TomatoDuck

06/09/2026

19/08/2026

小小分享｜6日5夜 · 10個人 · 一個「家」🏡🇬🇧

今次6日5夜之旅，一行10人、4個家庭——全部都係孻仔🤣（俗稱「孻仔團」😂）

有60s、70s、90s、00s；
有傳道人、有平信徒、有非信徒。

本來諗住只係一趟旅行，
點知旅程完咗，我最深嘅感受竟然係：

「原來，神可以將一班咁唔同嘅人，放埋一齊，成為一個家。」

今次旅程當然唔係所有嘢都按計劃進行。
有人有自己嘅喜好，有行程要調整，有原本想去嘅地方最後去唔到。

但奇妙嘅係——
我哋仍然玩得好開心。

一齊傾偈、一齊分享、一齊煮飯、一齊玩遊戲，
甚至一齊學習神嘅話語。

我睇到好多包容、耐心、細心同謙讓。
原來旅行真正珍貴嘅，唔一定係去咗幾多個景點，
而係同邊一班人，一齊經歷咗啲咩。

☀️ 今次仲第一次親眼見到日偏食，
☄️ 又第一次睇到流星雨。

有啲畫面無辦法拍低，
但全部都一一印咗喺腦海入面。💭

而其中一幕，我可能一世都記得。

我同一位姊妹一齊睇日蝕。
我哋兩個拎住手機影來影去，都影唔到。

突然，有位婆婆拍一拍我哋，
借咗副專門睇日蝕嘅眼鏡俾我哋。

一戴上去——
好清楚。

我哋兩個即刻望住對方，
好似癲咗咁🤣🤣🤣

「好正呀……」
「好正呀……」
「好正呀……」🤩🤩🤩

係呀。

真係好正。

但後來我諗返，
原來真正令我覺得「好正」嘅，
唔只係嗰次日蝕。

而係我哋之間呢一段，
我從來夢寐以求、卻未必曾經擁有過嘅關係。

一位年齡大概同我媽媽差唔多嘅姊妹，
我哋一齊讀 BSF、一齊食飯、一齊玩遊戲，
有傾唔完嘅話題。

當我哋有經濟困難時，
佢主動伸出援手；

當我失意時，
佢為我禱告。

唔只係口頭上講「支持你」，
而係真真正正用行動去支持。

我甚至感受到，老公都非常享受呢份連結。🔗

我曾經以為，
有啲「家人般嘅相處」，
可能只係我夢寐以求嘅東西。

但神卻好似同我講：

「你所缺乏嘅，我可以用另一種方式賜俾你。」

原生家庭沒有經歷過嘅，
神竟然一點一點、白白賜俾我哋。😝🩷

⸻

仲有林司機🤣

一路上真係非常包容、非常有耐心，
係今次旅程嘅擔當🏁🏁

下次到我哋出車，
你就可以坐低欣賞沿途風景啦☺️

⸻

仲有大伯（你既名字同老公大叔既名一模一樣，本有一份親切）

因為今次旅程，
竟然有機會真正深入認識你。

到底有幾耐冇試過通頂傾偈？

如果平時嘅我，
可能已經自動熄機瞓覺😴

但嗰晚唔知點解，
我竟然一直聽落去。

一邊聽，
一邊又諗起自己嘅經歷。

有好多相似，
但又有好多唔一樣。

要一路走過嚟，
走到今日，
真係唔容易。

想送你一首歌——
🎵《泥土音樂｜恩典夠用》

呢首歌曾經陪伴我渡過無數迷惘、黑暗嘅日子，
直到最後，終於迎來光明。🌈

希望佢有一日，
都可以成為你生命中嘅一首歌。

⸻

仲有熱心夫婦。

由我哋初到英國開始，
你哋就無條件咁幫助我哋。

食、住、行，
一樣一樣帶住我哋適應呢個陌生嘅地方。

多謝你哋嘅接待，
多謝你哋嘅接納。

亦多謝你哋帶領老公決志信主。

由最初到英國，
到今日一齊查經、一齊學習神嘅話語，
再到繼續喺信仰路上奉獻，

全部都係滿滿嘅愛。🩷🩷

⸻

仲有傳道。

多謝你悉心預備，
一次又一次講解神嘅話，
餵養羊群。

而你所分享嘅，
亦令我再次深思教會嘅狀況，
亦成為神對我嘅提醒。💭

⸻

回望今次旅程，

你哋每一位，
都好似喺度告訴我：

乜嘢係真正嘅基督嘅愛。

亦讓我重新明白：

神嘅家，可以係點樣。

我哋本來只係兩個孤身隻影，
由香港走到英國。🇭🇰➡️🇬🇧

一路走到今日，
神放咗好多唔同嘅人喺我哋生命入面。

有人陪我哋走一段，
有人教我哋一啲嘢，
有人喺我哋軟弱時扶我哋一把，
亦有人令我哋知道——

原來喺異鄉，都可以有「家」。

而呢一趟旅程，
對我嚟講，

係一份好棒、好棒嘅生日禮物。🎁

今年生日，
暫時係人生中收到最多祝福嘅一次 N個生日蛋糕🎂

Lake District之旅、
英國小組、
香港青年小組、
登登小組、
家人、
香港老朋友……

一份又一份嘅祝福。

多謝神。
亦多謝每一位出現喺我生命入面嘅你哋。🩷

⸻

「盜賊來，無非要偷竊、殺害、毀壞；我來了，是要羊得生命，並且得的更豐盛。」

— 約翰福音 10:10（和合本2010）

「我賜給你們一條新命令，乃是叫你們彼此相愛；我怎樣愛你們，你們也要怎樣彼此相愛。你們若彼此相愛，眾人因此就認出你們是我的門徒了。」

— 約翰福音 13:34–35（和合本2010）

#神的家 🍅🪿

24/07/2026

呢個 7 月，好似有啲特別。

短短幾個星期，接二連三發生好多事情。

先係懷疑食物中毒，兩個人肚脹、肚瀉、冇胃口、冇精神，估計係雪櫃唔夠凍，食咗變壞嘅食物。

之後因為買生果嘅小事，吵架。

終於開始期待已久嘅花園工程，又因為工具不足而覺得沮喪。

好唔容易清完雜草，開始鋪 Decking，我滿心期待一齊學習英國人點樣整花園，希望將來可以應用喺自己屋企，甚至成為一門技能。

但原來我同老公心裡面諗嘅唔一樣。

我想繼續做。

佢只想休息。

結果，又再一次因為彼此堅持而吵架。

去到今個星期，老公突然腸胃炎，肚脹到幾日都去唔到廁所。

我哋一路都問：

「究竟發生緊咩事？」

但一路回望，卻又發現神一直都喺度。

雪櫃壞咗，業主當日就安排另一部。

我情緒崩潰時，有 Margaret 聽我傾訴，同我一齊禱告。

當我哋發現夫妻之間不停因為小事磨擦，開始反省：

會唔會，係時候重新學習信靠神？

於是我哋重新拎起兩本書——《為自己禱告》同《為妻子／丈夫禱告》。

呢兩本書，係去年移民英國前，屬靈媽媽送俾我哋嘅禮物。

一年後，神又提醒我哋重新打開。

更加奇妙嘅係，屬靈媽媽竟然喺呢段時間突然 WhatsApp 我，關心我哋夫妻近況，仲傳咗《神所賜的全副軍裝》禱文俾我哋，希望我哋每日返工前一齊讀。

有趣嘅係，我哋真係好想堅持。

但總係忙住忙住就忘記。

第一日，返到公司先讀。

第二日，我自己幫埋老公讀。

第三日，隔住電話一齊讀。

直到有一晚，我哋讀到《為自己禱告》第六天。

內容竟然就係《以弗所書》第六章——神所賜的全副軍裝。

我同老公對望咗一眼。

心裡面都諗：

「咦？咪就係我哋最近開始每日讀嗰篇禱文？」

好多事情，我解釋唔到。

點解偏偏係呢個時間？

點解偏偏有咁多提醒？

點解偏偏一路將我哋帶返去禱告？

我開始明白。

神未必第一時間改變環境。

但祂一直改變我哋。

以前我成日以為，問題係對方。

後來發現，其實我自己都有好多地方需要被神改變。

我哋都知道自己有啲說話方式唔好、有啲脾氣唔好、有啲習慣唔好。

亦真心想改。

但總係改一陣，又打回原形。

直到讀到《羅馬書》：

「我真是苦啊！誰能救我脫離這取死的身體呢？感謝神，靠著我們的主耶穌基督就能脫離了。」（羅馬書 7:24-25）

原來真正需要改變嘅，唔係環境。

而係我哋嘅心。

我哋靠自己努力，可以忍耐一陣。

但唯有靠主耶穌，先能夠真正改變生命。

好多人都話：

「如果我見到神，我就會相信。」

但對我嚟講，神好多時唔係用轟轟烈烈嘅方式出現。

而係透過一件又一件看似平凡、甚至充滿混亂嘅事情，引導我哋回到祂面前。

當我願意停低，用心聆聽。

先發現，

原來神一直都冇離開。

感謝主。

祢真係又真又活嘅神。

願祢親自在我哋家中作王。

教導我哋點樣禱告、點樣彼此相愛、彼此建立。

願我哋唔單止經歷恩典，

更能夠結出三十倍、六十倍、一百倍嘅果子。❤️

🍅🦆

#信仰分享 #香港人在英國🇬🇧 #神的恩典 #禱告生活

07/07/2026

🇬🇧 Garden Transformation｜Day 2

Stage 1 ✅ COMPLETED

兩晚之前，呢度仲係一片被黑莓藤同野草完全佔領嘅荒地。

今晚，最後一堆草終於清走。

兩個人，兩個晚上，
流咗好多汗、俾好多刺拮親，
但終於可以第一次睇見花園真正嘅模樣。

有時夢想唔係一夜之間完成，
而係由一鏟泥、一條藤、一個晚上慢慢累積出嚟。

這只是開始。

🏡 Stage 1：Clear the Jungle ✅

下一步正式進入：

🚧 Stage 2：Build the Foundation

* 🌱 清除黑莓餘根
* 🚛 運送 Decking 材料
* 🪨 鋪設石仔（Hardcore / MOT Type 1）
* 📏 平整地面
* 🛠️ 建立 Deck Frame

距離 TomatoDuck Resort Garden，又近一步。

To be continued… 🌿

03/07/2026

🇬🇧 移英大挑戰之一：拯救荒廢花園 Day 1 🌿💪

由搬入呢間屋開始，就知道總有一日要面對呢個「終極 Boss」😂

一個大約 4.5m × 15m、被黑莓藤同野草完全佔領嘅後花園。

今晚由 20:30 開工到 22:00，
用最基本嘅工具：
🔧 草叉
🪚 小電鋸
✂️ 電線剪

兩個人努力咗個半鐘，目測完成咗大約 1/6。

原來最辛苦唔係剪，而係：
🌿 黑莓藤有刺又纏到周圍都係；
🪵 根深到超乎想像；
💪 搬草仲攰過剪草🤣

不過，每清走一小塊地方，就好似離夢想近一步。

我哋希望有一日，呢度唔再係荒地，而係一個屬於我哋兩個嘅 Resort Garden。

可以：
☕ 飲咖啡
🛋️ 坐喺梳化放空
🌸 睇住櫻花
🔥 同朋友 BBQ
🎥 拍攝 TomatoDuck 嘅每一個故事

呢個工程應該會持續幾個星期，甚至更耐。

但我相信：

真正嘅改變，都係由第一鏟泥、第一條藤開始。

歡迎大家一齊見證我哋嘅花園重生🌱

⸻
TomatoDuck Garden Project

Day 1 Progress 除草開始 🌿
✅ 20:30–22:00
✅ 約完成 1/6
⏳ To be continued…

#英國花園 #除草日記

15/06/2026

又過咗充實嘅一個星期 🫔

今個星期可以話係由包糭開始🤣

星期二有姊妹開放屋企，邀請大家星期六一齊包糭；而我哋又想趕及星期五放假前送糭俾同事，所以星期三開始醃五花腩，星期四放工即刻返屋企浸糯米、綠豆、冬菇、瑤柱，食完飯又出去朋友屋企攞嘢，再返屋企開工包糭。

最後成功包咗10隻，完成目標✅

不過老實講，真係有啲chur🫠

再加上月頭轉咗新工作崗位，要重新適應新同事同新工作內容，每日返到屋企都覺得有啲力不從心。

最近每日禱告都係：

「主呀，求祢俾智慧我，俾力量我適應新工作。」

但其實我唔知道神會用咩方法回應我。

到咗星期五晚，我真係有諗過：

「包完呢轉算啦，星期六留俾自己休息啦😖」

因為我知道一出席聚會，就預咗玩足全日，再加埋晚餐，而通常落廚嗰個又係我🤣

即係話：

去 = 冇得休息

但最後我同老公都決定應邀。

因為自從返工之後，真係好耐冇同大家聚埋一齊；而且心裡面都好想同大家分享更多糭。

於是星期六執好架撐、糭料同晚餐材料，出發🤪

結果真係玩足一整日。

包糭、剪頭髮、煮晚餐、傾計、分享近況。

笑聲由朝到晚冇停過。

同你哋一齊嘅時候，好似突然多咗好多家人。

有愛、有接納、有溫暖🩷

而最意想不到嘅係——

我原本以為自己已經攰到冇電。

但返到屋企之後，嗰種疲倦感竟然消失咗。

個人好似叉爆電咁⚡

到今日星期一返工，都冇以前嗰種死氣沉沉嘅感覺。

我一路諗：

難道呢個就係神工作嘅方式？

我以為休息係留喺屋企唔做嘢。

但神畀我嘅休息，卻係透過團契生活、透過服事、透過弟兄姊妹嘅陪伴。

對身體而言，我係攰嘅。

但對靈裡而言，我卻係充滿力量。

心裡面有一份好深嘅喜樂。

原來有時候，神唔一定按我諗嘅方式回應禱告。

但祂總會用最適合我嘅方式供應我。

為此我要感謝讚美主。

祢真係聽禱告嘅神 ❤️

亦感謝呢班家人一路嘅陪伴同歡笑。

願我哋繼續一齊分享生命、一齊經歷恩典 🫶

#感恩日記 #團契生活 #端午節 #神的恩典

「疲乏的人，我賜能力；軟弱的人，我加力量。」（以賽亞書 40:29）

有時我哋以為神會透過「減少事情」去幫助我哋，結果神卻透過「增加愛與同行的人」去恢復我哋。

12/06/2026

📸 朝聖之路一週年回顧 Day 8 ⛰️🏕️

一年前嘅今日，正正係我哋踏入朝聖之路第二個星期嘅開始。

其實一直都想喺IG記錄返呢段旅程，但唔知點解，一直都動唔起身。

上年今日，我哋由 Logroño 行去 Nájera，約29.6公里。

相比起第一個星期翻越比利牛斯山、每日適應長距離步行嘅辛苦，身體已經開始習慣咗朝聖者嘅生活節奏。

天未光就出發，行走喺寧靜嘅街道，穿梭喺城鎮、鄉村同田園之間。沿途見到越來越多葡萄園，腳步雖然慢，但心卻好自由。

攰嘅時候，就入小店坐低食啲嘢；冇小店，就坐喺路邊食背包入面嘅乾糧。有時路上仲會遇到當地人為朝聖者設置嘅 donation 小攤檔，提供水果、小食同飲品。

當日我哋就好幸運遇到一個。

對朝聖者嚟講，呢啲未必係咩珍貴食物，但嗰份來自陌生人嘅善意，卻令人覺得好溫暖。

身體係會攰嘅。

但心靈，卻好似每日都充滿電一樣。

沿途繼續認識唔同國家嘅朝聖者，而當我哋快要進入 Nájera 嘅時候，竟然重遇第一日喺比利牛斯山遇見嘅一位荷蘭伯伯。

見到佢嗰刻，真係有種老朋友重逢嘅感覺。

佢已經七十幾歲，但依然每日堅持一步一步行落去。

佢係我哋喺朝聖路上第一位停低同我哋傾偈、分享故事嘅朝聖者。

佢曾經鼓勵我哋：

「要有信念去嘗試。唔使怕跌倒。你永遠唔知道自己最後會唔會成功，但如果唔開始，就一定唔會成功。」

呢句說話，我到而家都仲記得。

而更令我佩服嘅係——

當我哋由法國出發，預計用一個月行到終點時，原來我哋第一次遇見佢嗰日，佢已經由自己屋企荷蘭🇳🇱出發，足足行咗兩個月。

所以當我哋再次見到佢嘅時候，心裡面除咗感動，更多嘅係感恩。

感恩佢仍然繼續行緊自己想行嘅路。

⸻

對我而言，朝聖之路本身就係一個「不可能任務」。

移民、工作、經濟、婚姻關係……

當時好多現實因素都話俾我聽：

「你唔應該去。」

其實喺未移民英國之前，我偶然喺 YouTube 睇到一條關於朝聖之路嘅影片。

嗰刻心裡面有一種莫名嘅感動：

「有生之年，我想行一次。」

但一想到要抽一個月時間出嚟，就覺得根本冇可能。

反而移民英國初期，未正式搵工之前，時間上似乎出現咗一個空檔。

然後下一個問題就係——錢。

兩個人完成旅程，大約需要二萬至二萬三千港幣。

對我哋呢啲普通經濟移民嚟講，並唔係一筆細數目。

偏偏喺出發前不久，老公收到前公司補發嘅人工。

金額竟然同預算差唔多。

當時我心裡面真係覺得好奇妙。

而另一個更大嘅挑戰，其實係婚姻關係。

移民初期，大家都要重新適應新生活、新身份、新壓力。

我同老公之間有好多磨擦，同埋好多未處理好嘅傷口。

老實講，當時嘅關係並唔穩定。

⸻

所以今日回頭望返，

我想講嘅唔係自己有幾大決心，或者做咗幾多規劃。

相反，我愈來愈覺得：

能夠成就呢趟旅程，唔係靠我。

係神一步一步開路。

由訂機票、車票、船票，到歐洲交通安排、住宿、治安擔憂……

好多我原本擔心會出錯嘅事情，最後都一一順利完成。

出發前，我心裡一直有一個信念：

呢個唔係一個單純享受或者打卡嘅旅行。

呢趟朝聖之旅嘅主角唔係我。

而係神。

亦都係我哋嘅蜜月旅程。

我希望同老公一齊喺路上經歷神更多。

感恩當時老公都同樣期待呢趟旅程。

⸻

一年後再回望，

最難忘嘅未必係風景，

而係神如何喺一個個「不可能」裡面，

開出一條路。

🙏❤️

究竟之後嘅旅程發生咗咩事？

經歷咗啲咩人、咩事、咩信仰功課？

留待下回分解⋯⋯

BTW 由朝聖旅程開始，我哋養成咗飯前+感恩禱告既習慣
為呢個家建立起信仰基礎 為此感恩
神親自一步步引領我哋進入有神同在既婚姻關係
學習彼此相愛 成為合一
而今日仍然學習中…

（希望今次真係抽到時間寫 😅）

#蜜月朝聖 #神的帶領

12/06/2026

26/05/2026

繼前一晚即興 BBQ 後，
Bank Holiday 我哋一行 10 人由 Cardiff 出發，去咗 Castle Combe 行山 ☀️

英國 heat wave 真係唔講笑。🥵
烈日當空，行咗足足 3 個鐘，大家都熱到崩潰🤣

但一路經過花牆、石屋、小村落，
真係會忍唔住停低慢慢欣賞。

最後大家都努力完成咗呢段路。
攰，但好值得 🍃

🍅🦆

After a spontaneous BBQ the night before,
10 of us set off from Cardiff on the Bank Holiday ☀️

3 hours under the heat wave felt much longer than expected.
Sweaty, tired, sunburnt… but somehow everyone kept going.

Along the way, we passed flower-covered stone walls, quiet little cottages, and one of the prettiest villages we’ve ever seen — Castle Combe 🌼

Sometimes the best days are the unplanned ones.

🍅🦆

#香港人在英國行山

22/05/2026

Not a camper van yet.
Not a perfect setup yet.

Just a little yellow car,
and the beginning of a new journey 💛

After saying goodbye to our old car,
we finally welcomed this Suzuki Swift Sport in Champion Yellow.

Maybe no car camping for now,
but slowly… one step at a time.

TomatoDuck keeps moving 🍅🦆

HongKongerInUK ChampionYellow