23/03/2026
修哥驚喜現身！羅蘭姐、家燕姐、心姐齊聚｜金菊園 x THE GRAND HK 馬年春茗
今年春茗，好榮幸邀請到四位「資深顧客」嚟到合和中心嘅旋轉餐廳 - 自助山，同金菊園嘅同事同合作夥伴一齊食開年飯。
最驚喜嘅係，修哥一直冇回覆我哋能否賞面出席，原來佢係要畀所有人一個驚喜。結果佢突然現身，全場即時掌聲歡呼——連家燕姐都完全唔知！見到呢位相識幾十年嘅老友突然出現，家燕姐開心到忍唔住同大家分享佢哋嘅「銀幕緣分」：由做修哥個女開始，到做佢妹妹、做佢情人，甚至做埋佢老婆，角色一直變，唯一唔變嘅係兩個人嘅默契同感情。我哋班同事坐喺旁邊聽住，真係忍唔住眼濕濕。
94歲嘅修哥精神奕奕，話細個屋企人成日帶佢去中環金菊園，呢一份味道一世都回味。羅蘭姐感觸最深——後生嗰陣成日嚟合和中心呢間旋轉餐廳，春茗能夠再一次嚟到呢度，仲有佢媽咪最鍾意食嘅金菊園臘鴨尾，滿滿都係回憶。家燕姐話由細到大屋企人買臘味一定揀金菊園，用料上乘從來冇失望。心姐係我哋嘅「大掌櫃」，支持更加唔使多講。
講到今次同 THE GRAND HK 聯手嘅菜式，每一道都係驚喜：
🥧 臘味巴斯克芝士蛋糕——老實講，最初我哋自己都唔相信呢件事係 make sense，點知從唔 make sense 到覺得新奇，食完之後仲回味，之後每次見到都會忍唔住叫返嚟食。如果你未試過，下一年真係要去試吓！
🌯 手工臘腸卷——自助山排長龍都未必搶到，我好多朋友話係佢哋一生人食過最好味嘅臘腸卷。俾咁貴嘅價錢去食自助餐，竟然打崩頭都係為咗佢。
🍚 煎鵝肝腸 Risotto——呢個唔使多講，簡直係勁！臘味嘅鹹香配上意大利飯嘅 creamy，每一啖都係驚喜。
仲有 THE GRAND CAFE 嘅辣味臘腸蝴蝶酥、Moodle 精心製作嘅臘味麵食⋯⋯每一道都係我哋從未想像過嘅味道。THE GRAND HK 嘅團隊帶住我哋離開咗自己最熟悉嘅 Comfort Zone，喺完全唔熟悉嘅領域入面，飛到一個從未去過嘅味道天空。
多謝 THE GRAND HK 上上下下嘅團隊，真心佩服你哋嘅專業同膽識。期待將來繼續合作，一齊玩更多意想不到嘅驚喜！
春茗過後收到好多客戶查詢，多謝大家厚愛。我哋暫別一陣，八月重新開爐，到時再同大家見面！
願大家平安喜樂、身心康泰，好似我哋嘅臘味一樣——愈陳愈香，愈耐愈有味。
📢 店小二提提你：
如果你都想喺中秋節前搶先收到我哋嘅開賣消息，歡迎 WhatsApp 我哋，一開爐就會即刻通知你！
👉 https://wa.link/mdfpn3
#金菊園 #百年傳承 #自助山 #馬年春茗 #香港味道 #八月再見
