OZOCOgz

11/06/2026

10/06/2026

Acabado de chegar «ANDRÉS DOBARRO. A xénese do pop en galego», da autoría de Fernando Fernández Rego, autor tamén do libro sobre Suso Vaamonde que tivemos o gusto de presentar en OZOCOgz.
Nesta ocasión Fernández Rego achéganos á intensa vida de Andrés do Barro, marcada polo éxito e o baleiro que este trouxo consigo, así como aos tempos convulsos que lle tocou vivir, de par que nos ofrece un retrato da Galicia da época, das primeiras formacións beat, do Movemento Popular da Canción Galega e da censura que operaba nas emisoras que emitían cancións en galego, catalán e éuscaro. Un percorrido para coñecer a figura do cantante ferrolán, que deu prioridade ao seu amor pola terra e a xente, e que hoxe se reivindica pola súa modernidade e o labor pioneiro na fusión da música popular co pop.

09/06/2026

E en xullo...
Unha sorpresa que xa non o é tanto!!!
Concertazo de Icía Varela e as xaponesas Yoshimi Tsujimoto e Haruna Chatani en OZOCOgz!!
Seguiremos informando.

09/06/2026

O xoves 25 de xuño van estar no noso espazo tres dos protagonistas da Flotilla Sumud Global que foron detidos polo goberno de Israel en augas internacionais, cando se dirixían a Gaza con axuda humanitaria.
Eles son Duarte Ferrín, Benito González e o carballiñés Alberte Pagán.

09/06/2026

Diante de novas coma esta: https://www.nosdiario.gal/articulo/politica/pp-volve-atacar-moncho-reboiras-rexistra-proposicion-parlamento-retirar-figuras-sua-lembranza/20260604102341258347.html convén estar ben informados.
Esta biografía de Moncho Reboiras feita por Xosé Manuel Pereiro e Xurxo Martínez González, publicada por AiraEditorial vaivos dar argumentos para quen insiste en chamar asasino a quen só defendeu as liberdades do noso pobo.

08/06/2026

Chegaron!!!!!!!
«UN GOURMET NA BREOGANIA. A cociña de Frank Soutelo», o libro de Mariña Arbor, sobre o personaxe das novelas de Miguel Anxo Fernández xa está dispoñíbel en OZOCOgz!

O libro segue os pasos, a modo de guía literario-gastronómica, do detective Frank Soutelo, protagonista da serie de novela negra da autoría do escritor Miguel Anxo Fernández. O volume, que ten moito de memoria persoal da autora, non é unha simple guía polos restaurantes que o sabuxo visita na Galiza: é unha evocación e selección de pratos da cociña tradicional galega, con receitas probadas pola mesma autora, pura delicia culinaria, adobiada cunha ampla selección fotográfica e mellores notas literarias.

Se es fan da obra de Miguel Anxo, este libro vaiche resultar imprescindíbel.

Tamén en liña: https://ozocogz-atenda.com/p/un-gourmet-na-breogania-a-cocina-de-frank-soutelo-marina-arbor-aldea

08/06/2026

Onte tocou ir até Meirás, apoiar unha gran iniciativa que este ano puxeron a andar dende o Consello Cívico Meirás, unha asociación nada para divulgar, democratizar e poñer en valor a historia do Pazo de Meirás. A iniciativa foi o 1º Día de Meirás, foron dous días cheos de actividades na que non faltaron música, obradoiros e reivindicación.
Os nosos parabéns e agradecementos para a organización, unha chea de mozas e mozos comprometidos co pasado e co futuro deste noso país.
Mágoa non podermos visitar o recinto do Pazo de Meirás, as visitas tiñas que terse concertado con anterioridade, polo que facemos un chamamento a quen corresponda para que, ademais do recoñecemento como ben público, este se materialice en facilitar máis a entrada a este espazo espazo.
Voltaremos!!
Grazas tamén á Asociación Cultural Irmáns Suárez Picallo, asociación que vos convidamos a coñecer, que leva xa 13 anos movendo culturalmente o Concello de Sada e que edita unha revista cultural -Areal- interesantísima.

David Gesteira
Xose Constenla

08/06/2026

Foi unha fin de semana intensa e non houbo tempo de amosar a reportaxe acostumada -obrigada- da presentación que fixemos este venres pasado (5 de xuño 26) no Museo Etnolóxico de Ribadavia.
Unha chulada!!
Só fican, como é debido en xente educada coma nós 😉, os agradecementos, comezando, por suposto pola boa xente do museo, encabezados pola súa directora María Pilar Núñez; agradecer tamén aos autores das publicacións «Universo Cantigas», tanto a súa presenza como a clase maxistral e gratuíta que, sobre as cantigas medievais, nos deron; grazas Manuel Ferreiro, Bieito Arias e Mariña Arbor -amiga coa que sempre estamos aprendendo-.
Obrigados tamén, dun xeito especial, a Luparias (Elisa e Serena) polo fermosísimo concerto de música antiga, vaia par de artistazas!
E, como non pode ser doutro xeito, a todas e todos as e os que vos achegástedes até o museo investindo o voso tempo de ocio nunha actividade cultural.

05/06/2026

Máis actividades preparadas para este mes no que andamos.
Sábado 20 de xuño, en parzaría coa Asociación da Memoria da Castela Galega, presentación do libro «ROTSPANIER. Un miliciano galego no exilio francés 1939-1945».
O autor estará acompañado por Manuel Vázquez, presidente da AMCG.

Juan Galán recolle en Rotspanier a peripecia vital de Joaquín Fernández Millán, mariñeiro de profesión da Pobra do Caramiñal, emigrado ao País Vasco na década de 1920, que loitou como miliciano no Exército de Euskadi. Como tantos outros españois, a inicios de febreiro de 1939 cruzou os Pireneos para exiliarse en Francia, onde sería internado en campos de concentración durante a Segunda Guerra Mundial, forzado a traballar en compañías de traballo (CTE e GTE) na zona controlada polo Goberno de Vichy, e, posteriormente, para a Organización Todt, na zona ocupada polos n***s, na construción do Muro Atlántico.
É esta unha obra de grande interese pola información que nos proporciona sobre eses miles de republicanos (os Rotspanier) que fuxiron de Franco para caer nas mans de Hi**er.

Manuel Vazquez