04/09/2026
🌞 “გალობანი სინანულისანი”
ქართველები საუკუნეებია დავით აღმაშენებელს ვხედავთ, როგორც ჩვენს დიდ მეფეს, გამარჯვებულს, ქვეყნის გამაერთიანებელს და აღმშენებელს. მაგრამ იშვიათად ვუფიქრდებით იმ დავითის სულიერ მდგომარეობას, რომელმაც “გალობანი სინანულისანი” დაწერა. დავითს, რომელმაც თავის დიდებით და ძალაუფლებით, პოლიტიკური და სახელმწიფოებრივი წარმატებებით ხიბლში ჩავარდნის განსაცდელი დაძლია და საკუთარ თავში ცოდვილი ადამიანი დაინახა. მისი “გალობანი სინანულისანი“ სწორედ ამ სხვა დავითს გვაცნობს და მის სულიერ ფიქრებში გვახედებს. მეფე, რომელიც ღმერთის წინაშე დარჩენილი საკუთარ თავს უმკაცრესად განსჯის. თითქოს იქ აღარ არსებობს არც გვირგვინი, არც გამარჯვებები, არც მეფობა, რჩება მხოლოდ ადამიანი, მისი სინდისი და ღმერთი.
მსოფლიო ისტორიაში არაერთ მეფეს დაუწერია სულიერი და საღვთისმეტყველო ტექსტი, თუმცა იშვიათია მაგალითი, როდესაც ძლევამოსილი მეფე საკუთარ თავს ასეთი სიმკაცრით განსჯის, თან ამას წმინდა წერილის და სასულიერო ტექსტების ღრმა ცოდნით და ულამაზესი პოეტური ოსტატობით ახერხებს. საგალობლების კითხვით ჩვენ მხოლოდ მცირე წარმოდგენა შეიძლება შეგვქმნას დავითის დიდ სიბრძნეზე და სამყაროს აღქმის სიფართოვეზე.
მკვლევარები მის შთაგონებად ბიბლიურ დავით მეფსალმუნეს და ანდრია კრეტელს ასახელებენ:
დავითის ფსალმუნები: https://www.orthodoxy.ge/tserili/mtskheturi/fsal1-20.htm
🕯️ანდრია კრეტელი: https://www.orthodoxy.ge/lotsvani/galoba/kriteli_orshabati.htm
ასევე იკითხება პავლე მოციქულის ეპისტოლეებში გაჟღერებული სწავლებაც, რომ მთავარი ცოდვა შემოქმედის დავიწყება და შექმნილის განდიდებაა:
📜
„შემოქმედისაგან შექმნილთა მიმართ
ცვალებაჲ თაყუანისცემისაჲ...
თითოეულსა ვნებისა კერპსა ვჰმსახურე“
~ დავით აღმაშენებელი
📜
„რომელთა-იგი გარდაცვალეს ჭეშმარიტებაჲ ღმრთისაჲ სიცრუვედ და პატივს-სცემდეს და ჰმსახურებდეს დაბადებულთა”
~ პავლე მოციქული, რომაელთა მიმართ. 1:25.
„გალობანი სინანულისანი“ XII საუკუნის დასაწყისშია შექმნილი და რვა გალობისგან შედგება. თითოეულს რთული და განსხვავებული სტროფული აგებულება აქვს.
• თეოლოგიური: ცოდვა, სინანული, ღვთის სამართალი და წყალობა.
• ფილოსოფიური: ადამიანი საკუთარ ქმედებებსა და პასუხისმგებლობას უპირისპირდება.
• ფსიქოლოგიური: ავტორი საკუთარ თავში იყურება და თვითგანსჯას ახდენს.
• პოეტური: ეს უბრალოდ ლოცვა ან აღსარება კი არა, გააზრებულად აგებული მხატვრული ტექსტია.
• პოლიტიკურ-ეთიკური — განსაკუთრებული მნიშვნელობა აქვს იმას, რომ ამას წერს სწორედ მეფე, ანუ ადამიანი, რომელსაც სხვების ბედზე უზარმაზარი ძალაუფლება აქვს.
ნაწარმოები ნათარგმნია ინგლისურ, გერმანულ, ფრანგულ, იტალიურ, რუსულ, პოლონურ და ჩეხურ ენებზე.
⛓️💥 “გალობანი სინანულისანი” დავით აღმაშენებელი https://www.orthodoxy.ge/lotsvani/galoba/davit-galobani.htm
საგალობლებიდან ჩემი საყვარელი ნაწილია, სადაც დავითი ღმერთს ამ ულამაზესი სიტყვებით მიმართავს: “მარტიო, სრულო, სამ-მზეო, ერთ ცისკროვნებაო, განმინათლე მხედველობითი სულისაჲ, რაჲთა გიხილო ნათელი ნათლითა უფლისაჲთა, სულითა ღმრთისაჲთა, გამოგჳბრწყინვო მაშინ დაუსრულებელთა საუკუნეთა!” ✨
