09/08/2026
Toosnaanta ka dib waxaa iman kara imtixaan. 🤍
Marka aad go’aansato inaad joojiso dhageysiga heesaha iyo muusigga, waxaa laga yaabaa in heesihii aad jeclayd ay mar walba kuu soo muuqdaan…
Marka aad go’aansato inaad toddobaad kasta lacag cayiman sadaqo bixiso, waxaa laga yaabaa inaad la kulanto xaalad dhaqaale oo kugu adkaata…
Marka aad go’aansato inaad ka fogaato xanta iyo hadallada dadka, waxaa laga yaabaa inuu qof kuu yimaado oo uu qof kale kaaga sheekeeyo, isagoo si xamaasad leh kuugu sheegaya wixii dhacay…
Taasina waa qayb ka mid ah imtixaanka.
Alle wuxuu yiri bilowga Suuratul-Cankabuut:
﴿أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ﴾
﴿وَلَقَدْ فَتَنَّا الَّذِينَ مِن قَبْلِهِمْ ۖ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ﴾
“Dadku ma waxay u malaynayaan in loo dayn doono inay yiraahdaan: ‘Waan rumaynay,’ iyagoon la imtixaanin? Runtii waxaan imtixaannay kuwii ka horreeyay, si Alle u muujiyo kuwa runta sheegay iyo kuwa beenta sheegay.”
(Suurat Al-Cankabuut 29:2–3)
Kadibna dhammaadka suuradda Alle wuxuu yiri:
﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ﴾
“Kuwa u dadaala annaga dartay, hubaal waxaan ku hanuunin doonnaa jidadkayaga. Runtii Alle wuxuu la jiraa kuwa wanaagga sameeya.”
(Suurat Al-Cankabuut 29:69)
Sidaas darteed, marka aad waddada toosan qaaddo oo imtixaan kula kulanto, ha u malayn in Alle kaa tagay.
Waxaa laga yaabaa in imtixaankaasi yahay meesha lagu tijaabinayo runtaada, samirkaaga iyo adkaysigaaga.
Sii wad. Ha ka noqon wanaagga aad bilowday. Alle ayaa ku arkaya. 🤍
W/Q: Arwo abshir.
