاهرة نادره علي مستوي العالم ...
3- التمويل العقاري البنكي لا يتجاوز في مصر 18% وده رقم قليل جدا وال 82% هو تمويل ذاتي لذلك فوجود هزات عنيفه هو أمر مستبعد لأن الناس بتصبر وقت الركود وعندنا في مصر مقوله بتقول (العقار لا بياكل ولا بيشرب ) .
4-ضعف بيئة البيزنس وعدم نضجها وعدم وجود أدوات استثمارية قوية بيجعل العقار هو الخيار الوحيد للاستثمار لأغلبية الشعب المصري .
5-العقار في مصر بعيدا عن الاستثمار هو مخزن قيمه بيحافظ لأي حد علي قيمة الفلوس أفضل من البنك وده ظهر بوضوح بعد تخفيض قيمة الفائدة علي الودائع .
6-لو اجتمعت بأي مصري مغترب وسألته إيه نتايج غربتك مثلا هاتلاقيه خلال 10 أو 12 سنه دخل شراكه وهو بعيد فخسر فلوسه أو دفع فلوسه لنصاب هايديله عائد شهري وأكل الفلوس وهاتلاقي كل أرباحه إنه اشتري أرض أو شقه وسعرها زاد أو استثمر في عدد من الشقق وأجرها بحيث لما يرجع مصر يلاقي دخل ثابت علي ما يرتب ظروفه وينظم نفسه أو حتي ياخد قرار بالرجوع أصلا .
7-كان فيه حد من اللي نصحتهم يبيع الدولار عند 18 ج بيكلمني لما الدولار وصل لقرب ال 16 ج وزعلان فقلتله إني نصحته فرد عليا إن لما الدولار فضل وقت كبير علي سعر عالي هو تخيل إنه هايفضل كده وإنه نزل فجأه يعني في وقت قليل جدا نزل مبلغ كبير رغم ثباته سنتين ودي بقي نقطه مهمه يعرفها الناس بتوع البورصه وهو موضوع التجميع عند نقطه معينه فتره طويله والصعود أو النزول بيحصل فجأه بعدها وفيه عباره مشهوره (إن السوق ما بيستأذنش حد) يعني ممكن تشتري النهارده برقم معين وتفضل عنده وقت طويل وكمان ينزل السعر عن اللي انت شاري بيه وفجأه تلاقي السوق بيجري لفوق بدون أي مقدمات ....
8- لازم نفهم إن مفيش حاجه بتفضل تطلع علي طول وإلا كان كل الناس في العالم اشترتها فقط لكن لازم يبقي فيه موجات والعقار مثلا أنا من ساعة ما وعيت علي الدنيا بيشتغل 5 ل 6 سنين وبعدين يريح سنتين تلاته وده طبيعي جدا وحتي وقت الترييح ما بينزلش نزول رهيب .
9- وقت الأزمات تصنع الثروات....دايما فيه لعبه بين البايع والشاري (جيم ) وبتفرق مين اللي بيكسبها علي حسب السوق ....لو السوق شادد غالبا البائع هو اللي بيملي شروطه ولو السوق نازل غالبا الشاري هو اللي بيكسب الجيم ففرصة أي حد بيشتري دلؤقتي إنه بيقدر يوصل لأعلي شروط التعاقد اللي ينفع البائع يقبلها .
10 –سوق العقار في مصر ليس سوق واحد بل مئات الأسواق علي حسب المستوي المادي (فاخر ولا متوسط ولا اقتصادي ولا شعبي ) وعلي حسب نوع العقار (تجاري ولا سكني ) وعلي حسب الاستخدام (منزل ولا مصيف ) وعلي حسب المكان (القاهره ولا اسكندرية ولا محافظات ) وعلي حسب الحضر (المدن غير القري) ولو أرض (زراعة ولا كردون ولا بناء ) .........إلخ .
فمن غير الممكن وضع السوق كله في ميزان واحد بالرغم من تنوعه ...
كل الأسباب اللي فوق دي هي اللي بتدفعني إني أبقي معتقد إن أنسب وقت لشراء العقار هو وقت الركود مش وقت الصعود وده رأيي والله أعلم وبالتوفيق للجميع ......