07/09/2026
აფხაზეთის ა/რ სავაჭრო-სამრეწველო პალატა „გემოფესტი 2026“-ზე
5–6 სექტემბერს, აჭარაში, ბათუმის ძველი ბულვარის ტერიტორიაზე, გასტრონომიული ფესტივალი „გემოფესტი 2026“ გაიმართა, რომელშიც აფხაზეთის ა/რ სავაჭრო-სამრეწველო პალატამ მიიღო მონაწილეობა.
ფესტივალის ფარგლებში პალატამ სტუმრებსა და დამთვალიერებლებს აფხაზეთიდან დევნილი მეწარმეების მიერ წარმოებული მრავალფეროვანი პროდუქცია წარუდგინა.
სტუმრებს შესაძლებლობა ჰქონდათ გაცნობოდნენ მეწარმეების მიერ შექმნილ როგორც სასურსათო, ისე ხელნაკეთ ნაწარმს, მათ შორის: აჯიკას, სხვადასხვა სახის სანელებლებს, ჩირის ასორტს, თაფლის პროდუქტებს, ტექსტილის ნაწარმს, ხის დეკორატიულ ნაკეთობებსა და კერამიკულ ჭურჭელს.
„გემოფესტი 2026“ მიზნად ისახავს საქართველოს რეგიონების უნიკალური კულინარიული ტრადიციების პოპულარიზაციას, ადგილობრივი მეწარმეების მხარდაჭერასა და გასტრონომიული ტურიზმის განვითარების ხელშეწყობას.
აფხაზეთის ა/რ სავაჭრო-სამრეწველო პალატა მადლობას უხდის საქართველოს ტურიზმის ეროვნულ ადმინისტრაციას ნაყოფიერი თანამშრომლობისა და აღნიშნულ ღონისძიებაში მონაწილეობის შესაძლებლობისთვის.
ღონისძიება განხორციელდა აფხაზეთის ავტონომიური რესპუბლიკის მთავრობის მხარდაჭერით.
