23/08/2026
🧀💙 Queserías del Eume, sabor pontés que xa cruza fronteiras
Hai empresas que forman parte da memoria, da economía e tamén do sabor dun pobo.
É o caso de Queserías del Eume, unha marca familiar que naceu en 1960 da man de Francisco Díaz, avó de Ana Prieto, actual directora da empresa. Primeiro en Goente e, desde 1984, xa na fábrica da Faeira, nas Pontes.
Hoxe, Queserías del Eume continúa medrando, gañando mercado dentro de Galicia e abríndose paso tamén noutras zonas de España e mesmo fóra, especialmente en Estados Unidos e Alemaña.
Da súa fábrica saen actualmente nove variedades de queixo, entre elas o tradicional requeixo, o clásico queixo galego tenro e cremoso, a variedade en barra —cada vez máis demandada— ou O Mirador do Eume, premiado en certames nacionais e internacionais.
A clave, como sinala Ana Prieto, está na calidade da materia prima, con leite da zona recollido directamente nas granxas, no traballo artesanal, no coidado do produto e nunha atención próxima á clientela. Un xeito de facer as cousas que mantén viva a esencia dunha empresa familiar na que xa se incorporou a cuarta xeración.
Desde Orgullo Pontés queremos poñer en valor este exemplo de empresa local que crea emprego, aposta polo produto de proximidade e leva o nome das Pontes e do Eume cada vez máis lonxe.
Parabéns a todo o equipo de Queserías del Eume por seguir medrando sen perder as raíces.
💙 Isto tamén é Orgullo Pontés.
