Mr. Roo Australia 袋鼠先生 Blog

25/06/2017

無野賣，無寫文，整左麵包，純粹開心share下~

10/04/2017

裸辭前後

https://www.facebook.com/HiMrRoo/

辭職前, 袋鼠先生係 “係銀行坐房扮晒專家果的茂里”, 又稱banker.

澳洲而家其實經濟好差, 尤其西澳, 一般人辭職或者被辭職, 都失業6-12個月或者上, 做咩事咁勇呢?

是咁, 如果你都同我一樣, 係過去果六個月, 有以下症狀, 你都應該及早治療。

階段1:

朝早開會, 你開始諗: “又係講呢的, 朝朝都係講呢的, 呢季條數要幾多, 呢個月要幾多, 今個星期要幾多, 推番落去今日要做幾多。”

階段2:

幾日後, 同樣係上述個會, 你開始係開會既時候諗第二的(無謂)野:

“其實就算我上到經理呢個位都幾慘, 真心, 升到又點? 我唔想好似佢咁… 不如直頭轉行啦, 做咩好? 我都幾中意貓(who doesn’t?~), 有咩野可以用番呢行經驗, 又同貓有關呢? 招財師…?”

然後開開下會自己笑左出來…

階段3:

幾個星期後同樣係上述個會(係呀呢個會基本上日日開的…), 你去意已決, 其實已經寄左若干封求職信 (不是招財師), 但未有消息, 所以你對於開會既上心程度大約係6折…呢季條數要幾多, 呢個月要幾多, 今個星期要幾多, 推番落去今日要做幾多…乜乜乜

階段4:

又過左幾個星期, 你終於有個interview, 心情興奮, 搭少少緊張同忐忑, 係同一個會議上, 又係同樣既經理同事, 仍然係同樣既內容, 每日都有幻想見成份新工, 岩岩返工想辭職既時候, 經理同你講(當然經理其實係用英文講啦):

“早晨, 你坐低丫。” (心裡面諗, 做咩事個樣咁凝重呢? 唔係想炒我丫嘛?)
經理繼續講: “其實而家經濟不景, 你都應該知道, 高層都進行緊restructure, 所以我地都有人手上既變動…”(心情開始興奮)

“你係呢度既年資最淺… 公司係好無奈之下, 唯有揀左你” (呢一刻, 你興奮莫名, 公司真係炒你!)

“公司會出埋來緊既一個月糧俾你, 我會幫你寫封reference letter, 裡面會講公司restructure, 而你既離開並唔係因為你既表現, I am sorry…” (其實你就諗住今日返去遞信, 俾埋4個星期通知, 點知經理就咁岩係呢個時候炒左你, 而家工又唔駛返, 仲有多四星期糧出, 不如返一轉香港玩下, 順便飛埋日本? 咦, 定係拎返封辭職信出來, 自動請辭好似好睇的?...)

無錯以上係全部響你個腦入面發生的... 你會開始有種好虛幻既感覺, 每一日你都有好一段時間係度幻想裸辭同被炒, 經理每講一個字(係呀仲係開緊果個會), 都令你好想裸辭劈炮唔撈。

當然啦, 冷靜既你, 知道其實你係未有offer既, 所以你好冷靜咁仍然繼續坐係個會裡面, 開始fade in配樂…

這一種想見不能見的傷痛
讓我對你的思念越來越濃
我卻只能把你 把你放在我心中

你每日都係呢種超自然既思想鬥爭同思想鬥爭之間渡過。

而個會呢, 仍然日復日, week復week, 繼續不停輪迴。

https://www.facebook.com/HiMrRoo/

Mr. Roo 係香港人, 不過而家住係澳洲珀斯, 八十後算是第二代working holiday香港?

21/12/2016

原來仲有幾日聖誕節喇喎. 今年放唔中紅日, 頂... 大家有咩搞?

01/11/2016

Donuts for 2 😁😁😁😁

03/10/2016

其實係唔係真係咁多人歧視你呢?

好多人都覺得澳洲或者其他英語系白人國家, 亞洲人好容易會被歧視, 會影響日常生活甚至工作機會, 事實係咪咁呢? 以下純粹分享下袋鼠先生係澳洲遇過既事, 如有雷同, 你自己諗下。

日常生活:
是咁的, 你走入一間舖頭, 好多時個店員會同你講句 “how are you doing?” 或者有咩幫到你之類的說話, 老實講, 由細到大, 係香港既舖頭, 聽到呢句說話係當聽唔到直行直過既, 其中係因為如果你俾任何反應 (即使係好客氣咁話 “唔駛喇唔該”), 個店員就會直接當你講yes定唔知係好好洽, 不停追住你唔放 (尤其係係街果的sales), 直到你決定對佢唔禮貌為止…點解要咁呢? 我好聲好氣同你講唔駛, 你聽下我講得唔得架唧?... 講返係澳洲呢度呢, 其實你唔應佢係好無禮貌既, 你心情好可以應完佢又問返佢好唔好 (雖然佢應該每日都答4打次), 你唔想問返佢既, 都應該講句你好好, 多謝晒, 或者你無野要幫, 只係隨便睇睇。
咁你唔應佢, 人地梗係睥你啦。

行行下街:
如果你真係係度街度行行下都有人睥你, 你同朕check下, 你會唔會係講野太大聲, 玩/講電話太大聲, 唔睇路亂咁撞, 或者你件衫有的唔應該出現既字, 其他本地人唔中意既行為, 或者你真係純粹外表太另類 (喂正常人見到都會望啦係咪)… 因為無事無幹, 其實真係好少會行行下街都睥你的。

見工:
咁既, 正常一般中至大既企業、大學, 其實係有好多非本地人既 (尤其IT部呀果的), 佢地係會請非本地人的, 只要你係有條件做果份工作, 基本溝通要無問題 (前線既職位溝通當然要再好少少), 同埋你要對本地常識同基本俗語有足夠認知;
袋鼠先生既英文都唔係正宗, 亦唔係100%地道, (留意我係要係銀行日日對客既), 但最緊要係表達到你想講乜, 一般本地人係唔會 (公開咁) 笑你既口音的。
至於小型商戶, 就真係睇人啦, 我就真係遇過華人老闆話唔想我做sales因為我係亞洲人樣, 係呀, 佢真係咁樣直接、兜口兜面同我講…

係公司:
好多職位都唔係一定要英文好叻先見到既, 你成功入左一間公司, 跟住點樣同的同事溝通, 先係真正既關鍵, 畢竟大家長大既環境唔同、睇既劇唔同、聽既音樂唔同、學校工作人生經歷唔同, 都未必真係會有好多野岩傾, 如果人地中意同自己人埋堆, 都好正常 (係, 當然暗示左袋鼠先生工作既地方都有呢的人啦), 咁其實唔岩傾, 又唔一定係歧視你既!

https://www.facebook.com/HiMrRoo/

13/09/2016

係澳洲銀行遇過的客人s

之前都有同大家提過, 袋鼠我係呢邊係銀行工作既, 因為工作關係, 耐唔耐都會遇到的印象比較深刻的, 以下係第一個分享。

不幸總係喜歡降臨係不幸既人身上:

有位客人, 英文唔係第一語言, 同佢溝通其實有點困難, 事沿係呢位客人一直都係交一個固定既按揭數目既, 點知大約一年前, 佢唔知聽邊個同事講, 就交少左, 然後就大鑊了, 因為咁, 佢一直都係跟唔上交款進度, 咁另一個好資深的同事就叫佢交多少少, 大約幾個月你就會追返上來, 但佢就一直都收到張叫佢交錢既信, 佢覺得好煩, 然後又定期上來嘈… (其實我地都覺得好煩架)

直到幾個星期前, 佢條數終於落入追數部門手上, 影響佢紀錄都不突止, 仲自動響佢戶口扣左的錢去交數 (因為簽按揭合同時候條款寫明左係會咁樣安排的), 佢就上來鬧, 話做咩會自動扣左條數……

而家件事仲處理緊, 因為有部份係銀行失誤, 但又唔係完全銀行錯晒先煩 (因為個客人自己應該知道係一直都係交同一個數的)。 細聽之下, 原來個客人有個女, 由BB開始就訓左響醫院--差不多廿年, 一直昏迷/植物唔郁, 而呢個客人係需要照顧佢自己、昏迷的小朋友, 另外一個小朋友, 仲要返工、供樓…

佢有一個願望, 就係希望個女有一日會醒返, 可以家庭團聚。而佢等緊既基本上係一個醫學研究上既突破… 又稱奇蹟。

佢既願望幾時先等到, 或者會唔會等到, 其實我真係唔知, 而佢個女醒返之後到底又係咪真係好事, 我都唔敢講… 西澳呢排都好多人病, 祝大家身體健康。
https://www.facebook.com/HiMrRoo/

03/09/2016

提提大家: 記得投走保皇黨, 保住1/3否決權。

30/08/2016

港式排包 – 肥與味覺的鬥爭遊戲+超簡單食譜

袋鼠先生搞乜: https://www.facebook.com/HiMrRoo/

到底係邊個首先發明排包? 起源不詳 (袋鼠先生我真係Google過), 不過發明者應該同愛迪生被看齊。可惜柏斯呢度港式麵包店唔多, 間間都老年咁遠。港式麵包好食之處, 就在於高油高糖高脂肪; 唔係講笑, 其實係食物科學來講, 糖同脂肪就係食物要 “好味” 的主要成份, 所以坊間咁多所謂 “低脂” 甚至 “脫脂” 產品, 如果你望下背面個營養成份表, 其實糖份比起原味仲更高, 再望下個成份, 嘩頂真係特登加左糖。
你以為自己食完瘦左又fit左, 點知越食就越肥, 越肥你又越食, 你以為純粹自己為食, 其實根本係廠商陰你。肥同味覺的鬥爭到底邊個贏? 其實邊個贏都係你輸既。

食野唔好講肥, 講返個排包先 (實在太好食), 材料是咁的:

高筋粉 390克
細砂糖 65克
鹽 5克
奶粉 12克
快速乾酵母 6克 (Instant dry yeast)
蛋 2/3隻 (混入麵團)
蛋液 1/3隻 (掃麵包面)
牛奶 225克
忌廉75毫升 (whipping / thickened cream)
牛油35克

程序:
1. 搓團
2. 靜置1個小時左右
3. 排氣, 按扁, 再排氣, 搓成排包條條, 排好
4. 靜置15分鐘左右
5. 掃蛋液
6. 預熱180度, 焗25分鐘左右, 表面金黃就可以, 唔好過熟, 否則會好易乾硬

少少筆記:
1. 牛油: 袋鼠先生係澳洲咁耐, 其實都整過排包好幾次, 有搵過唔同食譜比較過, 大同小異, 主要都係湯種定係唔湯種(中種), 以上呢個係中種, 咁就唔駛又要撩一煲野, 至於有的食譜話用無鹽牛油, 我袋鼠先生就來都係唔理既, 因為我覺得就算係甜食, 牛油果種鹹係鹹香, 都係增加左個層次, 又唔係會鹹到豆豉鯪魚咁。
2. 奶粉: 應該係排包味既精髓所在 (試過skip左唔跟就無左種排包味)。
3. 湯種: 大部份港式/日式麵包都可以湯種, 只要將任何食譜既麵粉抽大約 5%出黎, 呢一份抽出來既麵粉, 再加5份水, 預先低溫煮到佢變漿糊, 減走原食譜的呢5份水, 然後先將呢堆漿糊放番入麵團, 咁就可以將任何中種食譜變湯種, vice versa.
4. 做咩要湯種搞到咁複雜呢: 好似係日本人發明既, 因為科學上來講, 水同麵粉撈埋就會起筋, 越撩得多&時間越長就越起多筋, 咁就有助麵團既整體彈性同埋軟熟感 (同埋鎖住水份喎)。
5. 個人意見: 手勢好的話湯唔湯種都可以軟熟, 隨你喜歡。

袋鼠先生搞乜: https://www.facebook.com/HiMrRoo/

30/08/2016

各位街坊朋友叔伯兄弟姨媽姑姐表姊弟妹, Mr. Roo 同 Caffe Vita 將會係今個禮拜六日 (3-4 / 9)係觀塘擺市集, 大家食飽飯無野做的可以去行下 (12-8PM), 當然你好忙都可以抽空專程去行啦, 如果到時唔夠貨既(搶手丫嘛), 絕對可以再預訂。

當日會有手沖咖啡示範同試飲 (正呀喂), 仲有Gift tag貼紙免費送俾大家既 (唔好睇小佢, 價值非常連城), 你地可以用佢來貼係禮物上面或者直接用佢來封紙袋口, 仲可以係上面寫上收件人同埋你自己個名架~

地點係觀塘駿業街56號中海日升中心D-K舖 (係唔係聽個地址就知易搵呢...)

22/08/2016

續上篇

更多無謂野: https://www.facebook.com/HiMrRoo/

繼續同澳洲或旅遊無咩關係, 繼續純粹感懷身世。

你終於結婚
朋友：恭喜你，局住去飲
兄弟：係負責做好份大人情、飲酒同物色靚姊妹既
契弟：淨係去飲酒同物色靚姊妹

話來澳洲探你
朋友: “有機會我都想過來澳洲玩下”
兄弟: 真係過來澳洲探你
契弟: 真係過來澳洲探你, 食晒你屋企的薯片, 飲晒你的啤酒, 又唔買返, 杯又唔洗咁

佢被炒
你：梗係第一時間笑佢先啦
契弟：晚晚拉你去飲酒訴苦然後搞到你都被人炒埋

然後你失業喇
朋友：祝你好運啦，東家唔打打西家
子華：東家唔打，咪打阿東家囉
契弟：笑返你，講埋的 “無乜用既說話”

有篇野寫你
朋友：暗自懷疑 「被契弟」
兄弟：tag你都唔夠，仲要share出來
契弟：tag你都唔夠，仲要share出來, 然後公開_你, 慨嘆唔知前世做錯乜

更多無謂野: https://www.facebook.com/HiMrRoo/